ភ្នំពេញ ៖ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានឲ្យដឹងថា កម្ពុជាគោរពតាមបទដ្ឋានរបស់អង្គការពាណិជ្ជកម្មពិភពលោក (WTO) ម្ល៉ោះហើយកម្ពុជា មិនបានកំណត់យកពន្ធនាំចូលលើទំនិញរបស់សហរដ្ឋអាមេរិក ៩៧% នោះទេ។
កិច្ចសម្ភាសន៍ពិសេសជាមួយ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្មកម្ពុជាចំពោះការដំឡើងពន្ធគយរបស់សហរដ្ឋអាម៉េរិក លើទំនិញនាំចូលពីកម្ពុជា
ថ្ងៃទី៣ ខែមេសា ឆ្នាំ២០២៥ លោកជំទាវបានថ្លែងថា ជញ្ជីងពាណិជ្ជកម្មរវាងកម្ពុជា និងអាមេរិក ដែលទំហំពាណិជ្ជកម្មជិត ៣០០លានដុល្លារ របស់អាមេរិក បាននាំចូលមកកម្ពុជា គឺពន្ធនាំចូលលើទំនិញខ្ពស់បំផុត ត្រឹមតែ២៩%ប៉ុណ្ណោះ ដូច្នេះស្ថិតនៅក្រោមបន្ទាត់កំណត់ខ្ពស់បំផុតរបស់អង្គការពាណិជ្ជកម្មពិភពលោក ៣៥% ។
លោកជំទាវ រដ្ឋមន្ត្រីក្រសួងពាណិជ្ជកម្មកម្ពុជា បានថ្លែងបញ្ជាក់ថា ពន្ធដែលកម្ពុជាយកពីទំនិញអាមេរិក គឺមានត្រឹមតែ ២៩.៤% ភាគរយប៉ុណ្ណោះ មិនមែន ៩៧% ដូចដែលលោក ដូណាល់ ត្រាំ ប្រធានាធិបតីអាមេរិក បញ្ជាក់នោះទេ។
លោកជំទាវ ចម និម្មល បានឱ្យដឹងថា កម្ពុជានៅក្នុងនាមជាសមាជិក WTO ក៏ដូចគ្នាទៅនឹងសហរដ្ឋអាមេរិក និងប្រទេស ១៦៦ផ្សេងទៀតដែរ សុទ្ធតែជាសមាជិក WTO យើងមានការកំណត់នូវបន្ទាត់ពន្ធគយជាមួយគ្នាជារួម ក្នុងនោះកម្ពុជាបានកំណត់ នៅក្នុងកាតព្វកិច្ចរបស់ខ្លួន គឺការយកពន្ធនៃផលិតផលនាំចូលមិនថា សហរដ្ឋអាមេរិក ឬក៏របស់ដៃគូពាណិជ្ជកម្មណាផ្សេងៗទេ គឺថា មានចន្លោះពី ០ រហូតដល់អស់កម្ពស់គឺ ៣៥%។
ជាមួយនឹងការលើកឡើងរបស់លោក ដូណាល់ ត្រាំ ដែលថាកម្ពុជាយកពន្ធនាំចូលទំនិញពីសហរដ្ឋអាមេរិកវិញ ក្នុងកម្រិត ៩៧% លោកជំទាវ ចម និម្មល បានបញ្ជាក់ដូចនេះថា «នៅក្នុងឆ្នាំ២០២៤ កន្លងមកនេះ នៅក្នុងជញ្ជីងពាណិជ្ជកម្មលើការនាំចូលរបស់ផលិតផលអាមេរិកមកកម្ពុជា ដែលមានបរិមាណប្រហាក់ប្រហែលជិត ៣០០លានដុល្លារនេះ បន្ទាត់ពន្ធខ្ពស់បំផុត ដែលយើងមានទៅលើផលិតផលនាំចូល របស់សហរដ្ឋអាមេរិកមកកម្ពុជា គឺមានត្រឹមតែ ២៩.៤% នោះទេ មានន័យថាទាបជាង ៣៥% ដែលជាបន្ទាត់ពន្ធដែលមានជារួម លើផលិតផលនៃពាណិជ្ជកម្មដៃគូទាំងអស់ផងដែរ»។
