ភ្នំពេញ ៖ ក្នុងលោកនេះ គ្មានសេចក្ដីស្រឡាញ់ឯណាស្មើនឹងមាតាបិតាស្រឡាញ់បីបាច់ថ្នាក់ថ្នមថែទាំកូនស្ងួននោះទេ ដ្បិតម្ដាយឪពុកដែលជាមេគ្រួសារបែកបាក់លែងលះគ្នាតាមផ្លូវច្បាប់ក៏ដោយចុះ ហើយអាជ្ញា បានបែងចែកកូនៗរបស់ពួកគេទៅតាមគោលការណ៍គតិយុត្ត ក៏ពិតមែន ប៉ុន្តែគតិយុត្តយ៉ាងណា ក៏វាធំមិនស្មើនឹងសេចក្ដី ស្រឡាញ់របស់ឪពុកម្ដាយទៅលើកូនៗផងខ្លួននោះទេ, ថាបែបនេះ មិនមែន CEN ចង់ទម្លាក់ទៅលើអង្គច្បាប់លម្អៀងនោះឡើយ ប៉ុន្តែអ្វីដែលលម្អៀងនោះ គឺយើងចង់សំដៅទៅលើ មនោសញ្ចេតនា រវាងឪពុកម្ដាយ និងកូនៗរបស់ពួកគេតែប៉ុណ្ណោះ គឺកាត់ទឹកមិនដាច់ កាត់សាច់មិនបាន នោះឯង។
លោក ឌួង ឆាយ បាននិយាយពាក្យលាគ្នាជាមួយកូនស្រី ក្នុងសំណេរហ្វេសប៊ុក ថា ” ខ្ញុំស្ម័គ្រចិត្តឱ្យកូនស្រីទៅនៅជាមួយម្តាយគេ… ពុក គឺនៅទីនេះ រង់ចាំការពារមើលថែកូនៗជានិច្ច, ពុក នឹងចាំជូនកូនៗដើរលេងជារៀងរាល់ចុងសប្តាហ៍ ថ្ងៃសៅរ៍ និងអាទិត្យ។
អាជ្ញាសាលា នៃសាលាដំបូងរាជធានីភ្នំពេញ នាថ្ងៃទី២ ខែមេសា ឆ្នាំ២០២៥ បានចេញសេចក្ដីជូនដំណឹង ដល់សាធារណជន ជ្រាបថា កាលពីថ្ងៃទី២៦ ខែមីនា ឆ្នាំ២០២៥ អាជ្ញាសាលា បានចេញលិខិតជូនដំណឹង ស្តីពីការអនុវត្ត លេខ ៩៣ ច.ច.អ/២៥ បង្គាប់ឱ្យឈ្មោះ ឌួង ឧត្តមឆវិន (ហៅ ឌួង ឆាយ) ភេទប្រុស សញ្ជាតិខ្មែរ ត្រូវធ្វើការអនុវត្តដោយស្ម័គ្រចិត្ត ប្រគល់កូនស្រី ឈ្មោះ ឌួង រាជនីគុជ កើតថ្ងៃទី២៦ ខែកក្កដា ឆ្នាំ២០១៩ ឱ្យទៅអ្នកស្រី ជេត ម៉ាលីណា សញ្ជាតិខ្មែរ ដែលត្រូវជាម្តាយ និងជាម្ចាស់បំណុលនៃការអនុវត្ត ឬប្រគល់ឱ្យមកអាជ្ញាសាលានៃសាលាដំបូងរាជធានីភ្នំពេញ តាមអំណាច នៃដីកាសម្រេច លេខ ០៨ ក្រVII សអ. ដកស ចុះថ្ងៃទី០៧ ខែមិថុនា ឆ្នាំ២០២៤ របស់សាលាឧទ្ធរណ៍ភ្នំពេញ ឱ្យបានឆាប់រហ័សក្នុងរយៈពេល៧ថ្ងៃ (ប្រាំពីរថ្ងៃ) គិតចាប់ពីថ្ងៃជូនដំណឹងនេះ រហូតដល់ ថ្ងៃទី២ ខែមេសា ឆ្នាំ២០២៥ វេលាម៉ោង ដប់ប្រាំពីរ និងសូន្យនាទី ជាកំហិត។
ក្រោយពីលោក ឌួង ឧត្តមឆវិន (ហៅ ឌួង នាយ) បានទទួលលិខិតជូនដំណឹង ស្តីពីការអនុវត្តខាងលើរួចមក នៅថ្ងៃទី២ ខែមេសា ឆ្នាំ២០២៥ វេលាម៉ោងដប់ប្រាំមួយ និងសែសិបប្រាំនាទី នៅចំពោះមុខអាជ្ញាសាលា ឃើញថា លោក ឌួង ឧត្តមឆវិន (ហៅ ឌួង ឆាយ) បានស្ម័គ្រចិត្តប្រគល់កូនស្រីឈ្មោះ ឌួង រាជនីគុជ ឱ្យទៅអ្នកស្រី ដេត ម៉ាលីណា ដែលត្រូវជាម្តាយ នៅបន្ទប់អាជ្ញាសាលា នៃសាលាដំបូងរាជធានីភ្នំពេញ តាមអំណាចនៃដីកាសម្រេច លេខ ០៨ ក្រVII សអ. ដកស ចុះថ្ងៃទី០៧ ខែមិថុនា ឆ្នាំ២០២៤ របស់សាលាឧទ្ធរណ៍ភ្នំពេញ រួចរាល់ហើយ។
បើតាមការសង្កេតមើលពាក្យពេចន៍ខ្លឹមសារក្នុង អាខោន facebook របស់ លោក ឌួង ឆាយ វិញ បានបង្ហាញពីសេចក្ដីស្រឡាញ់កូនស្រី ឌួង រាជនីគុជ
ដ៏មិនអស់អាល័យ ប៉ុន្តែធ្វើយ៉ាងម៉េច បើផ្លូវច្បាប់ត្រូវតែតម្រូវឱ្យលោកសម្រេចច្បាស់លាស់ជាកំហិតបែបនេះ, លោក ឌួង ឆាយ បាននិយាយពាក្យលាគ្នាជាមួយកូនស្រី ដែលដឹងក្ដីតិចតួចបំផុត ក្នុងសំណេរហ្វេសប៊ុក ថា ” ខ្ញុំស្ម័គ្រចិត្តឱ្យកូនស្រីទៅនៅជាមួយម្តាយគេ, សង្ឃឹមថា កូនៗខ្ញុំ នឹងមានភាពកក់ក្តៅគ្រប់គ្រាន់ និងមានអនាគតល្អជាងពេលរស់នៅជាមួយខ្ញុំ… ពុក គឺនៅទីនេះ រង់ចាំការពារមើលថែកូនៗជានិច្ច។ ពុក នឹងចាំជូនកូនៗដើរលេងជារៀងរាល់ចុងសប្តាហ៍ ថ្ងៃសៅរ៍ និងអាទិត្យ , ពីពុករបស់កូនៗ ឌួង ឆាយ ៕ រក្សាសិទ្ធដោយ៖ពិសិដ្ឋ CEN
