ភ្នំពេញ៖ នៅថ្ងៃទី៥ តុលា មន្ត្រី ក.ប.ប មន្រ្តីនៃអគ្គនាយកដ្ឋានគយនិងរដ្ឋាករ នគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលរាជធានីភ្នំពេញ អគ្គនាយកដ្ឋានពេទ្យសត្វ បានចុះត្រួតពិនិត្យផលិតផលសាច់បង្កក ក្លាសេ នាំចូលក្នុងទីតាំងចំនួន ៣ ស្ថិតនៅក្នុងមូលដ្ឋានខណ្ឌមានជ័យ ខណ្ឌឬស្សីកែវ និងខណ្ឌព្រែកព្នៅ។
បេីតាម ក.ប.ប នៅព្រឹកថ្ងៃ អាទិត្យ ទី៥ ខែតុលា ឆ្នាំ២០២៥ នេះ មន្រ្តីនៃអគ្គនាយកដ្ឋាន ក.ប.ប. បានចុះត្រួតពិនិត្យផលិតផលសាច់បង្កក ក្លាសេ នាំចូល ក្នុងគោលបំណងស្វែងរកសារធាតុគីមីហាមឃាត់ និងអនុលោមភាពលើផលិតផលទំនិញនៅក្នុងទីតាំងចំនួន ៣ ស្ថិតនៅក្នុងមូលដ្ឋានខណ្ឌមានជ័យ ខណ្ឌឬស្សីកែវ និងខណ្ឌព្រែកព្នៅ ដោយសហការជាមួយសមត្ថកិច្ចពាក់ព័ន្ធរួមមាន មន្រ្តីនៃអគ្គនាយកដ្ឋានគយនិងរដ្ឋាករ នគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលរាជធានីភ្នំពេញ អគ្គនាយកដ្ឋានពេទ្យសត្វ និងមន្រ្តីនៃអាជ្ញាធរខណ្ឌទាំង៣។
មន្រ្តីជំនាញ ក.ប.ប. បានធ្វើការដកយកសំណាកគំរូមកវិភាគនៅនឹងកន្លែងជាមួយមន្ទីរពិសោធន៍ចល័ត ស្វែងរកសារធាតុគីមីហាមឃាត់តាមរយៈប្រតិករគីមី (Test Kit) សរុបចំនួន ៣៣ គំរូ ជាលទ្ធផល មិនមានការកំណត់ឃើញសញ្ញាណសារធាតុគីមីហាមឃាត់ឡើយ។ ទន្ទឹមនេះ យើងបានដកយកសំណាកផលិតផលចំនួន ៣៦គំរូ បញ្ជូនទៅមន្ទីរពិសោធន៍កណ្តាលនៃអគ្គនាយកដ្ឋាន ក.ប.ប. ដើម្បីស្វែងរកសំណល់ថ្នាំកសិកម្ម មេរោគ និងសារធាតុហាមឃាត់ផ្សេងទៀតនៅលើផលិតផល។
នៅក្នុងប្រតិបត្តិការត្រួតពិនិត្យនេះមន្រ្តីជំនាញ បានរកឃើញនូវភាពមិនអនុលោមនៅលើសំបកវេចខ្ចប់ពាក់ព័ន្ធនឹងបទដ្ឋានព័ត៌មាន កង្វះអនាម័យផ្នែកមួយចំនួន ក្នុងទីតាំងទូរបង្កក ក្លាសេ សីតុណ្ហភាពមិនសមស្រប និងលក្ខខណ្ឌតម្រូវផ្នែកសុវត្ថិភាពផលិតផល ដែលតម្រូវឱ្យមានការកែលម្អ និងកែតម្រូវឡើងវិញ។
ដោយរង់ចាំលទ្ធផលវិភាគរបស់មន្ទីរពិសោធន៍ មន្រ្តីយើងបានធ្វើការសៀលឃ្លុំបេផលិតផលផ្អាកចរាចរជាបណ្តោះអាសន្ននៅក្នុងទីតាំងទាំង៣ សរុបចំនួន ០៧ទូរ។
អគ្គនាយកដ្ឋាន ក.ប.ប. ត្រៀមលក្ខណៈរួចស្រេចទទួលកិច្ចសហការពីគ្រប់ភាគីពាក់ព័ន្ធ រួមទាំងសាធារណជន ក្នុងការផ្តល់ព័ត៌មាន ឬធ្វើបណ្តឹង គ្រប់ពេលវេលា រួមទាំងថ្ងៃចុងសប្តាហ៍ និងថ្ងៃឈប់សម្រាកផ្សេងៗ៕ រក្សាសិទ្ធដោយ៖សុទ្ធលី
