ខេត្តព្រៃវែង៖ កាលពីថ្ងៃទី១៧ ខែសីហា ឆ្នាំ ២០២៥ ក្រុមការងារក្រសួងអប់រំ យុវជន និងកីឡា ដឹកនាំដោយ លោក សារី ពៅ អគ្គាធិការរងនៃអគ្គាធិការដ្ឋាន ក្រសួងអប់រំ យុវជន និងកីឡា បានទៅដល់ស្រុកមេសាង ខេត្តព្រៃវែង និងបានជួបប្រជុំជាមួយលោកអភិបាលស្រុក លោកប្រធានការិយាអប់រំ យុវជន និងកីឡា នៃរដ្ឋបាលស្រុក លោកអធិការស្រុក លោកប្រធានមន្ទីរអប់រំ យុវជន និងកីឡាខេត្តព្រៃវែង លោកនាយកសាលា មេឃុំ និងលោកគ្រូ អ្នកគ្រូ ដើម្បីពិនិត្យ និងប្រមូលព័ត៌មានលើករណីលោក គា ឌឿន គ្រូបង្រៀននៅសាលាបឋមសិក្សាចន្រ្ទារស្មីសាមគ្គី ដែលបានប្រើអំពើហិង្សាដល់សិស្ស កាលពីថ្ងៃទី១៥ ខែសីហា ឆ្នាំ ២០២៥កន្លងទៅ។
គួរបញ្ជាក់ដែរថា សមាសភាពចូលរួមក្នុងដំណើរការប្រមូលព័ត៌មានករណីនេះ រួមមាន ក្រុមការងារក្រសួងអប់រំ យុវជន និងកីឡា ប្រធានមន្ទីរអប់រំ យុវជន និងកីឡាខេត្តព្រៃវែង, អភិបាលនៃគណៈអភិបាលស្រុកមេសាង, ប្រធានការិយាល័យអប់រំ យុវជន និងកីឡានៃរដ្ឋបាលស្រុកមេសាង, នាយកសាលាបឋមសិក្សាចន្ទ្រារស្មីកុមារ, លោកអធិការនៃអធិការនគរបាលស្រុកមេសាង និងលោកគ្រូ អ្នកគ្រូនៃកម្រងស្វាយជ្រុំ ស្រុកមេសាង។
បន្ទាប់ពីបានពិនិត្យពិភាក្សាប្រមូលព័ត៌មានយ៉ាងល្អិតល្អន់ជុំវិញករណីហិង្សានេះ កិច្ចប្រជុំសម្រេចបានលទ្ធផល ដូចជា៖
(១) លោក គា ឌឿន គ្រូបង្រៀននៅសាលាបឋមសិក្សាចន្ទ្រារស្មីសាមគ្គី ពិតជាបានយកជើងទាត់សិស្សស្រីប្រាកដមែន ប៉ុន្តែដោយអចេតនា គឺក្នុងគោលបំណងចង់ពង្រឹងវិន័យ និងចង់ឱ្យសិស្សចេះ។ បច្ចុប្បន្ន លោក គា ឌឿន ត្រូវបានឃាត់ខ្លួននៅអធិការដ្ឋាននគរបាលស្រុកមេសាង។
(២) តាមមតិលើកឡើងរបស់លោកគ្រូ អ្នកគ្រូ នៅកម្រងស្វាយជ្រុំ ស្រុកមេសាង ចំនួន ៣៦នាក់ ដែលបានមកជួបក្រុមការងារក្រសួង ប្រធានមន្ទីរអប់រំ យុវជន និងកីឡាខេត្ត និងអភិបាលស្រុក ស្នើសុំឱ្យជួយដោះស្រាយដើម្បីឱ្យលោកគ្រូ គា ឌឿន បានបង្រៀនវិញ ដោយបានបញ្ជាក់ថា លោកគ្រូ គា ឌឿន ជាគ្រូមានប្រវត្តិធ្លាប់បង្រៀនគណិតវិទ្យាឱ្យសិស្សទទួលបាននិទ្ទេសល្អ ហើយគាត់មិនដែលមានបញ្ហាជាមួយគ្រូ សិស្ស និងសហគមន៍ពីមុនមកទេ។
(៣) ក្រុមគ្រួសារសិស្សរងគ្រោះបានសុខចិត្តមិនប្ដឹង និងបានសំណូមពរលោកអធិការស្រុក ដោះលែងលោកគ្រូ គា ឌឿន ឱ្យវិលត្រឡប់ទៅមូលដ្ឋានដើម្បីបានបង្រៀនសិស្សឡើងវិញ ដោយត្រូវធ្វើកិច្ចសន្យាយល់ព្រមទទួលកំហុស និងឈប់ប្រព្រឹត្តហិង្សាបែបនេះទៀតនៅថ្ងៃមុខ។
(៤) បើទោះបីជាមានការធ្វើកិច្ចសន្យា ក្រសួងអប់រំ យុវជន និងកីឡា និងបន្តពិនិត្យដើម្បីចាត់វិធានការរដ្ឋបាល ឬទណ្ឌកម្មរដ្ឋបាលលើលោកគ្រូ គា ឌឿន ដើម្បីបង្ការកើតមានរឿងបែបនេះនាថ្ងៃខាងមុខ ហើយនេះក៏ជាការពញ្ញាក់ស្មារតីដល់លោកគ្រូ អ្នកគ្រូដទៃទៀតឱ្យយកចិត្តទុកដាក់អនុវត្តឱ្យបានខ្ជាប់ខ្ជួននូវក្រមសីលធម៌គ្រូបង្រៀន។
ក្រសួងអប់រំ យុវជន និងកីឡា នឹងបន្តពង្រឹងការផ្សព្វផ្សាយអនុក្រឹត្យស្តីពីក្រមសីលធម៌គ្រូបង្រៀនឱ្យបានទូលំទូលាយ និងកាត់បន្ថយភាពអសកម្ម និងបាតុភាពនានា៕រក្សាសិទ្ធដោយ៖សុទ្ធលី
