រាជធានីភ្នំពេញ៖ នាព្រឹកថ្ងៃទី១២ ខែវិច្ឆិកា ឆ្នាំ២០២៥ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និង ឯកឧត្តម អ៊ីហ្កូ ទ្រីសម៉ាន់ ឯកអគ្គរដ្ឋទូតសហភាពអឺរ៉ុប (EU) ប្រចាំព្រះរាជាណាចក្រកម្ពុជា បានអញ្ជើញចូលរួមជាគណៈអធិបតី ក្នុងពិធីបើកសម្ពោធ កិច្ចសន្ទនារវាងសាកលវិទ្យាល័យ វិទ្យាស្ថានស្រាវជ្រាវ និងវិស័យឯកជន នៃប្រទេសកម្ពុជា និងអឺរ៉ុប ដែលជាផ្នែកមួយនៃ ពិព័រណ៍ការសិក្សានៅប្រទេសក្នុងសហភាពអឺរ៉ុប លើកទី៤ (Study in Europe Fair) សម្រាប់សិស្សនិស្សិតកម្ពុជា និងមានការចូលរួមពីសំណាក់ ឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ឯកឧត្តម លោកជំទាវ ថ្នាក់ដឹកនាំក្រសួងពាក់ព័ន្ធ តំណាងសាកលវិទ្យាល័យជាច្រើនមកពីប្រទេសក្នុងសហភាពអឺរ៉ុប ភាគីពាក់ព័ន្ធជាតិ និងអន្តរជាតិ។
មានប្រសាសន៍ក្នុងឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានស្វាគមន៍យ៉ាងកក់ក្តៅចំពោះអ្នកចូលរួមទាំងអស់ ជាពិសេសដៃគូកិត្តិយសមកពីទ្វីបអឺរ៉ុប ដែលបានចូលរួមក្នុងកិច្ចសន្ទនានេះ ដើម្បីពង្រឹងចំណងនៃកិច្ចសហប្រតិបត្តិការអប់រំ និងស្រាវជ្រាវជាមួយប្រទេសកម្ពុជា ព្រមទាំងបានថ្លែងអំណរគុណយ៉ាងជ្រាលជ្រៅដល់គណៈប្រតិភូសហភាពអឺរ៉ុបប្រចាំព្រះរាជាណាចក្រកម្ពុជា ចំពោះការរៀបចំព្រឹត្តិការណ៍ដ៏មានអត្ថន័យនេះ និងបានគាំទ្រយ៉ាងសកម្មក្នុងការកែទម្រង់វិស័យអប់រំនៅកម្ពុជា។ សហភាពអឺរ៉ុប គឺជាដៃគូដ៏រឹងមាំបំផុតមួយរបស់កម្ពុជា ក្នុងការលើកកម្ពស់ឧត្តមសិក្សា ការអភិវឌ្ឍសមត្ថភាព និងនវានុវត្តន៍ ហើយកិច្ចសន្ទនានេះ គឺជាសមិទ្ធផលដ៏សំខាន់មួយទៀតនៅក្នុងភាពជាដៃគូដែលកំពុងរីកចម្រើនរបស់យើង ដែលមានមូលដ្ឋានយ៉ាងរឹងមាំលើគោលការណ៍រួមនៃសន្តិភាព កិច្ចសហប្រតិបត្តិការ និងការជំរុញការអភិវឌ្ឍប្រកបដោយចីរភាព តាមរយៈការអប់រំ និងកម្មវិធីផ្លាស់ប្ដូរនានា។
ដើម្បីសម្រេចបាននូវចក្ខុវិស័យកម្ពុជាឆ្នាំ២០៣០ និងឆ្នាំ២០៥០ រាជរដ្ឋាភិបាលបានកំណត់ ការអប់រំ STEM ជាអាទិភាព ដោយវិនិយោគលើមូលដ្ឋានគ្រឹះចំណេះដឹងកម្រិតខ្ពស់សម្រាប់មនុស្សជំនាន់ក្រោយ ដែលមានសារៈសំខាន់ជាពិសេសក្នុងយុគសម័យនៃបញ្ញាសិប្បនិម្មិត (AI) ដែលទាមទារឱ្យយើងពង្រឹងទាំងផ្នែកវិទ្យាសាស្ត្រ (STEM) និងសមត្ថភាពគិតពិចារណា (ទស្សនវិជ្ជា)។ ជាមួយគ្នានេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណដល់សហភាពអឺរ៉ុប ក្នុងការបណ្តុះបណ្តាលនិស្សិត និងអ្នកវិទ្យាសាស្ត្រកម្ពុជាតាមរយៈកម្មវិធីនានា ដូចជា Erasmus+ ជាដើម។ ក្នុងបរិបទនេះ ការគាំទ្ររបស់សហភាពអឺរ៉ុប ក្រោមជំនួយឧបត្ថម្ភថ្មីចំនួនពីរ ដែលផ្តល់មូលនិធិដោយសហភាពអឺរ៉ុបដល់គ្រឹះស្ថានឧត្តមសិក្សាកម្ពុជា ក្រោមកម្មវិធី Erasmus+ Capacity Building in Higher Education (CBHE) គឺស្របគ្នាយ៉ាងជិតស្និទ្ធជាមួយនឹងចក្ខុវិស័យជាតិរបស់កម្ពុជា ដោយជំនួយឧបត្ថម្ភទាំងនេះ នឹងជួយបង្កើនសមត្ថភាពស្ថាប័ន ការអភិវឌ្ឍកម្មវិធីសិក្សា និងកិច្ចសហប្រតិបត្តិការអន្តរជាតិបន្ថែមទៀត ដែលជួយគាំទ្រដល់គ្រឹះស្ថានឧត្តមសិក្សារបស់យើងដើម្បីបំពេញតម្រូវការនៃសេដ្ឋកិច្ចសតវត្សរ៍ទី ២១។
ជាថ្មីម្តងទៀត តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណយ៉ាងជ្រាលជ្រៅដល់គណៈប្រតិភូសហភាពអឺរ៉ុប ឯកអគ្គរដ្ឋទូតទាំងអស់នៃប្រទេសជាសមាជិកអឺរ៉ុប តំណាងនៃសាកលវិទ្យាល័យ វិទ្យាស្ថាន និងវិស័យឯកជនទាំងអស់នៃប្រទេសទាំងពីរដែលបានចូលរួម និងផ្តល់កិត្តិយសដ៏ថ្លៃថ្លាដល់វេទិកានេះ ដោយជឿជាក់ថា កិច្ចសន្ទនា និងភាពជាដៃគូបន្តរវាងកម្ពុជា និងអឺរ៉ុប នឹងបើកផ្លូវសម្រាប់គម្រោងស្រាវជ្រាវរួម ការផ្លាស់ប្តូរការសិក្សារបស់និស្សិត និងការអន្តរភាវូបនីយកម្ម (internationalization) នៃឧត្តមសិក្សា។ តាមរយៈកិច្ចសហការ និងកិច្ចសន្ទនាគ្នានេះ នឹងអាចបង្កើតតម្លៃរួមសម្រាប់សន្តិភាព ស្ថិរភាព និងការរកឃើញវិទ្យាសាស្ត្រថ្មីៗ ព្រមទាំងផ្តល់ឱកាសកាន់តែច្រើនក្នុងការផ្លាស់ប្តូរនិស្សិត និងការពង្រីកគម្រោងស្រាវជ្រាវរួម ក្នុងគោលដៅអភិវឌ្ឍធនធានមនុស្សដ៏សំខាន់សម្រាប់អនាគតនៃប្រទេសកម្ពុជា។
សូមជម្រាបថា កិច្ចសន្ទនានេះ បានប្រមូលផ្តុំអ្នកតំណាងជាង ១០០នាក់មកពីគ្រឹះស្ថានឧត្តមសិក្សា វិទ្យាស្ថានស្រាវជ្រាវ និងអង្គការវិស័យឯកជនអឺរ៉ុប រួមជាមួយអ្នកតំណាងប្រហែល ២០០ នាក់មកពីគ្រឹះស្ថានឧត្តមសិក្សា និងស្ថាប័នកម្ពុជា។ ការចូលរួមដ៏សម្បូរបែបនេះ បានបង្ហាញពីការប្តេជ្ញាចិត្តរួមគ្នារវាងកម្ពុជា និងសហភាពអឺរ៉ុបក្នុងការលើកកម្ពស់ឧត្តមភាពសិក្សា និងការតភ្ជាប់ការអប់រំជាមួយនវានុវត្តន៍ និងឧស្សាហកម្ម៕រក្សាសិទ្ធដោយ៖សុទ្ធលី
