ក្រចេះ ៖ ស្នងការដ្ឋាននគរបាលខេត្តក្រចេះ បានឲ្យដឹងថា ជនសង្ស័យម្នាក់ នេះជិះម៉ូតូមួយគ្រឿង សម្តៅឡើងទៅលើកំពូលភ្នំ ហើយបានបបួលក្មេងឃ្វាលគោពីរនាក់ទៀត ឲ្យទៅលួចយកហិបបច្ច័យពុទ្ធបូជា ដែលដាក់នៅពីមុខដងទង់នៅលើកំពូលភ្នំ ។ នៅពេលលួចបានហិប ជនសង្ស័យបានយកហិបនោះ មកគាស់សោ ដើម្បីយកលុយតែ ក៏ត្រូវបានព្រះសង្ឃជាច្រើនអង្គ បាននិមន្តមកទាន់ ក៏ឃើញទាន់ ស្រែឆោឡោចាប់ប្រគល់ឲ្យសមត្ថកិច្ច។
នាយផ្នែកព្រហ្មទណ្ឌស្រុកចិត្របុរី លោកហេង ប៊ុនធឿន បានឲ្យដឹងថា ជនសង្ស័យវ័យជំទង់ម្នាក់ឈ្មោះ ថាន ទូច ហៅចាប អាយុ១៩ឆ្នាំ រស់នៅក្នុងឃុំថ្មគ្រែ ស្រុកចិត្របុរី ត្រូវបាននគរចាប់ខ្លួន បន្ទាប់ពីជននេះបានឡើងទៅលើកំពូលភ្នំសំបុកលួចយកហិបបច្ច័យពុទ្ធបូជា ដែលគណៈកម្មាការវត្ត បានរៀបចំដាក់ទុកនៅមុខដងទង់លើកំពូលភ្នំ តែការធ្វើសកម្មភាពលួចរបស់ ជននេះនិងបក្ខពួក២នាក់ទៀត មិនបានសម្រេច ដោយត្រូវព្រះសង្ឃឃើញទាន់។
នាយផ្នែកព្រហ្មទណ្ឌស្រុកចិត្របុរី បានបន្ថែមថា កាលពីថ្ងៃកើតហេតុទី២៣ កញ្ញា ជនសង្ស័យម្នាក់នេះ បានជិះម៉ូតូមួយគ្រឿងសម្តៅឡើងទៅលើកំពូលភ្នំ។ ពេលទៅដល់រូបគេ បានបបួលក្មេងឃ្វាលគោពីរនាក់ទៀត ទៅលួចយកហិបបច្ច័យពុទ្ធបូជា ដើម្បីគាស់យកលុយ។ ក្រោយធ្វើសកម្មភាពលួចមិនបានសម្រេច ដោយផ្អើលឆោឡោ ជននេះបានរត់ចុះពីភ្នំ តែក៏ត្រូវនគរបាលចាប់ខ្លួន បានតាមបណ្តឹងរបស់គណៈកម្មការវត្ត៕ ដោយ ៖ បញ្ញាស័ក្តិ