នារីជនជាតិចិនម្នាក់ បានធ្វើឲ្យមានការភ្ញាក់ផ្អើលយ៉ាងខ្លាំង បន្ទាប់ពីបានដឹងថា នារីវ័យក្មេងរូបនេះ បានចំណាយប្រាក់ត្រឹមតែជិត ៧ ដុល្លារ ក្នុងមួយខែ ដើម្បីស្នាក់នៅក្នុងបន្ទប់ទឹកការិយាល័យ ព្រោះតែនាងមិនមានលទ្ធភាពជួលនៅខាងក្រៅបាន ខណៈផ្ទះជួលថ្លៃសឹងតែស្មើនឹងប្រាក់ខែរបស់នាង។
យោងតាមប្រភពព័ត៌មានបានឲ្យដឹងថា Yang អាយុ ១៨ ឆ្នាំ បានចំណាយត្រឹមតែ 49 យន់ (ប្រហែល 6.68 ដុល្លារ) ក្នុងមួយខែ ក្នុងនោះរួមមាន (ថ្លៃទឹក ថ្លៃភ្លើង) ដើម្បីស្នាក់នៅក្នុងបង្គន់ កន្លែងធ្វើការរបស់នាង ដែលដាច់ឆ្ងាយពីតម្លៃដែលនាងត្រូវបង់ឲ្យបន្ទប់ជួលក្រៅ ដែលអាចចំណាយអស់ប្រហែល 246 ដុល្លារ ក្នុង១ខែ ឯណោះ។
Yang រកចំណូលបានត្រឹមតែ 369 ដុល្លារ ក្នុងមួយខែ បានបង្ខំឱ្យនាងមកចរចា ជាមួយនិយោជករបស់នាង សុំដេកក្នុងបង្គន់ជាវិធានការសន្សំសំចៃប្រាក់។
ជាមួយទំហំ 6 ម៉ែត្រការ៉េ មានបង្គន់អនាម័យចំនួន ២ និងផើងទឹកមួយ ហេតុដូច្នេះ ដើម្បីធ្វើឱ្យកន្លែងរស់នៅអាចរស់នៅបាន អ្នកស្រី Yang បាននាំយកគ្រែដែលអាចបត់បាន វាំងនន ឧបករណ៍ចម្អិនអាហារ និងទូខោអាវដើម្បី “បង្កើនភាពស្រស់ស្អាត” បន្ទប់របស់នាង។
ចំណែកបុគ្គលិកឯទៀតក្នុងការិយាល័យ ពួកគេបានបន្តប្រើគ្រឿងបរិក្ខារនៅពេលថ្ងៃ ដែល Yang បានសម្អាតរាល់ថ្ងៃ។ ខណៈដែលបន្ទប់គេងរបស់នាង ត្រូវបានមនុស្សគ្រប់ៗគ្នាក្នុងការិយាល័យប្រើរាល់ថ្ងៃ សំនួរសួរថា តើកន្លែងនោះមិនមានក្លិនស្អុយទេ?
យោងតាម Yang បន្ទប់គេងរបស់នាង ហៅថា បង្គន់ គឺគ្មានក្លិននោះទេ។
Yang ដែលរស់នៅទីនោះអស់រយៈពេលមួយខែមកនេះ បាននិយាយថា “ខ្ញុំមិនដែលចាក់សោទ្វារទេ រហូតមកដល់ពេលនេះ ខ្ញុំក៏មិនដែលបាត់បង់របស់របស់ខ្ញុំដែរ”។
ចៅហ្វាយស្រីរបស់ Yang គឺ Xu បានទទួលស្គាល់បញ្ហាប្រឈមនៃអាយុនៅក្មេង និងឯករាជ្យនេះ ដោយនាងសូម្បីតែអនុញ្ញាតឱ្យ Yang ទៅស្នាក់នៅផ្ទះរបស់នាងមួយរយៈផងដែរ។
អ្នកស្រី Xu បាននិយាយថា Yang បានពិចារណាផងដែរក្នុងការរស់នៅក្នុងការិយាល័យដែលមិនបានប្រើប្រាស់ និងបន្ទប់តម្លៃ 54 ដុល្លារ ប៉ុន្តែបានជ្រើសរើសបង្គន់ការិយាល័យ ដោយសារតែការព្រួយបារម្ភអំពីសុវត្ថិភាព និងវាជាកន្លែងធ្វើការស្រាប់, នេះបើយោងតាម South China Morning Post ។
ទោះជាយ៉ាងណា រហូតមកដល់ពេលនេះ អ្នកស្រី Xu មានគម្រោងផ្លាស់ប្តូរ Yang ទៅបន្ទប់ការិយាល័យដែលទើបនឹងជួសជុលថ្មី ដើម្បីឲ្យនាងស្នាក់នៅបានល្អប្រសើរ៕
