ខេត្តកំពង់ចាម: រថយន្តម៉ាកសាំងយុងមួយគ្រឿងដឹកអ្នកដំណើរក្នុងទិសដៅពីរាជធានីភ្នំពេញមកកាន់ក្រុងកំពង់ចាម។ស្របពេលបើកសុខៗស្រាប់តែឆ្លងភ្លើងបណ្ដាលឲ្យមានអគ្គីភ័យឆាបឆេះផ្នែកខាងមុខយ៉ាងសន្ធោសន្ធៅ នៅចំណុចឃុំមៀន ស្រុកព្រៃឈរ សំណាងល្អណាស់ក្នុងហេតុការណ៍នេះមិនមានអ្នកណាម្នាក់រងគ្រោះថ្នាក់ដល់អាយុជីវិត ។
លោកវរសេនីយ៍ឯកសេង ណា អធិការនគរបាលស្រុកព្រៃឈរ បាននៅដឹងថា:
ក្រោយពីទទួលបានព័ត៌មានថារថយន្តមួយគ្រឿងដឹកអ្នកដំណើរបានឆេះតាមដងផ្លូវ។ភ្លាមៗនោះរូបលោកបានឲ្យរថយន្តពន្លត់អគ្គីភ័យមួយគ្រឿងដែលប្រចាំការ២៤ម៉ោងលើ២៤ម៉ោង ប្រញាប់ចេញទៅអន្តរាគមន៍បាញ់ទឹកពន្លត់។ហេតុការណ៍នេះបានកើតឡើងនៅវេលាម៉ោង២និង៥០នាទីរសៀលថ្ងៃទី២៩ ខែវិច្ឆិកា ឆ្នាំ២០២៥ នៅលើផ្លូវជាតិលេខ៧ ស្ថិតនៅចំណុចមុខផ្ទះលោក អ៊ុក គីមលី ស្ថិតនៅភូមិឃ្លោយទី១ ឃុំមៀន ស្រុកព្រៃឈរ។
អធិការនគរបាលស្រុកព្រៃឈរបន្តថារូបលោកបានបញ្ជាឱ្យកម្លាំងជំនាញអគ្គីភ័យនៃអធិការដ្ឋាននគរបាលស្រុកព្រៃឈរ ចេញរថយន្ដពន្លត់អគ្គីភ័យ
០១គ្រឿងចុះទៅអន្ដរាគមន៍ជួយពន្លត់ ដោយសហការជាមួយកម្លាំងប៉ុស្ដិ៍នគរបាលរដ្ឋបាល និងកម្លាំងប្រជាការពារ។ ម្ចាស់រថយន្តមានឈ្មោះ ព្រហ្ម កុសល ភេទប្រុស អាយុ៣៨ឆ្នាំ ជាតិខ្មែរ នៅភូមិទី១៤ ឃុំកោះសូទិន ស្រុកកោះសូទិន ខេត្តកំពង់ចាម។ឆេះរថយន្ដ
០១គ្រឿង ម៉ាកសាំយ៉ុងពណ៌ស ពាក់ផ្លាកលេខភ្នំពេញ 2AR-7343 និងសម្ភារៈ ខោអាវនៅលើរថយន្ដមួយចំនួន។មូលហេតុ: បណ្តាលមកពីឆ្លងចរន្តអគ្គីសនី។ អគ្គីភ័យរលត់អស់១០០% នៅវេលាម៉ោង៣និង១០ នាទីរសៀល ករណីនេះមិនបណ្ដាលរាលដល់ដល់លំនៅដ្ឋានប្រជាពលរដ្ឋ និងរបួសដល់មនុស្សឡើយ ។ក្នុងកិច្ចប្រតិបត្តិការណ៍នោះ បានប្រើប្រាស់រថយន្ដពន្លត់អគ្គីភ័យស្រុក ០១ គ្រឿងនិងអស់ទឹកចំនួន០១សុីទែន។
ម្ចាស់រថយន្តឈ្មោះកុសល បានប្រាប់តាមទូរសព្ទឱ្យដឹងព្រឹកថ្ងៃទី៣០ វិច្ឆិកាថាគាត់បានបើករថយន្តឈ្នួលចេញពីរាជធានីភ្នំពេញឆ្ពោះមកកំពង់ចាមស្របពេលមកដល់ស្រុកព្រៃឈររថយន្តបានឮសំឡេងខុសពីធម្មតាលុះពេលខលសួរជាងភ្លើងគេប្រាប់ថាដូរឌីណាម៉ូទៅលែងអីហើយ គាត់បានបើករថយន្តមកមុខបន្តទៀតតាមផ្លូវជាតិលេខ៧ មិនទាន់ដល់ជាងផង ពេលនោះស្រាប់តែឆ្លងភ្លើងឆេះចេញជាអណ្ដាតភ្លើង។គាត់បានប្រើបំពង់ពន្លត់អគ្គីភ័យបាញ់ពន្លត់តែបាញ់មិនឈ្នះបន្ទាប់មកបានរថយន្តពន្លត់អគ្គីភ័យរបស់កម្លាំងនគរបាលស្រុកព្រៃឈរមួយគ្រឿងជួយបាញ់ពន្លត់ ដោយឆេះអស់សល់តែគ្រងចឹងដែក រថយន្តនេះគាត់ទិញកន្លះឆ្នាំហើយតម្លៃជាង១ម៉ឺនដុល្លារ។ គាត់ពេលនេះមិនទាន់ទិញរថយន្តមួយគ្រឿងទៀតរត់ឈ្នួលនោះទេសម្រាកឲ្យស្រួលខ្លួនបន្តិចសិននិងសោកស្ដាយមិនគួរជួបរឿងបែបនេះសោះ៕ រក្សាសិទ្ធដោយ៖ភ្នំប្រុសភ្នំស្រី
