ភ្នំពេញ ៖ ឯកឧត្តមឧបនាយករដ្ឋមន្រ្តី ហ៊ុន ម៉ានី រដ្ឋមន្រ្តីក្រសួងមុខងារសាធារណៈ បានថ្លែងអបអរសាទរខួបលើកទី ២២ នៃ «របាំព្រះរាជទ្រព្យ» ដែលត្រូវបានដាក់បញ្ចូលក្នុងបញ្ជីជាសម្បត្តិបេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូ នៅទីក្រុងអ៊ីស្តង់ប៊ុល ប្រទេសតួកគី នាថ្ងៃទី៧ ខែវិច្ឆិកា ឆ្នាំ២០០៣។
តាមរយៈបណ្តាញសង្គមនាព្រឹកថ្ងៃសុក្រនេះ ឯកឧត្តមឧបនាយករដ្ឋមន្រ្តី បានមានថ្លែងបន្តទៀតថា របាំព្រះរាជទ្រព្យ ឬរបាំក្បាច់ខ្មែរបុរាណ គឺជាទម្រង់របាំសក្ការ: ដ៏ពិសិដ្ឋ ប្រកបដោយកាយវិការទន់ភ្លន់ គួរឱ្យចង់គយគន់ និងមានទ្រង់គ្រឿងចាំងភ្លឺផ្លេក ជាមួយក្បាច់ចម្លាក់ដែលបង្កប់ទៅដោយអត្ថន័យយ៉ាងជ្រាលជ្រៅ។ របាំនេះ ជាប្រភេទរបាំ ដែលនាដការ ត្រូវពត់ពេន រេវាំ និងបញ្ចូលមនោសញ្ចោតនាយ៉ាងប៉ិនប្រសប់ទៅតាមសាច់រឿង ដែលរៀបរាប់បញ្ជាក់ដោយទំនុកច្រៀងនៃក្រុម ចម្រៀងជាពួក ដោយមានវង់ភ្លេងពិណពាទ្យប្រគំអម។ ពលរដ្ឋខ្មែរ បានចាត់ទុក «របាំព្រះរាជទ្រព្យ» ជាទ្រព្យសម្បត្តិ ដ៏មានតម្លៃមិនអាចកាត់ថ្លៃបានរបស់កម្ពុជា តែមួយគត់ ដែលបានថែរក្សា អស់រយៈពេលដ៏យូរលង់ណាស់មកហើយ ។
សូមកុលបុត្រ កុលធីតាខ្មែរគ្រប់រូប បន្តចូលរួមថែរក្សា លើកតម្កើងមរតកដ៏មានតម្លៃ កាត់ថ្លៃពុំបាននេះ ដើម្បីឱ្យដួងព្រលឹងនៃរបាំព្រះរាជទ្រព្យនៅតែដក់ជាប់ក្នុងដួងចិត្តរបស់ប្រជាជនយើង៕ រក្សាសិទ្ធដោយ៖សុទ្ធលី
