កំពង់ស្ពឺ៖ ដោយអនុវត្ដតាមការដឹកនាំបញ្ជាដ៏ខ្ពង់ខ្ពស់ពី លោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ លោកវរសេនីយ៍ឯក ចន សុភីត អធិការនគរបាលស្រុកបសេដ្ឋ បានដឹកនាំប្រតិបត្ដិការចុះស្រាវជ្រាវករណីកំហែងធាក់យកម៉ូតូដោយមានកាំបិតផ្គាក់ នៅយប់ថ្ងៃទី១៩.៨.២០២៥ វេលាម៉ោង ២០.៣០នាទី ចំណុចលើផ្លូវជាតិលេខ៣ គីឡូម៉ែត្រលេខ ៥៩.៦០ ស្ថិតក្នុងភូមិត្រពាំងទំនាប់ ឃុំទួលអំពិល ស្រុកបសេដ្ឋ ខេត្តកំពង់ស្ពឺ ។
យោងតាមដំណេីរអង្គហេតុមានជនសង្ស័យមិនស្គាល់អត្តសញ្ញាណ១ក្រុមជិះម៉ូតូម៉ាកហុងដាC125 ពណ៌ខ្មៅ មិនស្គាល់ស្លាកលេខ តាមពីក្រោយជនរងគ្រោះឈ្មោះ អំ ចាន់ដេត ភេទប្រុស អាយុ១៨ឆ្នាំ រស់នៅភូមិព្រៃខ្លា ឃុំទួលអំពិល ស្រុកបសេដ្ឋ ជិះម៉ូតូម៉ាកហុងដាC125ឆ្នាំ២០២៥ ពណ៌ខ្មៅ ផ្លាកលេខភ្នំពេញ 1LJ-0778 បានធ្វើសកម្មភាពធាក់ជនរងគ្រោះ១ជើងបណ្ដាលអោយដួលរបួសដៃនិងជើងរួចក្រុមជនសង្ស័យបានលើកម៉ូតូជិះគេចខ្លួនទៅទិសខាងត្បូងបាត់ ។
ក្រោយប្រតិបត្ដិការសមត្ថកិច្ចបានអន្ដរាគមន៍ភ្លាមៗបានឃេីញជនសង្ស័យឈ្មោះ សួង ផុន ប្រុស២២ឆ្នាំ រស់នៅភូមិព្រៃស្រូល ឃុំពោធិអង្រ្កង ស្រុកបសេដ្ឋ បានរត់ចោលម៉ូតូ និងបន្សល់ទុកកាំបិតផ្គាក់២ដើមលុះដល់ថ្ងៃទី២៨.០៨.២០២៥ កំលាំងជំនាញបានឈានដល់ធ្វើការឃាត់ខ្លួនជនសង្ស័យ(សួងផុន)មកសួរនាំដើម្បីចាត់ការតាមនីតិវិធី ។
សូមបញ្ជាក់ថា ជនសង្ស័យខាងលេីក៏ជាមុខសញ្ញាមានដីកាបង្គាប់ឲ្យចាប់ខ្លួនផងដែរ ដែលចាំបាច់បេីសមត្ថកិច្ចចាប់បាន ត្រូវតែបញ្ជូនជនត្រូវចោទនេះទៅចំពោះមុខចៅក្រម ដេីម្បីអនុវត្ដ ឬឃុំខ្លួននៅពន្ធនាគារលេីបទល្មេីសមុន។
ចំពោះម៉ូតូជនរងគ្រោះ សមត្ថកិច្ចបានប្រគល់ជូនយកទៅប្រេីវិញ រីឯជនសង្ស័យបានបញ្ជូនមកអធិការដ្ឋាននគរបាលស្រុកសាកសួរបំពេញនីតិវិធីកសាងសំណុំរឿងបញ្ជូនទៅ ចាត់ការតាមផ្លូវច្បាប់៕ រក្សាសិទ្ធដោយ៖សុទ្ធលី
