ការវាយតប់គ្នាដោយហិង្សារវាងអ្នកដំណើរស្រីពីរនាក់ បានធ្វើឱ្យជើងហោះហើរត្រូវពន្យារពេលពីរម៉ោង គិតចាប់ពីម៉ោងចេញដំណើរ។
ហេតុការណ៍ដ៏ញាក់សាច់នេះ បានកើតឡើងនៅលើជើងហោះហើរ របស់ក្រុមហ៊ុនអាកាសចរណ៍ Shenzhen Airlines ពេលដែលអ្នកដំណើរស្រីម្នាក់ ត្រូវបានចោទប្រកាន់ថា បានខាំអ្នកបម្រើការលើយន្តហោះ បន្ទាប់ពីឈ្លោះប្រកែកគ្នាជាមួយអ្នកដំណើរដទៃ។
យោងតាមគេហទំព័រ NeedToKnow ហេតុការណ៍នេះបានកើតឡើងនៅមុនពេលហោះហើរ ដោយអ្នកដំណើរស្រីពីរនាក់ដែលអង្គុយនៅជួរជាមួយគ្នាផ្នែកខាងស្តាំ បានឈ្លោះប្រកែកគ្នា។ មូលហេតុដំបូង ត្រូវបានគេនិយាយថា ម្នាក់ក្នុងចំណោមស្រ្តីទាំងពីរមានអារម្មណ៍មិនស្រួលជាមួយក្លិនខ្លួន និងទឹកអប់របស់អ្នកនៅក្បែរ។ ភាពតានតឹងបានកើនឡើង រហូតដល់មានវាយតប់គ្នាដែលបង្ខំឱ្យក្រុមនាវិក និងអ្នកដំណើរជុំវិញជួយអន្តរាគមន៍ ដើម្បីគ្រប់គ្រងស្ថានការណ៍។
បុរសពីរនាក់នៅជួរក្រោយ បានព្យាយាមជួយអ្នកបម្រើលើយន្តហោះបញ្ឈប់ការប្រយុទ្ធគ្នា។ ទោះបីជាយ៉ាងណាក៏ដោយ ក្នុងអំឡុងពេលអន្តរាគមន៍ សមាជិកនាវិកម្នាក់ត្រូវបានស្ត្រីម្នាក់ខាំដៃ ចំណែកអ្នកដំណើរម្នាក់ទៀត ក៏ត្រូវកោសខ្យល់ផងដែរ។
ប៉ូលិសបានមកដល់ភ្លាមៗ ហើយបានដកអ្នកដំណើរទាំងពីរចេញពីយន្តហោះ ដើម្បីចាត់ការ។ ហេតុការណ៍នេះបានធ្វើឱ្យជើងហោះហើរត្រូវបានពន្យារពេល២ម៉ោង ពីកាលវិភាគដើមរបស់ខ្លួន។
ជើងហោះហើរនេះគ្រោងនឹងចេញដំណើរពីអាកាសយានដ្ឋានអន្តរជាតិ Shenzhen Bao’an ទៅកាន់អាកាសយានដ្ឋានអន្តរជាតិ Shanghai Hongqiao នៅម៉ោង 5:45 ល្ងាច ប៉ុន្តែត្រូវបានពន្យារពេលរហូតដល់ម៉ោង 7:56 ល្ងាច។
បន្ទាប់ហេតុការណ៍កើតឡើង ក្រុមហ៊ុន Shenzhen Airlines ក៏បានបើកការស៊ើបអង្កេត ដើម្បីបញ្ជាក់ពីករណីបង្កហឹង្សាដាក់គ្នានេះ។ ប៉ុន្តែ ក្រុមហ៊ុនអាកាសចរណ៍ មិនបានធ្វើអត្ថាធិប្បាយជាផ្លូវការលើហេតុការណ៍នេះទេ៕
