ភ្នំពេញ ៖ នគរបាលចរាចរណ៍ជើងគោករាជធានីភ្នំពេញ បានបញ្ជូនខ្លួនលោក ថន សុវណ្ណារ៉ា អនុប្រធានសុរិយោដីខណ្ឌសែនសុខ ទៅកាន់សាលាដំបូងរាជធានីភ្នំពេញ នៅព្រឹកថ្ងៃទី១០ ខែមិថុនា ឆ្នាំ២០២៥ ដើម្បីប្រគល់ជូនខាងតំណាងអយ្យការចាត់ការតាមច្បាប់ ពាក់ព័ន្ធករណីបើករថយន្តក្នុងស្ថានភាពស្រវឹង ហើយបានបុកអ្នកជិះម៉ូតូបណ្តាលឲ្យនារីស្រស់ស្អាតម្នាក់ស្លាប់។
បើតាមរបាយការណ៍សមត្ថកិច្ចបញ្ជាក់ថា មុនពេលកើតហេតុ គេឃើញនារីស្រស់ស្អាតម្នាក់បានបេីកម៉ូតូ Honda Click ពាក់ផ្លាកលេខ ភ្នំពេញ 1LK-2865 តាមបណ្ដោយផ្លូវហាណូយ-ភ្នំពេញ ក្នុងទិសដៅពីជេីងទៅត្បូង ហើយត្រូវរថយន្តឡង់គ្រីស័រ ពាក់ផ្លាកលេខ រាជការ បើកបរបញ្ច្រាសទិញគ្នា ហើយបានបត់ឆ្វេង បណ្ដាលឲ្យបុកម៉ូតូនារីនោះ ស្លាប់នៅនឹងកន្លែងតែម្ដង។
ក្រោយបុកហើយ អ្នកបើកបរថយន្តឡង់គ្រីស័រ ពាក់ផ្លាកលេខរាជការនោះ បែរជារត់គេចចេញកន្លែងកេីតតែ ហើយក៍ត្រូវបានសមត្ថកិច្ចដេញឃាត់បាន នៅលើផ្លូវ២០១១ ក្នុងសង្កាត់គោកឃ្លាង ខណ្ឌសែនសុខ រាជធានីភ្នំពេញ វេលាម៉ោង១២៖៣៥នាទីរំលងអធ្រាត្រឈានចូល ថ្ងៃទី០៩ ខែមិថុនា ឆ្នាំ២០២៥, សមត្ថកិច្ចរកឃើញថា លោកមន្ត្រីម្នាក់នេះ បើកបរក្នុងស្ថានភាពស្រវឹង។
បន្ទាប់ពីកេីតហេតុ សមត្ថកិច្ចជំនាញចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ធ្វេីការវាស់វែងយកម៉ូតូរួមទាំងរថយន្តទៅរក្សាទុក នឹងប្រគល់សពឱ្យគ្រួសារយកទៅធ្វេីបុណ្យតាមប្រពៃណី, ចំណែក លោក ថន សុវណ្ណារ៉ា អនុប្រធានសុរិយោដីខណ្ឌសែនសុខនោះ ត្រូវបានបញ្ជូនទៅសាលាដំបូងរាជធានីភ្នំពេញ នាព្រឹកថ្ងៃទី១០ ខែមិថុនា ឆ្នាំ២០២៥នេះ ដើម្បីមាននីតិវិធីផ្ដន្ទាទោស៕ រក្សាសិទ្ធដោយ៖ពិសិដ្ឋ CEN
