ខេត្តត្បូងឃ្មុំ ៖ ស្នងការដ្ឋាននគរបាលខេត្តត្បូងឃ្មុំ បានឲ្យដឹងថា កាលពីថ្ងៃទី១១ ខែតុលា ឆ្នាំ២០២៥ មានផេកហ្វេសប៊ុកឈ្មោះ ហេតុការណ៍ថ្មីៗ បានចុះផ្សាយដែលមានខ្លឹមសារថាៈ ប្រជាពលរដ្ឋរកស៊ីបន្តិចបន្តួចពុំមានលទ្ធភាពបង់ការប្រាក់ឲ្យក្រុមអ្នករកស៊ីចងការប្រាក់ថ្លៃកប់ពពក ក៏ត្រូវក្រុមអ្នករកស៊ីចងការប្រាក់នោះយករូបថតរបស់ពួកគាត់ ទៅបិទនៅតាមទីសាធារណៈហើយបញ្ជាក់ថា មាននៅក្នុងភូមិសាស្ត្រស្រុកពញាក្រែក។
ដោយអនុវត្តតាមបទបញ្ជារបស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងក្រោមការដឹកនាំ ពីលោកឧត្តមសេនីយ៍ទោ ចិន នី ស្នងការ នៃស្នងការដ្ឋាននគរបាលខេត្តត្បូងឃ្មុំ បានបញ្ជាឲ្យកងកម្លាំងនគរបាលស្នងការដ្ឋាននគរបាលខេត្តត្បូងឃ្មុំ សហការជាមួយកម្លាំងអធិការដ្ឋាននគរបាលស្រុកពញាក្រែក ចុះធ្វើការស្រាវជ្រាវ រកឃើញជនរងគ្រោះចំនួន៣នាក់ ជាកូនបំណុល។ ក្រោយការសាកសួរកូនបំណុលចប់ កម្លាំងសមត្ថកិច្ចយើងធ្វើការឃាត់ខ្លួនជនសង្ស័យចំនួន១០នាក់ ដែលរកស៊ីចងការប្រាក់ខុសច្បាប់ និងគ្មានអាជ្ញាប័ណ្ណ ដើម្បីចងក្រងសំណុំរឿងតាមនីតិវិធី និងបញ្ជូនទៅតុលាការ ៕ រក្សាសិទ្ធដោយ៖សុទ្ធលី
