ករណីម្ចាស់មន្ទីរសម្រាកព្យាបាល និងសម្ភព សុងហាក់ម៉ារីណា នៅស្រុកបាទី ខេត្តតាកែវ ចាក់ថ្នាំបណ្ដាលឱ្យមនុស្សស្លាប់ រួចយកសាកសពទៅបោះចោល ពេលនេះត្រូវតុលាការខេត្តតាកែវ កាត់ទោសដាក់ពន្ធនាគារ ៥ឆ្នាំ និងផាកពិន័យ ៨លានរៀល ចូលថវិការដ្ឋ។ រីឯប្ដីត្រូវបានផ្ដន្ទាទោស ១ឆ្នាំ ផាកពិន័យ ៣លានរៀល ចូលថវិការដ្ឋ។
សាលាដំបូងខេត្តតាកែវ នៅថ្ងៃទី១៧ ខែវិច្ឆិកា បានផ្តន្ទាទោសជនជាប់ចោទឈ្មោះ ស៊ុន ម៉ារីណា អាយុ ៣៩ឆ្នាំ ដាក់ពន្ធនាគារកំណត់ ៥ ឆ្នាំ និងផាកពិន័យ ៨លានរៀលចូលថវិការដ្ឋ ពាក់ព័ន្ធនឹងការចាក់ថ្នាក់បណ្ដាលឲ្យអ្នកជំងឺស្លាប់នៅមន្ទីរសម្រាកព្យាបាលនិងសម្ភពសុងហាក់ម៉ារីណា ឃុំត្រពាំងក្រសាំង ស្រុកបាទី ខេត្តតាកែវ កាលពីខែវិច្ឆិកា ឆ្នាំ២០២៤។
យោងតាមអ្នកនាំពាក្យតុលាការខេត្តតាកែវ ជនជាប់ចោទឈ្មោះ ស៊ុន ម៉ារីណា ត្រូវបានកាត់ទោសក្នុងបទចោទចំនួន ៤ ដែលពាក់ព័នឹងករណី មនុស្សឃាតដោយអចេតនា, ប្រកបវិជ្ជាជីវៈសុខាភិបាលដោយគ្មានអាជ្ញាប័ណ្ណ, លាក់បំបាំង សាកសព, ទារុណកម្ម និងអំពើឃោរឃៅមានស្ថានទម្ងន់ទោសទាក់ទងនឹងជនរងគ្រោះ។
ចំណែកជនជាប់ចោទ ឈ្មោះ ហៀង សុងហាក់ អាយុ ៣៧ឆ្នាំ ដែលជាប្ដី ត្រូវបានកាត់ទោសដាក់ពន្ធនាគារ ១ ឆ្នាំ និងពិន័យប្រាក់ ៣លានរៀល ចូលថវិការដ្ឋ ពាក់ព័ន្ធនឹងករណី ប្រកបវិជ្ជាជីវៈសុខាភិបាលដោយគ្មានអាជ្ញាប័ណ្ណប្រកបវិជ្ជាជីវៈសុខាភិបាល បណ្តាលឱ្យស្លាប់អ្នកជំងឺ៕ រក្សាសិទ្ធដោយ៖សុទ្ធលី
