កាលពីពេលថ្មីៗនេះ ហេតុការណ៍មួយដែលបានកើតឡើងនៅទីក្រុង Penang ប្រទេសម៉ាឡេស៊ី បានធ្វើឱ្យសហគមន៍អនឡាញ ផ្ទុះការខឹងសម្បារយ៉ាងខ្លាំង ក្រោយពីបានឃើញបុរសម្នាក់ បានប្រព្រឹត្តទង្វើដ៏ថោកទាប នៅលើជណ្តើរយន្តផ្សារទំនើបមួយកន្លែង ដែលមានមនុស្សកកកុញ។
ជាក់ស្តែង បុរសនោះ ត្រូវបានគេចាប់បានៗ ធ្វើសកម្មភាពលួចថតរូបនៅក្រោមសំពត់របស់នារីម្នាក់ ហើយអ្វីដែលគួរឲ្យហួសចិត្តខ្លាំងបំផុតនោះ គឺបុរសរូបនេះកំពុងនៅជាមួយប្រពន្ធ និងកូន។
ទាក់ទងនឹងករណីនេះ ប្តីប្រពន្ធមួយគូ ដែលជាសាក្សីបានឲ្យដឹងថា ពួកគាត់បានឡើងផ្សារទំនើបមួយកន្លែង ក្នុងទីក្រុង Penang ស្រាប់តែប្រទះឃើញសកម្មភាពលួចថតដ៏សម្ងាត់នេះ។
លោក Su Sern Chie បាននិយាយថា រូបគាត់ និងប្រពន្ធ បានប្រទះឃើញបុរសម្នាក់ ដើរជាមួយប្រពន្ធ និងកូន ប៉ុន្តែនៅតែប្រព្រឹត្តទង្វើដ៏មិនសមរម្យ ដោយលួចថតនារីស្លៀកសំពត់ខ្លី នៅផ្សារបែបនេះ។
រូបភាពដែលចែកចាយនៅលើប្រព័ន្ធផ្សព្វផ្សាយសង្គម បានបង្ហាញបុរសម្នាក់ពាក់អាវពណ៌ស កាន់អ្វីដែលមើលទៅដូចជាទូរស័ព្ទដៃ ដើម្បីលួចថតនារីវ័យក្មេងស្លៀកសំពត់ខ្លី កំពុងស្ថិតនៅលើជណ្តើរយន្ត។
លោក Su បន្ថែមថា គាត់បានព្យាយាមរាយការណ៍ពីហេតុការណ៍នេះទៅបុគ្គលិកសន្តិសុខផ្សារ និងស្វែងរកជំនួយពីប៉ូលីស ប៉ុន្តែពួកគេយឺតក្នុងការឆ្លើយតប និងមិនអាចបញ្ឈប់ជនសង្ស័យបានទេ។
ប្រពន្ធលោក Su អ្នកស្រី Vivian Tan ក៏បាននិយាយថា នាងគឺជាមនុស្សដំបូងគេ ដែលប្រទះឃើញហេតុការណ៍នេះស្តែងៗ។ នាងក៏បានរៀបរាប់ពីហេតុការណ៍ទាំងស្រុងថា នាងបានកត់សម្គាល់ឃើញនារីម្នាក់ស្លៀកសំពត់ខ្លី ត្រូវបានបុរសដើរតាម ប៉ុន្តែសន្មត់ថាពួកគេអាចជាសាច់ញាតិនឹងគ្នា។
ពេលនោះ នារីវ័យក្មេងម្នាក់បានចូលទៅជិតស្ត្រីម្នាក់ ហើយអ្នកទាំងពីរបានឡើងជណ្តើរយន្តជាមួយគ្នា ហើយបុរសនោះក៏បានតាមពីក្រោយយ៉ាងកៀកកិត។
អ្នកស្រី Vivian Tan បានបន្ថែមថា នាងគឺជាមនុស្សដំបូងគេ ដែលរកឃើញហេតុការណ៍នេះ ខណៈកំពុងអង្គុយនៅហាងកាហ្វេក្នុងផ្សារទំនើប។ នាងនិងប្តីបានកំណត់អត្តសញ្ញាណជនរងគ្រោះប្រហែល៤នាក់ ក្នុងហេតុការណ៍នេះ។ ជាមួយទង្វើដ៏គួរឲ្យស្អប់បំផុតនេះ នាងបាននិយាយទាំងកំហឹងថា «គាត់ជាឪពុក ជាប្តី គាត់គួរតែធ្វើជាគំរូល្អដល់កូនរបស់គាត់ ដែលមិនគួរណាប្រព្រឹត្តទង្វើបែបនេះទេ»៕
