រាជធានីភ្នំពេញ៖ ជនជាតិចិននិងខ្មែរចំនួន៥នាក់ ត្រូវបានកម្លាំងនគរបាលព្រហ្មទណ្ឌកំរិតស្រាលនៃស្នងការដ្ឋាននគរបាលរាជធានីភ្នំពេញសហការជាមួយអធិការដ្ឋានខណ្ឌពោធិសែនជ័យ ធ្វើការឃាត់ខ្លួន បន្ទាប់ពីធ្វើសកម្មភាពចាប់ឃុំឃាំង និងបង្ខាំងជនជាតិចិននៅក្នុងផ្ទះសំណាក់លឹមហេង ។
ជនសង្ស័យទាំង៥នាក់ ដែលត្រូវ បានសមត្ថកិច្ចឃាត់ខ្លួនមាន ៖ទី១៖ ឈ្មោះ CAO ZHI PENG ភេទប្រុស អាយុ៤៤ ឆ្នាំ ជនជាតិចិនគ្មានលិខិតឆ្លងដែន។ ទី២៖ ឈ្មោះ ZHANG XUESHUANG ភេទប្រុស អាយុ៣៩ ឆ្នាំ ជនជាតិចិន គ្មានលិខិតឆ្លងដែន។ ទី៣៖ ឈ្មោះ ផេង ចន្ទតារា ភេទប្រុស អាយុ៥៣ឆ្នាំ ជនជាតិខ្មែរ។ ទី៤៖ ឈ្មោះ ម៉េង ហួត ភេទប្រុស អាយុ២៦ឆ្នាំ ជនជាតិខ្មែរ និង៥៖ឈ្មោះ តាំង លីម៉ី ភេទស្រី អាយុ៤៣ឆ្នាំ ជនជាតិខ្មែរ។
ចំណែកជនរងគ្រោះ SUN MENG ភេទប្រុស អាយុ៣៥ឆ្នាំ ជនជាតិចិន គ្មានលិខិតឆ្លងដែន។
នគរបាលការិយាល័យព្រហ្មទណ្ឌកំរិតស្រាលនៃស្នងការនគរបាលរាជធានីភ្នំពេញបានឲ្យដឹងថា៖ ដោយទទួលបានបញ្ជាដឹកនាំដ៏ខ្ពង់ខ្ពស់ពីឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ និងលោកឧត្តមសេនីយ៍ត្រី ប៊ុន សត្យា ស្នងការរងទទួលផែនការងារនគរបាលព្រហ្មទណ្ឌ និងលោកឧត្តមសេនីយ៍ទោ លី ប៊ុនអេង ស្នងការរងទទួលដឹកនាំការិយាល័យ និងមានការដឹកនាំបញ្ជាផ្ទាល់ដោយលោករវសេនីយ៍ឯក ម៉ម សាវន នាយការិយាល័យនគរបាលព្រហ្មទណ្ឌកំរិតស្រាល ទើបបានជំនាញបានសហការជាមួយអធិការដ្ឋានខណ្ឌពោធិ៍សែនជ័យ បានឃាត់ខ្លួនជនសង្ស័យចំនួន៥នាក់ កាលពីវេលាម៉ោង១២និង២០នាទីរំលងអធ្រាត្រចូលថ្ងៃទី០៣ ខែសីហា ឆ្នាំ២០២៥ នៅចំណុចបន្ទប់លេខ២០២ ផ្ទះសំណាក់លឹមហេង ភូមិជ្រៃកោង សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ ដោយពាក់ពន្ធ័នឹងចាប់ឃុំឃាំង និងបង្ខាំងដោយខុសច្បាប់ ប្រព្រឹត្តនៅបន្ទប់លេខ២០២ ផ្ទះសំណាក់លឹមហេង ។
នគរបាលបានឲ្យដឹងទៀតថា៖ បន្ទាប់ពីឃាត់ខ្លួនជនសង្ស័យនិងជនរងគ្រោះត្រូវបានអធិការដ្ឋានខណ្ឌពោធិ៍សែនជ័យប្រគល់ ទៅឲ្យការិយាល័យព្រហ្មទណ្ឌ កំរិតស្រាលដើម្បីសាកសួរនិងចាត់ការបន្តតាមនីតិវិធីច្បាប់៕ រក្សាសិទ្ធដោយ៖សុទ្ធលី
