កំពត ៖ សាលាដំបូងខេត្តកំពតនៅថ្ងៃទី២៧ ខែកញ្ញា ឆ្នាំ២០២៥បានចេញសេចក្តីប្រកាសព័ត៌មាន ស្តីពីចំណាត់ការលើសំណុំរឿងពាក់ព័ន្ធនឹងករណី ឃាតកម្មដោយអំពើឃោរឃៅ,អ្នកផ្ដើមគំនិត ក្នុងបទឃាតកម្មដោយអំពើឃោរឃៅ និង ផ្តល់ជំនួយដល់ចារី ដែលប្រព្រឹត្តដោយជនត្រូវចោទចំនួន ០៣ នាក់ដោយ តុលាការសម្រេចចោទប្រកាន់ និងឃុំខ្លួនជនល្មើសដូចខាងក្រោម៖ ១,ឈ្មោះ អ៊ុំ វុទ្ធី ពី «បទឃាតកម្មដោយអំពើឃោរឃៅ» ២,ឈ្មោះ អឿ ចាន់ធី ហៅ ស្រីអែម ពី «បទអ្នកផ្តើមគំនិត ក្នុងបទឃាតកម្មដោយអំពើឃោរឃៅ» និង៣,ឈ្មោះ សុខ នីដា ភេទប្រុស ពី«បទផ្តល់ជំនួយដល់ចារី»។
អ្នកនាំពាក្យសាលាដំបូងខេត្តកំពត សូមជម្រាបជូនដល់សាធារណជន ឱ្យបានជ្រាបថា៖ នៅថ្ងៃទី ២៥ – ខែកញ្ញា ឆ្នាំ២០២៥ សាលាដំបូងខេត្តកំពតបានទទួលចាត់ការលើសំណុំរឿងព្រហ្មទណ្ឌលេខ ៧០១ ចុះថ្ងៃទី២៣ ខែកញ្ញា ឆ្នាំ២០២៥ របស់អយ្យការអមសាលាដំបូងខេត្តកំពត ទាក់ទិននឹងជនត្រូវចោទចំនួន០៣ នាក់ រួមមាន៖ ១.ឈ្មោះ – វុទ្ធី ភេទប្រុស កើតថ្ងៃទី០២ ខែកុម្ភៈ ឆ្នាំ១៩៨៣ ជនជាតិខ្មែរ ត្រូវបានចោទប្រកាន់ពីបទ ឃាតកម្មដោយអំពើ ឃោរឃៅ ប្រព្រឹត្តនៅភូមិស្រែព្រៃ ឃុំវត្តអង្គខាងត្បូង ស្រុកបន្ទាយមាស ខេត្តកំពត កាលពីថ្ងៃទី២០ ខែកញ្ញា ឆ្នាំ ២០២៥ បទល្មើសដែលមានចែង និងផ្តន្ទាទោសតាមបញ្ញត្តិមាត្រា២០៥ នៃក្រមព្រហ្មទណ្ឌ, ២.ឈ្មោះ អឿ ចាន់ធី ហៅ ស្រីអែម ភេទស្រី អាយុ២៨ឆ្នាំ ជនជាតិខ្មែរ ត្រូវបានចោទប្រកាន់ពីបទ អ្នកផ្ដើមគំនិត ក្នុងបទឃាតកម្មដោយអំពើ ឃោរឃៅ ប្រព្រឹត្តនៅភូមិស្រែព្រៃ ឃុំវត្តអង្គខាងត្បូង ស្រុកបន្ទាយមាស ខេត្តកំពត កាលពីថ្ងៃទី២០ ខែកញ្ញា ឆ្នាំ ២០២៥ បទល្មើសដែលមានចែង និងផ្តន្ទាទោសតាមបញ្ញត្តិមាត្រា២៨ និងមាត្រា២០៥ នៃក្រមព្រហ្មទណ្ឌ និង ៣.ឈ្មោះ សុខ ធីដា ភេទប្រុស អាយុ២១ ឆ្នាំ ជនជាតិខ្មែរ ត្រូវបានចោទប្រកាន់ពីបទ ផ្ដល់ជំនួយដល់ចារី ប្រព្រឹត្តនៅភូមិម្រះព្រៅ ឃុំត្រពាំងក្រសាំង ស្រុកបាទី ខេត្តតាកែវ កាលពីថ្ងៃទី២២ ខែកញ្ញា ឆ្នាំ២០២៥ បទល្មើសដែលមានចែង និងផ្តន្ទាទោស តាមបញ្ញត្តិមាត្រា៥៤៤ នៃក្រមព្រហ្មទណ្ឌ ។
បន្ទាប់ពីចៅក្រមស៊ើបសួរបានសួរចម្លើយ អមជាមួយដោយមេធាវីការពារសិទ្ធិឱ្យជនត្រូវចោទខាងលើរួច និង រួមទាំងការពិនិត្យភស្តុតាងនានាដែលមានក្នុងសំណុំរឿង ចៅក្រមស៊ើបសួរនៃសាលាដំបូងខេត្តកំពត បានសម្រេចឃុំខ្លួន បណ្តោះអាសន្នលើជនត្រូវចោទដែលឃាត់ខ្លួនបានទាំងអស់ខាងលើ នៅពន្ធនាគារខេត្តកំពត ដើម្បីបន្តកិច្ចស៊ើបសួរតាមនីតិវិធីច្បាប់ ៕ រក្សាសិទ្ធដោយ៖សុទ្ធលី
