ភ្នំពេញ ៖ ករណីគ្រោះថ្នាក់ចរាចរណ៍មួយបានកើតឡើងរវាង រថយន្ត Jeep បុកគ្នាជាមួយរថយន្ត Prius និង ម៉ូតូ ដោយ Jeep បើកពី លិចទៅកើត ឯ Pruis និង ម៉ូតូ បើកពីជើងទៅត្បូង នៅម្តុំទីតាំងស្តុប North Bridge ផ្លូវ២០០៤ បណ្តាលឲ្យរថយន្តJeepឆេះអស់ទាំងសស្រុង។
រថយន្ដស៊េរីទំនើប Jeep ពាក់ផ្លាកលេខ កម្ពុជា RATHA.76 ត្រូវបានអគ្គិភ័យឆាបឆេះអស់ទាំងស្រុក បន្ទាប់ពីបេីកបុកជាមួយរថយន្ដ TOYOTA Prius ពាក់ផ្លាកលេខ ភ្នំពេញ 2VE-3962 រួចបន្តទៅបុកម៉ូតូ HONDA VARIO ពាក់ផ្លាកលេខ ភ្នំពេញ 1KM-7137 បណ្ដាលឲ្យរងការខូចខាត រួចរថយន្ដក៏មានការឆ្លងចរន្តអគ្គិសនីបង្កចេញជាអណ្ដាតភ្លើងឆាបឆេះយ៉ាងសន្ធោសន្ធៅ។ ហេតុការណ៍នេះបានបង្កឲ្យមានការភ្ញាក់ផ្អើលកាលពីវេលាម៉ោង២:៣០នាទី រំលងអធ្រាត្រឈានចូល ថ្ងៃទី២៥ ខែកញ្ញា ឆ្នាំ២០២៥ ស្ថិតតាមបណ្ដោយផ្លូវណតប្រ៊ីត សង្កាត់អូរបែកក្អម ខណ្ឌសែនសុខ រាជធានីភ្នំពេញ។
ក្រោយពេលកេីតហេតុភាគីខាងរថយន្ដJeep បានធ្វេីការចរចាដោះស្រាយនិងភាគីរថយន្ដ TOYOTA Prius រួមជាមួយភាគីម៉ូតូ ដេីម្បីបញ្ចប់រឿងនៅហ្នឹងកន្លែង ចំណែកឯរថយន្ដ Jeep សមត្ថកិច្ចយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញជាបណ្ដោះអាសន្ន៕ រក្សាសិទ្ធដោយ៖សុទ្ធលី
