ខេត្តកំពង់ស្ពឺ÷កម្លាំងអាវុធហត្ថស្រុកបសេដ្ឋ បានសហការតាមបទបញ្ជា និងតាមដីការបស់ព្រះរាជអាជ្ញាអមសាលាដំបូងខេត្ត ធ្វើការឆែកឆេរផ្ទះជនសង្ស័យម្នាក់ ដែលស្ថិតនៅក្នុងភូមិត្មាតលេង ឃុំបសេដ្ឋ ស្រុកបសេដ្ឋ ខេត្តកំពង់ស្ពឺ ប៉ុន្តែជនសង្ស័យបានរត់គេចខ្លួនបាត់ បន្សល់ទុកតែសម្ភារៈ និងវត្ថុតាងជាច្រើន ដូចជា រថយន្តស៊េរីទំនើបចំនួន០២គ្រឿង និងកាំភ្លើងខ្លីចំនួន០២ដើម រួមទាំងគ្រាប់កាំភ្លើងជិត ២០០គ្រាប់ ព្រមទាំងសម្ភារៈជាច្រើនទៀត។ ក្រោយបញ្ចប់ប្រតិបត្តិការ កម្លាំងអាវុធហត្ថស្រុកបសេដ្ឋ បានធ្វើការប្រគល់វត្ថុតាងទាំងអស់ជូនទៅឱ្យកម្លាំងកងរាជអាវុធហត្ថខេត្តតាកែវ ចាត់ការបន្តតាមផ្លូវច្បាប់។
មន្ត្រីសមត្ថកិច្ចខេត្តកំពង់ស្ពឺ បានឱ្យដឹងថា នៅមុនពេលចុះឆែកឆេរទីតាំងលំនៅឋានជនសង្ស័យខាងលើ នៅវេលាម៉ោង៦ និង៥០នាទី ព្រឹកថ្ងៃទី ២៩ ខែវិច្ឆិកា ឆ្នាំ ២០២៥ ដោយបានការអនុញ្ញាតពី ឯកឧត្តម ស៊ីន វីរៈ ព្រះរាជអាជ្ញាអមសាលាដំបូងខេត្តកំពង់ស្ពឺ និង ឯកឧត្តម ឯក ឆេងហួត ព្រះរាជអាជ្ញាអមសាលាដំបូងខេត្តតាកែវ រួចមក កម្លាំងមូលដ្ឋានកងរាជអាវុធហត្ថស្រុកបរសេដ្ឋនៃខេត្តកំពង់ស្ពឺ និងបានសហការជាមួយកងកម្លាំងកងរាជអាវុធហត្ថខេត្តតាកែវ ចុះឆែកឆេរលំនៅឋានរបស់ ឈ្មោះ សែម រក្សា ភេទស្រី អាយុ ២៣ឆ្នាំ មុខរបរកម្មការិនីរោងចក្រ ស្ថិតនៅភូមិត្មាតលេង ឃុំបសេដ្ឋ ស្រុកបសេដ្ឋ ខេត្តកំពង់ស្ពឺ ប៉ុន្តែខណៈពេលនោះ ជនសង្ស័យបានរត់គេចខ្លួនបបាត់។
មន្ត្រីសមត្ថកិច្ចខេត្តកំពង់ស្ពឺ បានបន្តថា÷ ក្រោយធ្វើការឆែរឆេរទីតាំងខាងលើ កម្លាំងជំនាញធ្វើការដកហូតវត្ថុតាង រួមមាន÷- ម្សៅក្រាមពណ៌សថ្លាសង្ស័យជាគ្រឿងញៀន ចំនួន០៣កញ្ចប់ធំ ។- រថយន្តស៊េរីទំនើបចំនួន ០២គ្រឿង ;ម៉ូតូចំនួន ០១គ្រឿង ; កាំភ្លើងខ្លី ម៉ាក់ឡុក ចំនួន ០២ដើម; បង់ចំនួន០៣ (គ្រាប់ចំនួន១៨១គ្រាប់) និងសម្ភារៈប្រើប្រាស់គ្រឿងញៀនមួយចំនួន ថែមទៀតផង។
ចំណែកជនសង្ស័យ បានរត់គេចខ្លួនបាត់ រីឯចំពោះវត្ថុតាង ត្រូវបានកម្លាំងមូលដ្ឋានកងរាជអាវុធហត្ថស្រុកបរសេដ្ឋ ប្រគល់ជូនទៅកងរាជអាវុធហត្ថខេត្តតាកែវ ដើម្បីកសាងសំណុំរឿងចាត់ការបន្តតាមផ្លូវច្បាប់ ៕ រក្សាសិទ្ធដោយ៖សុទ្ធលី
