ក្រុងសំរោង ៖ ឯកឧត្តម មាន ចាន់យ៉ាដា អភិបាលខេត្តឧត្តរមានជ័យ បានឱ្យដឹងថា នាព្រឹកថ្ងៃទី២៩ ខែសីហា ឆ្នាំ២០២៥នេះ ឯកឧត្តមបាន អមដំណើរ ឯកឧត្តម ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃមជ្ឈមណ្ឌលសកម្មភាពកំចាត់មីនកម្ពុជា (CMAC) ក្នុងការផ្ដល់បទសម្ភាស និងសម្របសម្រួលដល់អ្នកសារព័ត៌មានអាស៊ាន ដើម្បីចុះយកព័ត៌មានដោយផ្ទាល់នៅទីតាំងទម្លាក់គ្រាប់បែកផ្សែងពុល និងគ្រាប់បែកដែលយោធាថៃទម្លាក់មកលើផ្ទះប្រជាពលរដ្ឋ នៅក្នុងភូមិផ្អុង សង្កាត់កូនក្រៀល ក្រុងសំរោង ខេត្តឧត្ដរមានជ័យ។
ឯកឧត្តមនេត្រ ភក្រ្តា រដ្ឋមន្រ្តីក្រសួងព័ត៌មាន បានថ្លែងសារលើបណ្តាញសង្គមថា ក្រុមអ្នកសារព័ត៌មានមកពីប្រទេសចិន សិង្ហបុរី ឥណ្ឌូនេស៉ី ម៉ាឡេស៉ី វៀតណាម ព្រមទាំងអ្នកសារព័ត៌មានកម្ពុជាជាច្រើននាក់ អញ្ជើញចុះយកព័ត៌មាន និងធ្វើបទសម្ភាសជាមួយថ្នាក់ដឹកនាំពាក់ព័ន្ធនៅទីតាំងជាច្រើន រួមទាំងទីប្រជុំជន ដែលរងការបំផ្លិចបំផ្លាញដោយគ្រាប់ផ្លោង និងការទម្លាក់គ្រាប់ពីយន្តហោះរបស់កងទ័ពថៃ នាពេលកន្លងមក នៅខេត្តឧត្តរមានជ័យ នាព្រឹកថ្ងៃទី២៩ ខែសីហា ឆ្នាំ២០២៥។ បេសកកម្មនៃការបង្ហាញការពិតពីទីតាំងដែលទទួលរងគ្រោះ៕ រក្សាសិទ្ធដោយ៖សុទ្ធលី
