ក្នុងជំនួបទ្វេភាគីមេដឹកនាំកម្ពុជា-ចិន សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោក ស៊ី ជីនពីង ប្រធានាធិបតីចិន បានឯកភាពគ្នាប្រកាសពូនជ្រំចំណងសាមគ្គី ទំនាក់ទំនង និងកិច្ចសហប្រតិបត្តិការរវាងកម្ពុជា-ចិន ឱ្យកាន់តែរឹងមាំថែមទៀត ព្រមទាំងបានឯកភាពកសាងសហគមន៍វាសនារួមកម្ពុជា-ចិន ក្នុងយុគសម័យថ្មីគ្រប់រដូវកាល ជាក់ស្ដែងពេលនេះ គឺបង្កើនពាណិជ្ជកម្ម និងការវិនិយោគកាន់តែមានទំហំ ធំទៅៗ។
ជំនួបពិភាក្សាដែលធ្វើឡើងនាល្ងាចថ្ងៃទី១៧ ខែមេសា ឆ្នាំ២០២៥ សម្ដេច ហ៊ុន ម៉ាណែត និងលោក ស៊ី ជីនពីង បានផ្លាស់ប្តូរឯកសារ ពាក់ព័ន្ធការវិនិយោគ, វិស័យពាណិជ្ជកម្ម, វិស័យអប់រំ, វិស័យហិរញ្ញវត្ថុ, វិស័យព័ត៌មាន, ការងារយុវជន, វិស័យកសិកម្ម, វិស័យសុខាភិបាល, វិស័យធនធានទឹក, វិស័យទេសចរណ៍, វិស័យកិច្ចការនារី និងវិស័យផ្សេងទៀត សរុបចំនួន ៣៧ ឯកសារ។
សម្តេចប្រមុខរាជរដ្ឋាភិបាលកម្ពុជា បញ្ជាក់ថា ជំនួយរបស់មិត្តចិន បានក្លាយជាកម្លាំងចលករយ៉ាងសំខាន់ក្ក្នុងការអភិវឌ្ឍសង្គម-សេដ្ឋកិច្ច, កសាងហេដ្ឋារចនាសម្ព័ន្ធ និងលើកកម្ពស់ជីវភាពប្រជាពលរដ្ឋ, ហើយដំណើរទស្សនកិច្ចរបស់លោកប្រធានាធិបតី ស៊ី ជីនពីង នាពេលនេះ បញ្ជាក់ពីភាពរឹងមាំនៃទំនាក់ទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ដែលជាដៃគូយុទ្ធសាស្ត្រគ្រប់ជ្រុងជ្រោយ និងជាមិត្តដែកថែបកម្ពុជា-ចិន។
គួរបញ្ជាក់ថា នេះជាដំណើរទស្សនកិច្ចផ្លូវរដ្ឋលើកទី២ របស់លោកប្រធានាធិបតី ស៊ី ជីនពីង ដែលកន្លងមក លោកធ្លាប់បានអញ្ជើញមកទស្សនកិច្ចព្រះរាជាណាចក្រកម្ពុជាលើកទី១ កាលពីឆ្នាំ២០១៦ , បើនិយាយពី លោក ស៊ី ជីនពីង ផ្ទាល់ បានសម្ដែងភាពកក់ក្ដៅចំពោះថ្នាក់ដឹកនាំនៃប្រទេសកម្ពុជា ដែលបានស្វាគមន៍រាក់ទាក់យ៉ាងយកចិត្តទុកដាក់ ហើយលោកបានអរគុណចំពោះភាពជិតស្និទ្ធរបស់កម្ពុជា និងការផ្លាស់ប្តូរមិត្តភាពដែលមានរយៈពេលពីរសហស្សវត្សនៃប្រវត្តិសាស្រ្តរវាងប្រទេសទាំងពីរ។
