បុរសម្នាក់ បានធ្វើឲ្យមនុស្សគ្រប់គ្នា ព្រឺព្រួច និងស្លុតរន្ធត់យ៉ាងខ្លាំង ក្រោយពីបុរសរូបនេះ ត្រូវបានគេប្រទះឃើញកំពុងស្ថិតនៅលើដងស្ទូចដ៏ខ្ពស់ នៃឯអគារដែលកំពុងសាងសង់ នៅក្នុងទីក្រុង Luyang ប្រទេសម៉ាឡេស៊ី។
យោងតាម Harian Metro បុរសនេះដែលមានអាយុ ៤០ ឆ្នាំ ជាកម្មករសំណង់នៅទីនោះ បានអះអាងថា គាត់ពិតជាបានធ្វើរឿងដ៏ចម្លែកនេះដោយមិនដឹងខ្លួន បន្ទាប់ពីភ្ញាក់ពីដំណេកនាពេលព្រឹកព្រលឹម ហើយក៏ស្រាប់តែរកឃើញខ្លួនឯងនៅលើដងស្ទួច កម្ពស់ប្រហែល ១២៦ ម៉ែត្រពីដី បែបនេះតែម្តង។
បុរសជាកម្មករសំណង់រូបនេះ ក្រោយមក បានអះអាងថា បន្ទាប់ភ្ញាក់ពីគេង រូបគាត់ក៏ត្រូវបានអ្នក “ខ្សឹបប្រាប់” មកនាំគាត់ឡើងទៅកាន់ទីនោះដោយមិនដឹងខ្លួន។
ប្រធានស្ថានីយ៍ពន្លត់អគ្គីភ័យ និងជួយសង្គ្រោះ Penampang ជំនួយការមន្ត្រីពន្លត់អគ្គីភ័យជាន់ខ្ពស់ លោក Zeno Tinggalan បាននិយាយថា ពួកគេបានទទួលទូរស័ព្ទសង្គ្រោះបន្ទាន់អំពីឧប្បត្តិហេតុនៅម៉ោង 6:57 ព្រឹកថ្ងៃទី៧ ខែមេសា ឆ្នាំ២០២៥។
លោក Zeno ក៏បានប្រាប់ផងដែរថា ក្រុមដែលមានឧបករណ៍ត្រូវបានបញ្ជូនទៅកន្លែងកើតហេតុ ដែលមានចម្ងាយប្រហែល ៣ គីឡូម៉ែត្រ ពីស្ថានីយពន្លត់អគ្គិភ័យ។
លោក Zeno បានបន្តថា៖ «ពេលទៅដល់ហើយ ក៏បានឃើញបុរសនោះ កំពុងស្ថិតនៅលើចុងស្ទូច ពីខាងលើអគារដែលកំពុងសាងសង់។ បន្ទាប់ពីនិយាយជាមួយគាត់បានប្រហែល៣០នាទី គាត់ក៏ចុះមកដោយខ្លួនឯង ហើយក្រុមសង្គ្រោះក៏បានជួយ» ។
ទោះជាយ៉ាងណា ក្រោយត្រូវបានជួយសង្គ្រោះដោយសុវត្ថិភាព បុរសរូបនេះដែលពុំត្រូវបានរកឃើញមានបញ្ហាសតិអ្វី ត្រូវបានប្រគល់ឱ្យប៉ូលិស ដើម្បីសួរនាំមូលហេតុបន្ថែម៕
