MTNewsToday និងបណ្តាប្រព័ន្ធផ្សព្វផ្សាយមីយ៉ាន់ម៉ា បានរាយការណ៍ថា ក្រុមអ្នកជួយសង្គ្រោះបានរកឃើញសាកសពនារីវ័យក្មេងរូបស្រស់ស្អាតម្នាក់ កប់នៅក្រោមគំនរបាក់បែកនៃអគារផ្ទះល្វែង Sky Villa នៅទីក្រុង Mandalay ប្រទេសមីយ៉ាន់ម៉ា បន្ទាប់ពីគ្រោះរញ្ជួយដីកាលពីពេលថ្មីៗនេះ ដោយសពរបស់នាងស្ថិតក្នុងសម្លៀកបំពាក់អាវពណ៌ស ខោជើងវែង ខណៈកាបូបលុយកាន់នៅដៃជាប់។
តាមរយៈដំណើរការកំណត់អត្តសញ្ញាណ សពនារីរូបស្អាតនោះ ត្រូវបានកំណត់ច្បាស់ថាគឺនាង Sili Mee ដែលជារាជនីសម្រស់ដែលបានឈ្នះការប្រលងបវរកញ្ញាទេសចរណ៍មីយ៉ាន់ម៉ាក្នុងឆ្នាំ ២០១៨ ។
នាងគឺជាតំណាងប្រទេសមីយ៉ាន់ម៉ា នៅក្នុងកម្មវិធីប្រកួតបវរកញ្ញាទេសចរណ៍ពិភពលោកឆ្នាំ ២០១៨ និងបវរកញ្ញាទេសចរណ៍ពិភពលោកអន្តរទ្វីប ២០១៩ នៅប្រទេសចិន។
អ្នករៀបចំកម្មវិធី Miss Tourism Myanmar បានសូមចូលរួមរំលែកទុក្ខដល់គ្រួសាររបស់នាង និងបញ្ជាក់ព័ត៌មាននេះឲ្យដឹងថា សព Miss Tourism Myanmar 2018 នឹងត្រូវយកទៅទីក្រុង Yangon ហើយបុណ្យសពរបស់នាង នឹងត្រូវធ្វើតាមពិធីសាសនា។
ដំណឹងនេះបានធ្វើឲ្យសង្គមអនឡាញ និងអ្នកគាំទ្ររបស់នាង ស្លុតចិត្តយ៉ាងខ្លាំង។ ក្នុងរូបភាពនៅលើបណ្ដាញសង្គម ធ្វើឲ្យអ្នកគាំទ្រទប់ចិត្តមិនបានទេ ពេលក្រឡេកទៅមើលរូបភាពរបស់ Sili Mee ដ៏ស្រស់ស្អាត និងក្មេងជាងវ័យក្នុងជីវិតប្រចាំថ្ងៃ។ គ្មាននរណានឹកស្មានថា រាជនីសម្រស់ដ៏ក្មេងខ្ចី និងមានទេពកោសល្យដូចជារូបនាង នឹងក្លាយជាជនរងគ្រោះនៃគ្រោះរញ្ជួយដីបែបនេះឡើយ។
យោងតាមព័ត៌មានចុងក្រោយរបស់រដ្ឋាភិបាលមីយ៉ាន់ម៉ា ចំនួនអ្នកស្លាប់ដោយសារគ្រោះរញ្ជួយដីបានឡើងដល់ ២៤៨៧នាក់ ។ មនុស្សជាង ៣២០០ នាក់ បានរងរបួស និងប្រហែល ១៧០ នាក់ កំពុងបាត់ខ្លួននៅឡើយ។
គួរបញ្ជាក់ថា ការរញ្ជួយដីនាពេលថ្មីៗនេះ គឺជាគ្រោះធម្មជាតិដ៏ធ្ងន់ធ្ងរបំផុតមួយ ដែលបានវាយប្រហារប្រទេសមីយ៉ាន់ម៉ា ក្នុងរយៈពេលជាច្រើនឆ្នាំមកនេះ៕
