ភ្នំពេញ ៖ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណ: និងជាប្រធានសហភាពសហព័ន្ធយុវជនកម្ពុជា បានមានប្រសាសន៍ថា ការប្រកួតបាល់ទាត់ពានរង្វាន់ UYFC Soccer League លើកទី៨ ឆ្នាំ២០២៥ បានបិទបញ្ចប់ទៅប្រកបដោយជោគជ័យ ដោយបានរកឃើញជើងឯកទាំង២វិញ្ញាសារ គឺការប្រកួតបាល់ទាត់បុរស និងបាលទាត់នារី។ លើសពីការប្រកួត Soccer League ជាបានអនុញ្ញាតឱ្យអ្នកស្រលាញ់វិស័យកីឡាបាល់ទាត់ និងអ្នកគាំទ្របានបញ្ចេញសមត្ថភាព និងបង្ហាញពីក្តីស្រលាញ់របស់ខ្លួនចំពោះកីឡា។
ជាមួយគ្នានេះដែរ ឯកឧត្តម ហ៊ុន ម៉ានី បានថ្លែងអបអរសាទរជូនចំពោះក្រុមជើងឯក ជើងឯករង និងជ័យលាភីវិញ្ញាសារនានាទាំងអស់ ក្នុងការប្រកួតបាល់ទាត់ពានរង្វាន់ UYFC Soccer League លើកទី៨ ឆ្នាំ២០២៥ទាំងអស់គ្នា និងសូមអរគុណជូនចំពោះគណៈកម្មការរៀបចំ មន្រ្តីបច្ចេកទេស អាជ្ញាកណ្តាល អាជ្ញាធរមានសមត្ថកិច្ច កងកម្លាំងរក្សាសណ្តាប់ធ្នាប់ ក្រុមការងារ យុវជនស្ម័គ្រចិត្ត សិល្បៈករ សល្បៈការិនី ក៏ដូចជាដៃគូសហការ ឧបត្ថម្ភទាំងអស់ដែលបានចូលរួមចំណែក ទាំងកម្លាំងកាយ ចិត្ត និងសម្ភារៈក្នុងការរៀបចំការប្រកួតនាពេលនេះ។ ជាពិសេស អ្វីដែលមិនអាចបំភ្លេចបាននោះ គឺអ្នកគាំទ្រទាំងអស់ដែលបានផ្តល់នូវថាមពលដ៏ខ្លាំងក្លាដល់ការប្រកួត តាមរយៈស្នាមញញឹម សម្រែកហ៊ោរកញ្រ្ជាវដ៏ខ្ញៀវខ្ញារ។
អ្វីដែលយើងចង់លើកកម្ពស់ លើសពីការប្រកួតនោះ គឺស្មារតីកីឡា និងការបង្កើនមិត្តភាព សាមគ្គីភាពរវាងយុវជនតាមរយៈការលេងកីឡា។ នេះគឺជាស្មារតីដែលបានបន្តក្នុងការរៀបចំប្រកួត ចំនួន ៨ លើកកន្លងមកនេះ។ ជួបគ្នា! នៅការប្រកួតពានរង្វាន់ UYFC Soccer League លើកទី៩៕រក្សាសិទ្ធដោយ : សុទ្ធលី
