កំពង់ធំ៖ នារសៀលថ្ងៃទី២៨ ខែវិច្ឆិកា ឆ្នាំ២០២៥ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា និងជាប្រធានកាយរឹទិ្ធជាតិកម្ពុជា បានអញ្ជើញចូលរួមជាអធិបតីក្នុងពិធីបិទការបោះជំរំកាយរឹទិ្ធជំទង់ថ្នាក់ជាតិលើកទី៦ ក្រោមប្រធានបទ “ការអប់រំកាយរឹទិ្ធកម្មដើម្បីគាំទ្រស្តង់ដាសាលារៀនគំរូ” នៅវិទ្យាស្ថានបច្ចេកវិទ្យាកំពង់ឈើទាល ខេត្តកំពង់ធំ ដោយមានការអញ្ជេីញចូលរួមពី ឯកឧត្ដម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា ឯកឧត្ដម អភិបាលនៃគណៈអភិបាលខេត្តកំពង់ធំ លោកជំទាវ តំណាងប្រតិភូកាយរឹទ្ធិនារីកម្ពុជា លោក លោកស្រីប្រតិភូកាយរឹទ្ធិរាជធានី ខេត្ត និងប្អូនៗប្រតិភូកាយរឹទ្ធិ។
មានប្រសាសន៍នៅក្នុងឱកាសនោះ ឯកឧត្តមបណ្ឌិតសភាចារ្យ ឧបនាយករដ្ឋមន្រ្តី បានពាំនាំមកនូវសេចក្តីនឹករឭក និងការផ្តាំផ្ញើសួរសុខទុក្ខពីសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាព្រឹទ្ធាចារ្យគរុគណនៃកាយរឹទិ្ធជាតិកម្ពុជា សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជាគរុគណ នៃកាយរឹទិ្ធជាតិកម្ពុជា ជូនចំពោះ ឯកឧត្តម លោកជំទាវ លោក លោកស្រី និងថ្នាក់ដឹកនាំគ្រប់លំដាប់ថ្នាក់នៃកាយរឹទិ្ធជាតិកម្ពុជា។
ឯកឧត្តមបណ្ឌិតសភាចារ្យ ឧបនាយករដ្ឋមន្រ្តី បានថ្លែងថា អស់រយៈពេលជាងមួយទសវត្សរ៍មកនេះ កាយរឹទិ្ធជាតិកម្ពុជា បានដើរតួនាទីយ៉ាងសកម្ម នៅក្នុងវិស័យអប់រំកម្ពុជា ដែលបានចូលរួមការងារអភិវឌ្ឍកុមារនិងយុវជន តាមរយៈកម្មវិធីអប់រំកាយរឹទិ្ធកម្ម ដែលជាការអប់រំក្រៅប្រព័ន្ធដ៏មានប្រសិទ្ធភាព ដោយបានគាំទ្រយ៉ាងពេញទំហឹងដល់ការអប់រំក្នុងប្រព័ន្ធរបស់ក្រសួងអប់រំ យុវជន និងកីឡា។ “ការបោះជំរំ” គឺជាផ្នែកមួយនៃកម្មវិធីយុវជន ដែលបានដើរតួនាទីយ៉ាងសំខាន់ក្នុងការទាក់ទាញការគាំទ្រពីកុមារនិងយុវជន ជាពិសេសអាណាព្យាបាល និងអ្នកពាក់ព័ន្ធ។ ជាការពិត “ការបោះជំរំ” គឺជាសាលារៀនចល័ត និងជាថ្នាលអប់រំតាមវិធីសាស្រ្តរៀនបែបអនុវត្តជាក់ស្តែង (Learning by Doing) និងប្រើប្រាស់វិធីសាស្រ្តអប់រំយ៉ាងសម្បូរបែប មានភាពទាក់ទាញ និងបង្កឱ្យមានលក្ខណៈសប្បាយរីករាយសម្រាប់កុមារនិងយុវជន តាមរយៈជីវភាពរស់នៅក្នុងប្រព័ន្ធកងល្បាត(Patrol System) និងវិធីកាយរឹទិ្ធកម្ម(Scout Methods)។
