កំពង់ចាម ៖ ជនញៀនថ្នាំម្នាក់បានឈ្លោះជាមួយប្រពន្ធមានផ្ទៃពោះ កើតជាអំពើហិង្សាឈានទៅដល់ប្រព្រឹត្តអំពើឃាតកម្មសម្លាប់ក្មួយ ម្ដាយក្មេក និងប្រពន្ធមានកូនក្នុងផ្ទៃ ដោយចាក់សាំងដុតសរុបចំនួន៩នាក់ ។ ហេតុការណ៍នេះបានកើតឡើងនៅផ្ទះចាំចំការនៅឃុំទួលសំបូរ ស្រុកស្ទឹងត្រង់ ខេត្តកំពង់ចាម នៅព្រឹកថ្ងៃទី២៣ ខែវិច្ឆិកា ឆ្នាំ២០២៥នេះ។
ក្រោយហេតុការណ៍កើតឡើងកម្លាំងសមត្ថកិច្ចបានចុះស្រាវជ្រាវឈានដល់ចាប់បុរសជាប្ដី បញ្ជូនមកកាន់ស្នងការដ្ឋាននគរបាលខេត្ត។
ដើមហេតុដំបូងប្រពន្ធជាជនរងគ្រោះនិងប្ដីបានឈ្លោះគ្នា ដោយទ្រាំមិនបាន ស្ត្រីជាប្រពន្ធក៏បានរត់មកផ្ទះម្ដាយនៅភូមិពោន ដែលមានចម្ងាយប្រមាណជាង៥គីឡូម៉ែត្រ ពីផ្ទះរបស់ខ្លួន ។ បន្ទាប់មកប្ដីខឹងសម្បារនិងប្រពន្ធ ក៏ជិះម៉ូតូមកតាមរករឿងប្រពន្ធដល់ផ្ទះម្ដាយក្មេកទៀតដែលស្ថិតនៅភូមិពោន។ គ្រានោះប្ដីបានប្រព្រឹត្តនូវអំពើឃាតកម្មដោយសម្លាប់ក្មួយៗនៅផ្ទះនោះទាំងអស់ រួមទាំងប្រពន្ធពោះធំកូនក្នុងផ្ទៃនិងម្ដាយក្មេក ដោយបានលើកគដាក់លើគ្នារួចចាក់សាំងដុតដើម្បីបំបាត់ភស្តុតាង។
ជនសង្ស័យជាប្តីឈ្មោះ សុបិន្ត វិនា អាយុ២១ ឆ្នាំ រស់នៅភូមិគីឡូ១០ ឃុំអារក្សត្នោត ស្រុកស្ទឹងត្រង់ ខេត្តកំពង់ចាម បានកាប់សម្លាប់ និងដុត ប្រពន្ធ យាយ និងក្មួយៗសាច់ថ្លៃសរុបស្លាប់អស់ចំនួន ៩ នាក់ ៖១-ឈ្មោះ ស៊ុន ស្រឿន ភេទស្រី អាយុ៦៧ ឆ្នាំ។២-ឈ្មោះ ធា តាំងលី ភេទស្រី អាយុ២០ឆ្នាំ (មានផ្ទៃពោះ) ត្រូវជាប្រពន្ធរបស់ជនសង្ស័យ ។
៣-ឈ្មោះ ស៊ីម វិសាល ភេទស្រី អាយុ១៤ ។៤-ឈ្មោះ ផា បូតា ភេទប្រុស អាយុ១៣ឆ្នាំ ។៥-ឈ្មោះ ផា ស្រីតាន ភេទស្រី អាយុ១១ឆ្នាំ ។៦-ឈ្មោះ ធា ថាក់ ភេទប្រុស អាយុ៧ឆ្នាំ ។
៧-ឈ្មោះផា សុភ័ក្ត្រ ភេទប្រុស អាយុ៧ឆ្នាំ ។៨-ឈ្មោះផា សម្ភស្ស ភេទស្រី អាយុ៥ឆ្នាំ និង៩-ឈ្មោះណាត នាង ភេទស្រី អាយុ២១ឆ្នាំ។ ពួកគេរស់នៅភូមិទួលសំបួរ ឃុំទួលសំបួរ ស្រុកស្ទឹងត្រង់ ខេត្តកំពង់ចាម ។
បច្ចុប្បន្ន ជនសង្ស័យត្រូវបាននគរបាលស្នងការខេត្តឃាត់ខ្លួន ដើម្បីកសាងសំណុំរឿងតាមនីតិវិធី៕ រក្សាសិទ្ធដោយ៖សុទ្ធលី
