ថ្មីៗនេះ វីដេអូក្មេងស្ទាវ ៣ នាក់ ព្រោះតែចង់ល្បី បាននាំគ្នាបង្ហោះម៉ូតូរឺម៉ក នៅលើដងផ្លូវសាធារណៈដ៏ទំនើង ខណៈស្ថានភាពផ្លូវអ្នកដំណើរកំពុងធ្វើចរាចរព្រោងព្រាត ដោយគ្មានគិតខ្លាចនឹងបង្កគ្រោះថ្នាក់ដល់គេឯងសោះឡើយ ដែលឃើញហើយ ពិតជាគួរឲ្យហួសចិត្តខ្លាំងតែម្តង។
តែក្រោយវីដេអូនេះ ត្រូវបានចែកចាយផ្ទុះពេញបណ្តាញសង្គម ខណៈមហាជនដែលស្អប់ស្នើឲ្យសមត្ថកិច្ច ស្រាវជ្រាវរកពួកក្មេងស្ទាវទាំងនេះ មកលត់ដំ កុំឲ្យបន្តធ្វើសកម្មភាពដ៏ព្រហើន និងគ្រោះថ្នាក់ដល់គេឯង ដែលកំពុងធ្វើដំណើរស្របជាមួយ នៅពេលនេះ ស្ទាវជើងបង្ហោះកង់បីម្នាក់ ត្រូវបានសមត្ថកិច្ចឃាត់ខ្លួន ខណៈ២នាក់ទៀត ដែលជំនួយក្នុងការបង្ហោះ ពុំឃើញវត្តមាននោះទេ។
នេះបើយោងតាមទំព័រហ្វេសប៊ុក អធិការដ្ឋាននគរបាលក្រុងប៉ោយប៉ែត បានឲ្យដឹងថា កម្លាំងប៉ុស្តិ៍នគរបាលរដ្ឋបាលសង្កាត់អូរជ្រៅ និងកម្លាំងប៉ុស្តិ៍នគរបាលរដ្ឋបាលសង្កាត់ប៉ោយប៉ែត
បានចុះស្រាវជ្រាវ និងនាំខ្លួនយុវជនម្នាក់ ដែលជាអ្នកបើកយកមកអប់រំ ណែនាំ កាលពីរសៀលថ្ងៃទី២ ខែមេសា ឆ្នាំ២០២៥ បន្ទាប់ពីបានធ្វើសកម្មភាពបង្ហោះម៉ូតូរ៉ឺម៉កមួយគ្រឿងម៉ាកហុងដាវ៉េវ ពណ៍ក្រហម ពុំមានផ្លាកលេខ ដើម្បីបង្ហោះវីដេអូចង់បានការទាក់ទាញនៅលើបណ្តាញសង្គម។
យុវជនដែលសមត្ថកិច្ចឃាត់ខ្លួននេះ មានឈ្មោះ សុខ ហេង អាយុ១៦ឆ្នាំ មុខរបរកម្មករដឹកជញ្ជូនឥវ៉ាន់ រស់នៅក្នុងភូមិមិត្តភាព សង្កាត់ប៉ោយប៉ែត ក្រុងបោយប៉ែត ខេត្តបន្ទាយមានជ័យ។ ហើយជាមួយគ្នានេះ អធិការដ្ឋាននគរបាលក្រុងប៉ោយប៉ែត ក៏បានកោះហៅអាណាព្យាបាល មកធានាអោយបញ្ឈប់សកម្មភាពបង្ហោះម៉ូតូតាមផ្លូវសាធារណៈបន្តទៀតផងដែរ៕
