ភ្នំពេញ : លោកជំទាវឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ បានថ្លែងថា ៖«កម្ពុជានៅតែបន្តអំពាវនាវឱ្យភាគីថៃ អនុវត្តតាមកិច្ចព្រមព្រៀងដោយស្មោះត្រង់ និងប្រគល់ឱ្យកម្ពុជាវិញនូវ យោធិនទាំង១៨រូប ដែលត្រូវភាគីថៃចាប់ខ្លួនដោយខុសច្បាប់ ក្រោយបទឈប់បាញ់ចូលជាធរមាន។ ការចាប់ដោយខុសច្បាប់នេះ គិតរហូតមកដល់ថ្ងៃនេះ មានរយៈពេល១៤ថ្ងៃ»។
លោកជំទាវ បានថ្លែងក្នុងសន្និសីទសារព័ត៌មនសេចក្តីសង្ខេបព័ត៌មានប្រចាំថ្ងៃ ស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នៅថ្ងៃទី១២ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី។
លោកជំទាវអ្នកនាំពាក្យក្រសួងការពារជាតិ បានអះអាងថា ៖ កម្ពុជាបន្តទាមទារឱ្យភា គីថៃដោះលែងកងកម្លាំងកម្ពុជា១៨រូបដែលស្ថិតក្រោមការគ្រប់គ្រងរបស់ថៃចំនួន១៤ថ្ងៃហើយរហូតមកដល់ថ្ងៃទី១២សីហានេះនិងបញ្ជាក់គោលជំហរឥតងាករេចំពោះកិច្ចព្រមព្រៀងបទឈប់បាញ់។
លោកជំទាវឧត្តមសេនីយ៍ឯក បានថ្លែងបន្តថា ប្រសិនភាគីម្ខាងមានបំណងជួយសង្គ្រោះ និងបញ្ជូនទៅព្យាបាលនូវទាហាន ឬជនស៊ីវិលរងរបួសរបស់ខ្លួនដែលមិនស្ថិតនៅក្រោមគ្រប់គ្រងរបស់ភាគីម្ខាងទៀត នោះភាគីម្ខាងទៀតដែលទទួលការព្យាបាលអាចពិចារណាធ្វើការឆ្លើយតបដោយផ្អែកលើសមត្ថភាពនៃមណ្ឌលផ្តល់សេវាផ្នែកវេជ្ជសាស្ត្ររបស់ខ្លួន រួមមានសម្ភារៈ បុគ្គលិកពេទ្យ ឬក្រោមសីលធម៌វេជ្ជសាស្ត្រ ដែលអាស្រ័យទៅតាមករណីជាក់ស្តែងនីមួយៗ ហើយទាហានដែលត្រូវចាប់ខ្លួន ត្រូវធ្វើការដោះលែង និងធ្វើមាតុភូមិនិវត្តន៍ភ្លាមៗ ក្រោយសកម្មភាពអរិភាពត្រូវបានបញ្ចប់ស្របមាត្រា១១៨ នៃអនុសញ្ញាទីក្រុងហ្សឺណែវទី៣ ឆ្នាំ១៩៤៩ និងវិធានការណ៍ទី១២៨អេ នៃទំនៀមទន្លាប់មនុស្សធម៌អន្តរជាតិ ភាគីទាំងពីរបានឯកភាពគ្នាផ្លាស់ប្តូរព័ត៌មាន និងសម្របសម្រួលក្នុងការប្រគល់សាកសពមកវិញឱ្យបានឆាប់រហ័ស និងប្រកបដោយភាពថ្លៃថ្នូរ នៅទីតាំងដែលបានព្រមព្រៀងគ្នាដោយអនុលោមតាមគោលដៅមនុស្សធម៌ និងដែនសមត្ថកិច្ចដោយមិនឆ្លងព្រំដែនឡើយ។ ហើយត្រូវធានាថាត្រូវចាត់វិធានការណ៍សមស្រប ដើម្បីកំណត់អត្តសញ្ញាណ និងចាត់ចែងសាកសពប្រកបដោយក្តីគោរព និងលក្ខខណ្ឌអនាម័យត្រឹមត្រូវ ដើម្បីចៀសវាងកុំឱ្យសាកសពណាមួយត្រូវបានបោះបង់ ឬទុកចោល។
លោកជំទាវឧត្តមសេនីយ៍ឯក ម៉ាលី សុជាតា បានថ្លែងថា សភាពការណ៍នៅតាមបន្ទាត់ព្រំដែនខេត្តព្រះវិហារ និងខេត្តបន្ទាយមានជ័យ បន្តមានភាព ស្ងប់ស្ងាត់តែកម្លាំងកម្ពុជានៅតែបន្តត្រៀមយ៉ាងប្រុងប្រយ័ត្នជានិច្ច ខណៈទាហានថៃបានធ្វើការ ដាក់លួសបន្លានៅក្នុងទឹកដីខ្លួន។
លោកជំទាវឧត្តមសេនីយ៍ឯក ម៉ាលី សុជាតា បានលើកឡើងថា ចាប់ពីម៉ោង១២ រំលងអធ្រាត្ររហូតមកដល់ ម៉ោង៦ព្រឹកនេះ ស្ថានភាពសភាពការណ៍នៅតាមបណ្តោយបន្ទាត់ព្រំដែន ទិសខេត្តព្រះវិ ហារ និងខេត្តឧត្តរមានជ័យ បន្តមានស្ងប់ស្ងាត់តែកងទ័ពកម្ពុជានៅតែត្រៀមយ៉ាងប្រុងប្រយ័ត្នខ្ពស់និងប្រកាន់តួនាទីជានិច្ច។លោកជំទាវអ្នកនាំពាក្យបានបន្តថា តាមកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ កាលពីថ្ងៃទី០៧ ខែសីហា ឆ្នាំ២០២៥ នៅប្រទេសម៉ាឡេស៊ីបានបង្ហាញពីការតាំងចិត្ត រួមរបស់ភាគីទាំងពីរក្នុងការសហការគ្នា ដើម្បីជំរុញឱ្យសន្តិភាពយូរអង្វែង ស្ថិរភាព កិច្ចសហប្រតិបត្តិការ និងការអភិវឌ្ឍ ដើម្បីផលប្រយោជន៍របស់ប្រទេសទាំងពីរ។ ដូច្នេះ ប្រទេសទាំងពីរត្រូវបង្ហាឆន្ទៈ និងការប្តេជ្ញាចិត្តស្របនឹងអ្វីដែល បានឯកភាពគ្នា។
លោកជំទាវឧត្តមសេនីយ៍ឯកបានលើកឡើងថា ភាគីទាំងពីរបានគោរពច្បាប់មនុស្សធម៌អន្តរជាតិ ក្នុងការប្រព្រឹត្តចំពោះទាហាន ដែលត្រូវបានចាប់ខ្លួនរួមមាន ការផ្តល់ការរស់នៅ ផ្តល់ម្ហូបអាហារ ការថែទាំសុខភាព ក្នុងករណីមានរបួស ៕ រក្សាសិទ្ធដោយ: សុទ្ធលី
