ភ្នំពេញ ៖ នៅព្រឹកថ្ងៃទី២ ខែមេសា ឆ្នាំ២០២៥ ក្នុងសម័យប្រជុំលើកទី៥៨ នៃក្រុមប្រឹក្សាសិទ្ធិមនុស្ស ឯកឧត្តម ឯកអគ្គរាជទូត អុិន តារា តំណាងអចិន្ត្រៃយ៍កម្ពុជាប្រចាំអង្គការសហប្រជាជាតិ និងអង្គការអន្តរជាតិ នៅទីក្រុងហ្សឺណែវ បានធ្វើបទអន្តរាគមន៍ ក្នុងការជជែកពិភាក្សាក្រោមរបៀបវារៈទី១០ សី្តពីកិច្ចសហប្រតិបត្តិការបច្ចេកទេស និងការកសាងសមត្ថភាពក្នុងវិស័យសិទ្ធិមនុស្ស។
ឯកឧត្តម ឯកអគ្គរាជទូតបានលើកឡើងថា កិច្ចសហប្រតិបត្តិការបច្ចេកទេសដើរតួនាទីយ៉ាងសំខាន់ក្នុងការពង្រឹងស្ថាប័នជាតិក្នុងការអនុវត្តកាតព្វកិច្ចសិទ្ធិមនុស្ស។ ក្រុមប្រឹក្សាសិទ្ធិមនុស្ស និងការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) គួរតែជាស្ថាប័នបង្គោលក្នុងការលើកកម្ពស់ការអនុវត្តល្អជាសកលក្នុងវិស័យនេះ។
ជំនួយបច្ចេកទេសអាចមានប្រសិទ្ធភាពបាន លុះត្រាតែជំនួយនោះផ្តល់ឱ្យដោយផ្អែកលើតម្រូវការជាក់ស្តែង ដោយមានការយល់ព្រមពេញលេញពីរដ្ឋនីមួយៗ និងផ្អែកលើការសន្ទនាពិតប្រាកដ។ ជំនួយនោះក៏ត្រូវស្របតាមអាទិភាពជាតិ និងគាំទ្រដល់ការអនុវត្តអនុសាសន៍នៃកិច្ចប្រជុំត្រួតពិនិត្យជាសាកលតាមកាលកំណត់ (UPR) ដោយគោរពតួនាទី និងអធិបតេយ្យភាពរបស់រដ្ឋ ក្នុងនាមជាអ្នកដើរតួនាទីចម្បងក្នុងការការពារសិទ្ធិមនុស្ស។
កម្ពុជាមានប្រវត្តិយូរអង្វែងក្នុងការចូលរួមជាមួយយន្តការសិទ្ធិមនុស្សរបស់អង្គការសហប្រជាជាតិ តាមរយៈកិច្ចសន្ទនា និងកិច្ចសហប្រតិបត្តិការ។ កាលពីខែមករាឆ្នាំនេះ កម្ពុជាបានបន្តអាណត្តិពីរឆ្នាំទៀត សម្រាប់ការិយាល័យ OHCHR ប្រចាំកម្ពុជា ដែលកត្តានេះបង្ហាញសារជាថ្មីនូវការប្តេជ្ញាចិត្តរបស់កម្ពុជាក្នុងការជំរុញឱ្យមានការចូលរួមប្រកបដោយភាពស្ថាបនាក្នុងវិស័យសិទ្ធិមនុស្ស។
យើងសូមសម្តែងការកោតសរសើរចំពោះតួនាទីរបស់ OHCHR ក្នុងការផ្តល់នូវកិច្ចសហប្រតិបត្តិការបច្ចេកទេស និងការកសាងសមត្ថភាពដល់ប្រទេសកម្ពុជា និងនៅលើសកលលោក។ ដើម្បីធានាបាននូវនិរន្តរភាព និងប្រសិទ្ធភាពសម្រាប់កិច្ចខិតខំប្រឹងប្រែងទាំងនេះ ការផ្តល់មូលនិធិឱ្យបានគ្រប់គ្រាន់ពិតជាមានភាពចាំបាច់។ យើងលើកទឹកចិត្តឱ្យរដ្ឋនានាវិនិយោគលើមូលនិធិស្ម័គ្រចិត្តសម្រាប់ជំនួយបច្ចេកទេស និងផ្តល់អាទិភាពទៅលើការផ្តល់មូលនិធិគ្រប់គ្រាន់ដើម្បីគាំទ្រដល់ជំនួយដែលផ្អែកលើតម្រូវការជាក់ស្តែងរបស់រដ្ឋ ក្នុងការបំពេញកាតព្វកិច្ចសិទ្ធិមនុស្សឱ្យបានពេញលេញ៕ រក្សាសិទ្ធដោយ៖សុទ្ធលី
