មន្ត្រីនគរបាលចរាចរណ៍មួយក្រុម បានដាក់គោលដៅត្រួតពិនិត្យអនុវត្តច្បាប់ចរាចរណ៍លើគោក លើផ្លូវកំណាត់ជាតិលេខ៣ ចន្លោះបង្គោលគីឡូម៉ែត្រលេខ២៨-២៩ ស្ថិតក្នុងភូមិព្រៃទទឹង ឃុំត្រពាំងវែង ស្រុកកណ្ដាលស្ទឹង ខេត្តកណ្ដាល ថ្ងៃទី២ ខែមេសា ឆ្នាំ២០២៥, សាច់រឿងដំបូង គឺមន្ត្រីប៉ូលិស២-៣នាក់ បានស្ទុះចេញមកឃាត់រថយន្តម៉ាក Ford Ranger មួយគ្រឿងដែលកំពុងបើកបរត្រឹមត្រូវតាមល្បឿនកំណត់, ពេលនោះ ម្ចាស់រថយន្ត Ford Ranger បានជាន់ហ្រ្វាំងភ្លាមៗ ស្រាប់តែមានរថយន្ដមួយគ្រឿងផ្សេងទៀត បើកមកបុករថយន្ត Ford Ranger ពីក្រោយ , លុះឃើញហេតុការណ៍ប៉ូលិសខ្លួនឯងបញ្ជាឱ្យរថយន្តឈប់ ស្រាប់តែទៅជាគ្រោះថ្នាក់ចរាចរណ៍បែបនេះ មន្ត្រីនគរបាលចរាចរណ៍ដែលជាអ្នកបង្កហេតុនោះ មិនបានទៅវាស់វែងធ្វើកំណត់ហេតុ ដើម្បីរកដំណោះស្រាយឲ្យប្រជាពលរដ្ឋទេ បែរជានាំគ្នាលើក កៅអី បង្គោលសាជី ហើយបើករថយន្តគេចចេញពីគោលដៅអស់តតែម្ដង ធ្វើឱ្យមហាជនងឿងឆ្ងល់ថា ម្ដេចមន្ត្រីនគរបាលចរាចរណ៍ ដែលជាមន្ត្រីនគរបាលជាតិ ធ្វើការលឹបលោ មិនហ៊ានទទួលខុសត្រូវចំពោះទង្វើរបស់ខ្លួនបែបនេះ ?! (ដូចមានបញ្ជាក់ក្នុងរូបភាព) បើយ៉ាងដូច្នេះមែន អ៊ីចឹងមានតែមន្ត្រីក្លែងបន្លំ ?! ហើយបើជាមន្ត្រីក្លែងបន្លំមែន ក្រសួងមហាផ្ទៃ គួរតែមានវិធានការឱ្យសមស្របទៅនឹងការក្បត់ទំនុកចិត្តប្រជាពលរដ្ឋ និងផ្លូវច្បាប់ហើយ ដែលពួកមន្ត្រីទាំងនោះកំពុងតែបំពេញ។
ទង្វើរបស់មន្ត្រីនគរបាលចរាចរណ៍ទាំងនោះ ត្រូវបានមហាជនរិះគន់យ៉ាងខ្លាំងលើបណ្ដាញសង្គមហ្វេសប៊ុក ព្រោះតែមិនទទួលខុសត្រូវលើទង្វើរបស់ខ្លួន គឺរត់គេចចេញពីហេតុការណ៍ដែលពួកខ្លួនបង្ក , ទោះបីជាចប់ម៉ោងរដ្ឋបាលក៏ដោយ ក្នុងនាមជាសមត្ថកិច្ច ក៏ត្រូវតែបំពេញភារកិច្ចអនុវត្តនីតិវិធីច្បាប់ចរាចរណ៍ លើដងផ្លូវជាក់ស្ដែង ដូចជាត្រូវវាស់វែង ធ្វើកំណត់ហេតុ ជូនប្រជាពលរដ្ឋផងដែរ… ម៉េចក៏ត្រូវរត់គេច ?! រូបភាពអាក្រក់ៗបែបនេះ វានឹងដក់ជាប់ក្នុងក្រសែភ្នែក ក៏ដូចជាក្រអៅបេះដូងប្រជាពលរដ្ឋពិបាកនឹងបំភ្លេច។
ពាក់ព័ន្ធនឹងករណីខាងលើ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល បានចេញសេចក្ដីបំភ្លឺព័ត៌មាន ជូនសាធារណជន និងបណ្តាញសារព័ត៌មានជ្រាបថា ពាក់ព័ន្ធទៅនឹងគណនីហ្វេសប៊ុក ឈ្មោះ Lay Kongkea ដែលបានបង្ហោះវីដេអូ សកម្មភាពមន្រ្តីនគរបាលចរាចរណ៍ដាក់គោលដៅអនុវត្តរឹតបន្តឹងច្បាប់ចរាចរណ៍ផ្លូវគោក និងបាននិយាយថា នៅពេលស្ទាក់រថយន្តគាត់ ស្រាប់តែមានបញ្ហា ក៏ចាប់ផ្តើមរើបារាសដោយមិនទាន់ចប់ម៉ោងផង។
ចំពោះករណីនេះ កើតឡើងនៅព្រឹកថ្ងៃទី០២ ខែមេសា ឆ្នាំ២០២៥ ចំណុចផ្លូវជាតិលេខ៣ ចន្លោះបង្គោលគីឡូម៉ែត្រលេខ២៨-២៩ ស្ថិតក្នុងភូមិព្រៃទទឹង ឃុំត្រពាំងវែង ស្រុកកណ្តាលស្ទឹង ខេត្តកណ្តាល។ ជាចំណាត់ការ លោកឧត្តមសេនីយ៍ទោ ស្នងការ បានបញ្ជាកម្លាំងជំនាញចុះស្រាវជ្រាវ ស៊ើបអង្កេត អំពីតួនាទី ភារកិច្ច ទៅលើកម្លាំងនគរបាលចរាចរណ៍ពាក់ព័ន្ធក្នុងការអនុវត្តរឹតបន្តឹងច្បាប់ចរាចរណ៍ផ្លូវគោក នៅគោលដៅនោះហើយ និងថែមទាំងបានសំណូមពរដល់ ម្ចាស់គណនីហ្វេសប៊ុក ឈ្មោះ Lay Kongkea ចូលរួមសហការជាមួយស្នងការដ្ឋាននគរបាលខេត្តកណ្ដាល បំភ្លឺជុំវិញរឿងនេះផងដែរ ដើម្បីមានអង្គហេតុច្បាស់លាស់ឈានទៅអនុវត្តប្រកបដោយតម្លាភាព៕ រក្សាសិទ្ធដោយ៖ពិសិដ្ឋ CEN