ជាមួយគ្នានេះ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ដែលជាតួអង្គក្នុងការអញ្ជើញលោកប្រធានាធិបតី ស៊ី ជីនពីង មកបំពេញទស្សនកិច្ចផ្លូវរដ្ឋនេះ បានប្រទានពិធីលៀងសាយភោជន៍ផ្លូវរដ្ឋ ជាកិត្តិយសជូនលោក ស៊ី ជីនពីង នៅព្រះបរមរាជវាំង នាល្ងាចថ្ងៃព្រហស្បតិ៍ ទី១៧ មេសា ២០២៥។ គេឃើញពាក្យពេចន៍ខ្លឹមសារក្នុងសេចក្តីប្រកាសព័ត៌មានរបស់ក្រសួងការបរទេសចិន លោកប្រធានាធិបតី ស៊ី ជីនពីង បានថ្លែងថា ខ្ញុំរីករាយណាស់ដែលបានមកលេងប្រទេសកម្ពុជាក្នុងឱកាសបុណ្យចូលឆ្នាំខ្មែរ, សម្រាប់ខ្ញុំ វាមានអារម្មណ៍ថា ដូចបានទៅលេងផ្ទះរបស់មិត្តល្អម្នាក់, ខ្ញុំសូមជូនពរចូលឆ្នាំថ្មីយ៉ាងកក់ក្ដៅបំផុតចំពោះបងប្អូនក្នុងប្រទេសកម្ពុជា។
ជាច្រើនឆ្នាំមកនេះ ចិនជាដៃគូពាណិជ្ជកម្មដ៏ធំបំផុត, ជាប្រភពនៃការវិនិយោគដ៏ធំបំផុត, ជាចង្វាក់ផ្គត់ផ្គង់ធំបំផុត និងកិច្ចសហប្រតិបត្តិការឧស្សាហកម្មធំបំផុតរបស់កម្ពុជា។ យើងមានកិច្ចព្រមព្រៀងពាណិជ្ជកម្មសេរី កម្ពុជា-ចិន ដូច្នេះផលិតផលកសិកម្មលំដាប់ថ្នាក់ខ្ពស់ រួមមាន ចេក ស្វាយ និងមៀន កំពុងចរចានាំចូលទៅប្រទេសចិន។ តំបន់សេដ្ឋកិច្ចពិសេសក្រុងព្រះសីហនុ ដែលត្រូវបានអភិវឌ្ឍតាមរយៈកិច្ចសហប្រតិបត្តិការ កម្ពុជា-ចិន បានទាក់ទាញក្រុមហ៊ុនអន្តរជាតិជាង ២០០ មកបង្កើតប្រតិបត្តិការ ដោយដាក់មូលដ្ឋានរឹងមាំសម្រាប់ទំនើបកម្មឧស្សាហកម្មរបស់កម្ពុជា។
លោក ស៊ី ជីនពីង បានបញ្ជាក់ក្នុងជំនួបសន្ទនាជាមួយសម្ដេចបវរធិបតី ហ៊ុន ម៉ាណែត ថា ក្រៅពីពាណិជ្ជកម្មនិងវិនិយោគ, ចិនប្តេជ្ញាធ្វើកិច្ចសហប្រតិបត្តិការឱ្យកាន់តែស្អិតរមួតជាមួយកម្ពុជា រួមមាន នយោបាយ, សន្តិសុខ ការពារជាតិ , ជំរុញទេសចរចិនកាន់តែច្រើនមកកម្ពុជា បន្តផ្តល់ជំនួយសម្រាប់សកម្មភាពបោសសំអាតមីន បន្តជួយគម្រោងផ្លូវជនបទ ការផ្គត់ផ្គង់ទឹក និងបណ្តាញអគ្គីសនី ព្រមទាំងផ្តល់អាហារូបករណ៍រដ្ឋាភិបាលចិនដល់កម្ពុជា ចំនួន ១.០០០កន្លែងក្នុងរយៈពេល ៣ឆ្នាំ។ ចិននឹងបន្តពង្រឹង និងពង្រីកកិច្ចសហប្រតិបត្តិការគ្រប់វិស័យជាមួយកម្ពុជា ហើយបានគូសបញ្ជាក់ពីការប្តេជ្ញាចិត្តគាំទ្រកម្ពុជាយ៉ាងមុតមាំនៅគ្រប់កាលៈទេសៈ ដើម្បីជួយកម្ពុជាសម្រេចបាននូវចក្ខុវិស័យឆ្នាំ២០៥០ ក្លាយជាប្រទេសមានចំណូលខ្ពស់៕ រក្សាសិទ្ធដោយ៖ពិសិដ្ឋ CEN
