រាជធានីភ្នំពេញ៖ នារសៀលថ្ងៃទី២ ខែមេសា ឆ្នាំ២០២៥ នៅទីស្តីការក្រសួង ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានទទួលជួបសម្ដែងការគួរសម និងពិភាក្សាការងារជាមួយ ឯកឧត្តម Vanlalvawna Bawitlung ឯកអគ្គរដ្ឋទូតនៃសាធារណរដ្ឋឥណ្ឌា ប្រចាំព្រះរាជាណាចក្រកម្ពុជា និងមានការចូលរួមពី ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា និងមន្រ្តីពាក់ព័ន្ធក្រោមឱវាទ។
នាឱកាសនេះ ឯកឧត្តម ឯកអគ្គរដ្ឋទូតនៃសាធារណរដ្ឋឥណ្ឌា ប្រចាំព្រះរាជាណាចក្រកម្ពុជា បានបង្ហាញសេចក្តីរីករាយដែលបានចូលជួបសម្តែងការគួរសម និងពិភាក្សាការងារជាមួយឯកឧត្តមបណ្ឌិតសភាចារ្យ ឧបនាយករដ្ឋមន្ត្រី ជាផ្លូវការលើកដំបូង ក្នុងគោលបំណងដើម្បីពិភាក្សាពីកិច្ចសហប្រតិបត្តិការបន្ថែមទៀតលើវិស័យអប់រំ យុវជន និងកីឡា រវាងប្រទេសទាំងពីរ ដោយបានរំលេចពីទំនាក់ទំនងជាប្រវត្តិសាស្ត្រដ៏សម្បូរបែប លើវិស័យវប្បធម៌ និងសាសនា ជាមួយកម្ពុជា ជាពិសេសទំនាក់ទំនងជាច្រើនសតវត្សរវាងប្រជាជន និងប្រជាជន ព្រមទាំងបានគូសបញ្ជាក់ពីចំណាប់អារម្មណ៍ក្នុងការបន្តលើកកម្ពស់កិច្ចសហប្រតិបត្តិការវិស័យអប់រំ យុវជន និងកីឡា ឱ្យកាន់តែល្អប្រសើរ។
ជាការឆ្លើយតប ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានស្វាគមន៍យ៉ាងកក់ក្ដៅ និងអបអរសាទរដល់ ឯកឧត្តម Vanlalvawna Bawitlung ដែលត្រូវបានតែងតាំងជាឯកអគ្គរដ្ឋទូតឥណ្ឌា ប្រចាំព្រះរាជាណាចក្រកម្ពុជា កាលពីខែកុម្ភៈ ឆ្នាំ២០២៥ កន្លងមកនេះ ព្រមទាំងបានលើកឡើងពីទំនាក់ទំនងយ៉ាងជ្រាលជ្រៅ និងយូរអង្វែងរវាងប្រទេសទាំងពីរ ជាពិសេសឥទ្ធិពលនៃវប្បធម៌ឥណ្ឌាមកលើកម្ពុជា ដែលទំនាក់ទំនងប្រវត្តិសាស្ត្រនេះគឺជាគ្រឹះដ៏រឹងមាំឆ្ពោះទៅរកការអភិវឌ្ឍ និងវឌ្ឍនភាពនៃប្រទេសទាំងពីរ។
ក្រសួងអប់រំ យុវជន និងកីឡា មានការប្តេជ្ញាចិត្តខ្ពស់ក្នុងការបន្តពង្រឹងប្រព័ន្ធអប់រំ និងផ្តល់ឱកាសដល់យុវជនដើម្បីក្លាយជាកម្លាំងចលករដ៏សំខានចូលរួមអភិវឌ្ឍសេដ្ឋកិច្ចសង្គមជាតិ ដោយរំពឹងថា កិច្ចសហប្រតិបត្តិការនេះ នឹងបន្តរីកចម្រើន ជាពិសេសតាមរយៈការផ្លាស់ប្តូរបទពិសោធនៃការសិក្សារវាងប្រទេសទាំងពីរ ការចែករំលែកចំណេះដឹងក្នុងវិស័យអប់រំឌីជីថល ការបណ្តុះបណ្តាលគ្រូបង្រៀន និងការអភិវឌ្ឍជំនាញវិជ្ជាជីវៈ ដែលរៀបចំយុវជនកម្ពុជាឱ្យត្រៀមខ្លួនរួចរាល់សម្រាប់តម្រូវការទីផ្សារការងារជាក់ស្តែងក្នុងពេលបច្ចុប្បន្ន និងអនាគត។
ជាថ្មីម្តងទៀត តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណយ៉ាងជ្រាលជ្រៅដល់រដ្ឋាភិបាលឥណ្ឌាដែលបន្តគាំទ្រដល់ការអភិវឌ្ឍកម្ពុជា ក៏ដូចជាលើកកម្ពស់វិស័យអប់រំ យុវជន និងកីឡា តាមរយៈការផ្តល់អាហារូបករណ៍ និងកម្មវិធីផ្លាស់ប្តូរការសិក្សា ដែលបានឆ្លុះបញ្ចាំងពីគោលដៅរួមរបស់ប្រទេសទាំងពីរក្នុងការអភិវឌ្ឍធនធានមនុស្ស ព្រមទាំងបានបញ្ជាក់ពីការគាំទ្រ និងស្វាគមន៍នូវរាល់គំនិតផ្តួចផ្តើមដែលស្ថាប័ន និងវិទ្យាស្ថានឥណ្ឌាមានបំណងចង់មកវិនិយោគលើវិស័យអប់រំក្នុងប្រទេសកម្ពុជា៕ រក្សាសិទ្ធដោយ៖សុទ្ធលី