នៅក្នុងយុគសម័យឌីជីថលនៃសតវត្សរ៍ទី២១ និងការរីកចម្រេីនបច្ចេកវិទ្យាអេអាយ ទម្រង់នៃការសិក្សារៀនសូត្រ និងការទាក់ទងរវាងយុវជននៅក្នុងសង្គម មានការផ្លាស់ប្តូរយ៉ាងឆាប់រហ័ស ដែលប្រការនេះទទួលឥទ្ធិពលមួយផ្នែកពីការរីកចម្រេីនបច្ចេកវិទ្យា។ នៅក្នុងបរិការណ៍នេះ ការបោះជំរំកាយរឹទិ្ធ ក៏ត្រូវប្រើប្រាស់វិធីសាស្រ្តថ្មីបន្ថែមទៀត នៅក្នុងការអភិវឌ្ឍសមត្ថភាពយុវជន ដូចជា ការបញ្ចូលកម្មវិធីបច្ចេកវិទ្យាព័ត៌មាន និងការប្រើប្រាស់បច្ចេកវិទ្យាអេអាយ តាមរយ:ទូរស័ព្ទដៃវៃឆ្លាត (Smart Phone) ទៅក្នុងកម្មវិធីបោះជំរំកាយរឹទិ្ធ។ ការបោះជំរំកាយរឹទិ្ធ មិនត្រឹមតែជាថ្នាលអប់រំបំណិនជីវិតដល់យុវជន នោះទេ ពោលគឺជាថ្នាលអប់រំយុវជនមានសមត្ថភាពឆ្លើយតបទៅការរីកចំរើនបច្ចេកវិទ្យាសម័យថ្មី។
ឆ្លៀតក្នុងឱកាសនោះ ឯកឧត្តមបណ្ឌិតសភាចារ្យ ឧបនាយករដ្ឋមន្រ្តី បានផ្តល់ជូននូវអនុសាសន៍ ដើម្បីជំរុញកម្មវិធីអប់រំកាយរឹទិ្ធកម្ម និងពង្រឹងសកម្មភាពក្លឹបកាយរឹទិ្ធគាំទ្រកម្មវិធីសិក្សាក្រៅម៉ោងបន្ថែមនៅតាមសាលារៀន ដូចខាងក្រោម៖
១) ប្រតិភូកាយរឹទិ្ធរាជធានី ខេត្ត ត្រូវចំណេះដឹងដែលទទួលបានពីការបោះជំរំនាពេលនេះ ដើម្បីរៀបចំផែនការសកម្មភាព និងក្លឹបកាយរឹទិ្ធគាំទ្រកម្មវិធីសិក្សាក្រៅម៉ោងបន្ថែមនៅតាមសាលារៀនរបស់ខ្លួន។ តាមរយៈ ផែនការសកម្មភាព និងក្លឹបកាយរឹទិ្ធ គណៈគ្រប់គ្រងសាលារៀន នឹងមានភាពងាយស្រួលដល់ការងារគ្រប់គ្រង និងពង្រឹងបាននូវគុណសិក្សារបស់សិស្សានុសិស្ស។
២) នាយកដ្ឋានសហប្រតិបត្តិការកាយរឹទិ្ធ និងមន្ទីរអប់រំ យុវជន និងកីឡា ត្រូវសហការកៀងគរសប្បុរសជន និងសហគមន៍ ដើម្បីជួយឧបត្ថម្ភគាំទ្រដល់ការរៀបចំរចនាសម្ព័ន្ធកងល្បាតកាយរឹទិ្ធ នៅតាមគ្រឹះស្ថានសិក្សា ជាពិសេសសាលារៀនគំរូ។ តាមរយៈវិធីសាស្រ្តនេះ នឹងកាត់បន្ថយការពឹងផ្អែកការផ្គត់ផ្គង់គ្រឿងបំពាក់ឯកសណ្ឋានកាយរឹទិ្ធពីថ្នាក់ក្រសួង ហើយសាលារៀននឹងពង្រីកសមាជិកកាយរឹទិ្ធជាតិកម្ពុជា ដោយមានការចូលរួមពីសហគមន៍។
៣) នាយកដ្ឋានសហប្រតិបត្តិការកាយរឹទិ្ធ និងមន្ទីរអប់រំ យុវជន និងកីឡា រាជធានី ខេត្ត ត្រូវសហការរៀបចំផែនការសកម្មភាព និងកម្មវិធីផ្លាស់ប្តូរបទពិសោធ ដោយការបោះជំរំរវាងកាយរឹទិ្ធរាជធានីខេត្ត ដើម្បីចែករំលែកចំណេះដឹង និងបទពិសោធន៍។
៤) នាយកដ្ឋានសហប្រតិបត្តិការកាយរឹទិ្ធ និងមន្ទីរអប់រំ យុវជន និងកីឡា រាជធានី ខេត្ត ត្រូវសហការរៀបចំផែនការពង្រីកសមាជិកភាព និងពង្រឹងរចនាសម្ព័ន្ធកងល្បាតនៅតាមសាលារៀនគំរូ ដើម្បីគាំទ្រដល់ការអនុវត្តកម្មវិធីសិក្សាក្រៅម៉ោងបន្ថែម ចំនួន១ម៉ោងយ៉ាងតិចក្នុង១សប្តាហ៍៕រក្សាសិទ្ធដោយ៖សុទ្ធលី
