ភ្នំពេញ ៖ ធនាគារ ស្ថាបនា ចាប់ផ្តើមប្រើប្រាស់ស្លាកសញ្ញាថ្មីរបស់ខ្លួន ចាប់ពីថ្ងៃ២៧ ខែវិច្ឆិកា ឆ្នាំ២០១៧ នេះតទៅ ក្នុងតម្លៃប្រមាណជាង២លានដុល្លារ រយៈពេល៦ខែ នៅទូទាំងប្រទេសដែលមាន១៦៨សាខា តាមសំណើរបស់រាជរដ្ឋាភិបាល ឲ្យមានការផ្លាស់ប្តូរដូចធនាគារផ្សេងៗទៀតផងដែរ។
ក្នុងពិធីសម្ពោធ ស្លាកសញ្ញា (LOGO) ថ្មីរបស់ធនាគារ ស្ថាបនា ដែលនឹងប្រារព្ធឡើង នៅថ្ងៃទី២៧ ខែវិច្ឆិកា ឆ្នាំ២០១៧ នៅការិយាល័យកណ្តាលដែលមានអាសយដ្ឋាន អគារលេខ 83 មហាវិថីព្រះនរោត្តម សង្កាត់ផ្សារថ្មី3 ខណ្ឌដូនពេញ រាជធានីភ្នំពេញ ប្រធាននាយកប្រតិបត្តិរបស់ធនាគារ ស្ថាបនា លោក Kato Norihiko មានប្រសាសន៍ថា ស្លាកសញ្ញាថ្មីនេះឆ្លុះបញ្ចាំងអំពីការបន្តរីកចម្រើន ក៏ដូចជា ការប្តេជ្ញា នាពេលអនាគតរបស់ធនាគារ ក្នុងការក្លាយខ្លួនទៅជាធនាគារពាណិជ្ជ ដែលឈានមុខគេមួយនៅ ក្នុងប្រទេសកម្ពុជា។ ស្លាកសញ្ញាថ្មីនេះ តំណាងឲ្យគុណតម្លៃសំខាន់ៗរបស់ធនាគារស្ថាបនាដែលរួមមាន ភាពរឹងមាំ សុវត្ថិភាព ស្ថេរភាព ភាពជឿជាក់ តម្លាភាព និងការប្តេជ្ញាក្នុង ការផ្តល់ជូនអតិថិជន នូវសេវាប្រកបដោយ គុណភាព និងស្តង់ដាខ្ពស់ ហើយការផ្លាស់ប្តូរនេះ ធ្វើឡើងស្របគោលនយោបាយរបស់រាជរដ្ឋាភិបាលកម្ពុជា ដែលដឹកនាំដោយសម្តេចតេជោ ហ៊ុន សែន។ លោកបន្តថា យើងបានដកស្លាកសញ្ញាចាស់ចេញ ដោយដាក់ស្លាកសញ្ញាថ្មីនេះ និងជាឱកាសមួយដ៏ល្អសម្រាប់ធនាគារស្ថាបនា ក្នុងការណែនាំនូវអត្ថសញ្ញាណថ្មី ជាពិសេសគឺជារួមបញ្ចូលគ្នាមួយនៃធនាគារដ៏រឹងមាំមួយនៅកម្ពុជា និងធនាគារដ៏រឹងមាំមួយនៅជប៉ុន ដែលចាប់ពីថ្ងៃទី១ខែមេសាឆ្នាំ២០១៧ ដែលមានទឹកប្រាក់កម្ចីប្រមាណ៧៥០លានដុល្លារ និងប្រាក់បញ្ញើរ៦៤០លានដុល្លារ។
លោក Kato Norihiko មានប្រសាសន៍ថា “ការដាក់ឲ្យ ប្រើប្រាស់ ស្លាកសញ្ញាថ្មីរបស់យើង គឺជាសញ្ញាបង្ហាញអំពីដំណាក់កាលដ៏សំខាន់ក្នុងផ្លាស់ប្តូរថ្មីមួយរបស់ ធនាគារ ស្ថាបនា ក្នុងការបម្រើជូនអតិថិជនកាន់តែមានភាពទូលំទូលាយជាងមុន តាមរយៈការប្តេជ្ញាចិត្ត ផ្តល់ជូននូវសេវាធនាគារ ដែលប្រកបដោយភាពច្នៃប្រឌិត បច្ចេកវិទ្យា និងការផ្តល់សេវាដែលមានស្តង់ដារ ធនាគារពាណិជ្ជសមស្រប តាមតម្រូវការរបស់ប្រជាជនកម្ពុជា។”
លោកបន្តថា ស្លាកសញ្ញាថ្មីរបស់ធនាគារស្ថាបនាត្រូវបានបង្កើតឡើងដោយរួមបញ្ចូលនូវគោលគំនិតជាច្រើនមានដូចជា ភ្នំហ្វូជី រចនាសម្ព័ន្ធនៃសំបុកឃ្មុំ ប្រអប់ដាក់ប្រាក់សុវត្ថិភាព និងការឆ្លុះបញ្ចាំងអំពីកញ្ចក់បង្អួចពណ៌ផ្ទៃមេឃ របស់ អគារទំនើបស្កឹមស្កៃ។ ពាក្យស្លោករបស់ធនាគារស្ថាបនាគឺ ”ធ្វើអោយជីវិតកាន់តែប្រសើរ” ។ ពាក្យស្លោក នេះ នឹងជម្រុញឲ្យអតិថិជន ប្រើប្រាស់សេវាកម្មធនាគារនិងដើម្បីបើកឱកាសឲ្យពួកគេកាន់តែ ទូលំទូលាយ ក្នុងការ ទទួលបានភាពជោគជ័យតាមរយៈដំណោះស្រាយហិរញ្ញវត្ថុដែលមាននៅគ្រប់បណ្តាញសាខា និង បណ្តាញ ម៉ាស៊ីនអេធីអឹម (ATM) របស់ យើងនៅទូទាំងប្រទេស។ ស្លាកសញ្ញាថ្មីនេះនឹងដាក់ឲ្យប្រើប្រាស់នៅលើរាល់ឯកសារផ្លូវការ និងឯកសារផ្សព្វផ្សាយ ផ្សេងៗរបស់ ធនាគារជាបន្តបន្ទាប់។
ប្រធាននាយកប្រតិបត្តិរបស់ធនាគាររូបនេះ បានបញ្ជាក់ថា ចំណោមធនាគារពាណិជ្ជនាំមុខគេក្នុងព្រះរាជាណាចក្រកម្ពុជា ធនាគារស្ថាបនា ដែលមានទ្រព្យសកម្មលើសពី១ពាន់លានដុល្លាអាមេរិក គិតត្រឹមថ្ងៃទី៣០ ខែកញ្ញា ឆ្នាំ២០១៧ (មុនការធ្វើសវនកម្ម)។ ជាមួយនឹងសាខាសរុបចំនួន១៦៨ ម៉ាស៊ីនអេធីអឹម(ATM)ចំនួន១០០ និងបុគ្គលិកជាង ៤.០០០នាក់ ធនាគារ ស្ថាបនា ផ្តល់នូវសេវាធនាគារដ៏ពេញលេញរួមមាន សេវាប្រាក់កម្ចី ផលិតផលប្រាក់បញ្ញើ សេវាផ្ទេរប្រាក់ក្នុងនិង ក្រៅស្រុក លិខិតធានា ការទូទាត់លើការនាំចេញនិងនាំចូល និងសេវាផ្សេងៗទៀត៕ ដោយ៖កូឡាប
