ការធ្វើទំនើបកម្មមូលដ្ឋានសមុទ្ររាម កម្ពុជានឹងមានសមត្ថភាពកើនឡើងមួយកម្រិតទៀត ក្នុងការគ្រប់គ្រងសភាពការណ៍ក្នុងដែនសមុទ្រកម្ពុជា

ភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី បានថ្លែងថា ការកសាងឡើងនូវមជ្ឈមណ្ឌលភស្តុភារ និងហ្វឹកហ្វឺនរួមគ្នាកម្ពុជា ចិន-ផែរាម ជាការពង្រឹងហេដ្ឋារចនាសម្ព័ន្ធ នឹងធ្វើទំនើបកម្មពង្រឹងសមត្ថភាពកងទ័ពជើងទឹកកម្ពុជា ដែលធានាដល់កិច្ចការពារជាតិប្រកបដោយប្រសិទ្ធភាព ស្របតាមរដ្ឋធម្មនុញ្ញនៃព្រះរាជាណាចក្រកម្ពុជា។

សម្តេចមហាបវរធិបតី ហ៊ុន ម៉ាណែត បានបញ្ជាក់ថា ការធ្វើទំនើបកម្មមូលដ្ឋានសមុទ្ររាម កម្ពុជានឹងមានសមត្ថភាពកើនឡើងមួយកម្រិតទៀត ក្នុងការគ្រប់គ្រងសភាពការណ៍ក្នុងដែនសមុទ្រកម្ពុជា ដើម្បីបង្ការ ការពារ ទប់ស្កាត់ និងឆ្លើយតបទៅនឹងឧបទ្ទវហេតុនានាបានទាន់ពេលវេលា និងមានប្រសិទ្ធភាព និងមានឱកាសកាន់តែទូលំទូលាយនៅក្នុងកិច្ចសហប្រតិបត្តិការផ្នែកសន្តិសុខលំហសមុទ្រជាមួយដៃគូអន្តរជាតិ និងក្នុងក្របខណ្ឌតំបន់ ស្របតាមគោលនយោបាយជាតិ និងយុទ្ធសាស្ត្រជាតិស្តីពីសន្តិសុខលំហសមុទ្ររបស់កម្ពុជា។

សម្តេចមហាបវរធិបតី ហ៊ុន ម៉ាណែត មានប្រសាសន៍ថាក្នុងនាមជាខ្មែរ ជាអ្នកស្នេហាជាតិពិតប្រាកដ គួរតែមានមោទនភាពសម្រាប់ការធ្វើទំនើបកម្មមូលដ្ឋានសមុទ្ររាម។
សម្តេចមហាបវរធិបតី ហ៊ុន ម៉ាណែត បញ្ជាក់ថារដ្ឋធម្មនុញ្ញ របស់ព្រះរាជាណាចក្រកម្ពុជា មាត្រា៥៣ បានចែងច្បាស់ហើយ ព្រះរាជាណាចក្រកម្ពុជា មិនអនុញ្ញាតឱ្យមានមូលដ្ឋានយោធាបរទេសនៅលើទឹកដីរបស់ខ្លួន។
សម្តេចមហាបវរធិបតី ហ៊ុន ម៉ាណែត ប្រកាសបើកការស្វាគមន៍ប្រទេសជាមិត្តទាំងអស់ មកហ្វឹកហ្វឺននៅមូលដ្ឋានសមុទ្ររាម។

នាយឧត្តមសេនីយ៍ឈុំ សុជាត អ្នកនាំពាក្យ និងជារដ្ឋលេខាធិការក្រសួងការពារជាតិ បានមានប្រសាសន៍ថាបន្ទាប់ពីបានបើកការដ្ឋានសាងសង់អស់រយៈពេលជាង២ឆ្នាំ មជ្ឈមណ្ឌលភស្តុភារ និងហ្វឹកហ្វឺនរួមគ្នាកម្ពុជា-ចិន ផែរាម ត្រូវបានសម្ពោធដាក់ឱ្យប្រើប្រាស់ជាផ្លូវការហើយ នៅព្រឹកថ្ងៃទី៥ ខែមេសា ឆ្នាំ២០២៥ ក្រោមអធិបតីភាពដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។

មជ្ឈមណ្ឌលនេះសាងសង់ឡើង ដើម្បីធានាដល់ការងារពង្រឹងសមត្ថភាព និងការហ្វឹកហ្វឺន រួមគ្នាកងទ័ពកម្ពុជា-ចិន។ កងទ័ពទាំងពីរមានលទ្ធភាពសហការគ្នាលើការប្រឆាំងភេរវកម្មក្នុងតំបន់ ការពារនិងទប់ស្កាត់គ្រោះមហន្តរាយ ការសង្គ្រោះមនុស្សធម៌ និងលំហាត់សមយុទ្ធជាដើម។

ភាគីទាំងពីរធានាឱ្យដំណើរនៃមជ្ឈមណ្ឌលនេះប្រកបទៅបានដោយភាពរលូន។ ការសាងសង់ និងដំណើរការប្រើប្រាស់របស់មជ្ឈមណ្ឌលជា សមិទ្ធផលដែលកើតចេញមកពីការគោរពគ្នាទៅវិញទៅមករវាងប្រទេសទាំងពីរកម្ពុជា-ចិន ស្របតាមច្បាប់ប្រទេស ទាំងពីរពុំមានការគម្រាមកំហែងដល់អ្នកដទៃឬភាគីណាមួយឡើយ។

មជ្ឈមណ្ឌលនេះមានគុណសម្បត្តិក្នុងការពង្រឹងកិច្ចសហប្រតិបត្តិការរវាងកងទ័ពទាំងពីរឱ្យកាន់តែជិតស្និទ្ធថែមមួយកម្រិតទៀត អន្តរជាតិឱ្យកាន់តែប្រសើរឡើង និងផ្តល់សមិទ្ធផលសន្តិសុខសកល៕ រក្សាសិទ្ធដោយ៖សុទ្ធលី