ភ្នំពេញ៖តបតាមការអំពាវនាវរបស់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានក្រុមប្រឹក្សាភិបាល សមាគមគ្រូពេទ្យស្ម័គ្រចិត្តយុវជនសម្ដេចតេជោ ( TYDA ) ឯកឧត្ដមឃួង ស្រេង អភិបាល នៃគណៈអភិបាលរាជធានីភ្នំពេញ រួមជាមួយមន្ត្រីរដ្ឋបាលរាជធានីភ្នំពេញមួយចំនួនទៀតនារសៀលថ្ងៃសុក្រ ទី២៥ កក្កដា ២០២៥នេះ បានស្ម័គ្រចិត្តអញ្ជើញមកបរិច្ចាគឈាមមនុស្សធម៌នៅមជ្ឈមណ្ឌលកោះពេជ្រ ក្រោមការរៀបចំដោយសមាគមគ្រូពេទ្យស្ម័គ្រចិត្តយុវជនសម្ដេចតេជោ ( TYDA ) ដើម្បីយកឈាមទាំងនេះទៅបម្រេីដល់សេចក្តីត្រូវការជាប្រចាំក្នុងការសង្គ្រោះជីវិតដែលទទួលគ្រោះថ្នាក់ ឬអ្នកជំងឺដែលកំពុងសម្រាកព្យាបាលនិងដើម្បីត្រៀមបម្រុងសម្រាប់វីរកងទ័ពជួរមុខ ឬប្រជាពលរដ្ឋ ដែលរងគ្រោះដោយសង្គ្រាមឈ្លានពានទឹកដីនៅទិសខេត្តឧត្តរមានជ័យ និងខេត្តព្រះវិហារ។
ឯកឧត្ដមឃួង ស្រេងបានមានប្រសាសន៍ថា៖នេះជាលើកទីមួយហើយ ដែលលោកបានឃើញប្រជាពលរដ្ឋយ៉ាងច្រើនកុះករ នាំគ្នាសម្រុកមកផ្ដល់ឈាម ដើម្បីយកឈាមទាំងនេះទៅបម្រេីដល់សេចក្តីត្រូវការជាប្រចាំក្នុងការសង្គ្រោះជីវិតដែលទទួលគ្រោះថ្នាក់ ឬអ្នកជំងឺដែលកំពុងសម្រាកព្យាបាលនិងដើម្បីត្រៀមបម្រុងសម្រាប់វីរកងទ័ពជួរមុខ ឬប្រជាពលរដ្ឋ ដែលរងគ្រោះដោយសង្គ្រាមឈ្លានពានទឹកដី។ នេះជាមោទនភាព មួយបង្ហាញពីស្មារតីស្នេហាជាតិជាធ្លុងមួយ ក្រោមការដឹកនាំរបស់សម្ដេចអគ្គមហាសេនាបតីតេជោហ៊ុន សែន អតីតនាយករដ្ឋមន្ត្រីនិងបន្តមកសម្តេចបវរមហាធិបតី ហ៊ុន ម៉ាណែត ជានាយកដ្ឋមន្ត្រីនាពេលបច្ចុប្បន្ន។
ឯកឧត្ដមឃួង ស្រេងបានបន្តទៀតថា៖ រាជធានីភ្នំពេញបានចងសម្ព័ន្ធមន្ត្រីភាពជាមួយនឹងកងទ័ពជួរមុខរបស់យើង ដោយតែងតែជួយឧបត្ថមទាំងថវិកាសម្ភារៈនិងម្ហូបអាហារដល់ទាហានជួរមុខរបស់យើងរហូតកន្លងមក។ វីរកងទ័ពជួរមុខរបស់យើងជាសរសរគ្រឹះការពារទឹកដីដ៏រឹងមាំ ដោយពួកគាត់បានលះបង់ កម្លាំងកាយចិត្តព្រមទាំងអាយុជីវិត ដើម្បីការពារទឹកដីរបស់យើង។
ឯកឧត្ដមឃួង ស្រេងបន្តថា៖ សម្រាប់យើងជាអ្នកនៅសមរភូមិក្រោយ សូមលើកទឹកចិត្តដល់កងទ័ពជួរមុខ របស់យើង។ កងទ័ពជួរមុខរបស់យើងមិននៅឯកោរនោះទេ គឺមានរដ្ឋបាលរាជធានីភ្នំពេញ និងប្រជាពលរដ្ឋកម្ពុជារាប់លាននាក់ បាននិងកំពុងផ្ដល់នូវការលើកទឹកចិត្តនិងផ្ដល់ជាស្បៀងអាហារ មិនខ្វះខាតឡើយ និងសូមជូនពរឲ្យកងទ័ពជួរមុខរបស់យើង ជួបតែជ័យជំនះឈ្នះពីសត្រូវឈ្លានពាន។
សកម្មភាពនេះត្រូវបានរៀបចំដោយសមាគមគ្រូពេទ្យស្ម័គ្រចិត្តយុវជនសម្ដេចតេជោ ( TYDA ) ដឹកនាំដោយឯកឧត្តមឧបនាយករដ្ឋមន្ត្រី ហ៊ុន ម៉ានី តំណាងដ៏ខ្ពង់ខ្ពស់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានក្រុមប្រឹក្សាភិបាល។គោលបំណងសំខាន់នៃការបង្កើតឱ្យមានពិធីបរិចាកឈាមដោយស្ម័គ្រចិត្តខាងលើនេះ មានចំនួន២ គឺ៖១/ បម្រេីដល់សេចក្តីត្រូវការជាប្រចាំក្នុងការសង្គ្រោះជីវិតដែលទទួលគ្រោះថ្នាក់ ឬអ្នកជំងឺដែលកំពុងសម្រាកព្យាបាល ហេីយមានតម្រូវការឈាមជាបន្ទាន់២/ ត្រៀមបម្រុងសម្រាប់វីរកងទ័ពជួរមុខ ឬប្រជាពលរដ្ឋ ក្នុងករណីដែលទទួលរងរបួស ឬគ្រោះថ្នាក់ដោយសារសង្គ្រាមឈ្លានពានទឹកដីនៅទិសខេត្តឧត្តរមានជ័យ និងខេត្តព្រះវិហារ។
ឈរលេីគោលបំណងសំខាន់ ២ខាងលេី ពិធីបរិច្ចាគឈាមមនុស្សធម៌ពេលនេះ គឺធ្វេីឡេីងដេីម្បីត្រៀមបង្ការផង និងយោងលេីសេចក្តីត្រូវការផងសម្រាប់តម្រូវការឈាមជាទូទៅ និងចំពោះសភាពការណ៍វិវត្តជាក់ស្តែង ដែលអាចនឹងមានតម្រូវការសង្គ្រោះជីវិត ចំពោះបងប្អូនវីរកងទ័ពជួរមុខ និងបងប្អូនប្រជាពលរដ្ឋនៃតំបន់ប្រឈមនឹងសង្គ្រាមឈ្លានពាន ហេីយអាចនឹងបង្កគ្រោះថ្នាក់ផ្សេងៗ ទាមទារឱ្យមានតម្រូវការឈាមជាចាំបាច់ក្នុងការសង្គ្រោះ ឬអាចនឹងសម្រាប់បំពេញតាមសេចក្តីត្រូវការឈាមជាបន្ទាន់ណាមួយរបស់គ្រូពេទ្យ ព្រោះ “ឈាមជាជីវិត“៕រក្សាសិទ្ធដោយ៖សុទ្ធលី