ទាក់ទងរឿងអាមេរិកដំឡើងពន្ធរហូតដល់ទៅ៤៩% ដែលការកំណត់ពន្ធនេះកម្ពុជាខ្ពស់ជាងគេ ? លោកជំទាវរដ្ឋមន្ត្រី ពន្យល់ថា ដោយសារតែប្រទេសកម្ពុជា ដូចជាប្រទេសកំពុងអភិវឌ្ឍផ្សេងៗទៀត។ ច្បាស់ណាស់ អាមេរិកមានប្រជាជនប្រមាណជា៣៤០លាននាក់ ខណៈកម្ពុជាមានប្រជាជនប្រមាណជា១៧លាននាក់ គឺសហរដ្ឋអាមេរិកបានក្លាយជាទីផ្សារស្រូបទាញផលិតផលកម្ពុជាច្រើន ខណៈកម្ពុជាបញ្ជាទិញតិច។ ការបញ្ជាទិញច្រើន សបញ្ជាក់ឲ្យឃើញថា កម្ពុជាមានសមត្ថភាពខ្ពស់នៅក្នុងការផលិត ដែលទីផ្សារនៅសហរដ្ឋអាមេរិក ឬសហគមន៍អឺរ៉ុបក្ដី ។
ចំពោះសំណួរថា តើការដំឡើងពន្ធ៤៩% របស់អាមេរិកលើប្រទេសកម្ពុជា តើប៉ះពាល់កម្ពុជាដែរទេ ? លោកជំទាវ ចម និម្មល ពន្យល់ថា ច្បាស់ណាស់ការដំឡើងពន្ធនេះធ្វើឲ្យប៉ះពាល់ដល់ប្រទេសកម្ពុជា។ ប៉ុន្ដែអ្នកប៉ះពាល់ដំបូងគេ គឺអ្នកបញ្ជាទិញ (អាមេរិក) និងអ្នកផលិត (កម្ពុជា) ។
លោកជំទាវ ចម និម្មល ពន្យល់បន្ថែមថា ធម្មតាការដំឡើងពន្ធ ធ្វើឲ្យទំនិញឡើងថ្លៃ ដូច្នេះប៉ះពាល់ដល់អ្នកបញ្ជាទិញ ដែលជាប្រជាជនអាមេរិករងប៉ះពាល់ដំបូងគេ បន្ទាប់មកលើកម្ពុជា និងអ្នកវិនិយោគលើវិស័យសំខាន់ៗ ដូចជាវាយណភណ្ឌ និងសំលៀកបំពាក់ ។
លោកជំទាវ ចម និម្មល បានអំពាវនាវដល់បងប្អូនប្រជាពលរដ្ឋកុំមានការព្រួយបារម្ភ ការងារនេះរាជរដ្ឋាភិបាលបានយកចិត្តទុកដាក់ខ្ពស់ ដើម្បីដោះស្រាយបញ្ហាទាំងនេះ។ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដាក់ចេញនូវវិធានការជាបន្ទាន់ ឲ្យឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ដែលជាប្រធានគោលនយោបាយ និងសេដ្ឋកិច្ច ដឹកនាំកោះប្រជុំជាមួយក្រសួងពាណិជ្ជកម្ម និងក្រសួងពាក់ព័ន្ធ វិស័យឯកជន ដើម្បីប្រមូលធាតុចូល ដាក់ជូនសម្ដេច ដើម្បីឆ្លើយតប និងការជំរុញវិស័យសេដ្ឋកិច្ចកម្ពុជា ។
សូមជម្រាបថា កម្ពុជាបានចូលជាសមាជិក នៃអង្គការពាណិជ្ជកម្មពិភពលោក (WTO) នៅថ្ងៃទី១៣ ខែតុលា ឆ្នាំ២០០៤។ ក្នុងដំណើរការចូលជាសមាជិកនេះ កម្ពុជាបានព្រមព្រៀងធ្វើការបរិវត្តន៍តាមតម្រូវការរបស់ WTO រួមទាំងការកំណត់អត្រាពន្ធគយ (Tariff Binding) ដែលមានកម្រិតខ្ពស់បំផុត (Bound Tariff Rate) ចន្លោះពី ០% ទៅ ៣៥% ៕ រក្សាសិទ្ធដោយ៖សុទ្ធលី
