ខេត្តកំពង់ស្ពឺ÷ កូនប្រុសចិត្តជាតិរច្ឆានម្នាក់ខឹងសុំលុយម្ដាយចំនួន 1.000រៀល យកទៅទិញបារី ប៉ុន្តែម្ដាយមិនឱ្យ ហើយថែមទាំងស្ដីបន្ទោសមិនជួយការងារផ្ទះ ស្រាប់តែកូនប្រុសនោះស្ទុះទៅទាញកាំបិតប៉័ងតោកាប់លើម្តាយស្លាប់ក្នុងថ្លុកឈាម ត្រូវបានកម្លាំងនគរបាលស្រុកភ្នំស្រួចឃាត់ខ្លួន ។ ហេតុការណ៍ឃាត់ខ្លួនកូនប្រុសចិត្តតិរច្ឆានរូបនេះ កើតឡើងកាលពីរសៀលថ្ងៃទី 18 ខែកុម្ភៈ ឆ្នាំ 2026 នៅចំណុចក្នុងភូមិព្រៃឫស្សី ឃុំជាំសង្កែ ស្រុកភ្នំស្រួច ខេត្តកំពង់ស្ពឺ។
សមត្ថកិច្ច ស្រុកភ្នំស្រួចបានឱ្យដឹងថា កាលពីវេលាម៉ោង 01:10នាទី រសៀលថ្ងៃទី18 ខែកុម្ភៈ ឆ្នាំ2026 នៅចំណុចក្នុងភូមិព្រៃឫស្សី ឃុំជាំសង្កែ ស្រុកភ្នំស្រួច មានករណី : ឃាតកម្មមួយកើតឡើងដោយកូនប្រុសប្រើកាំបិតប៉័ងតោ កាប់សម្លាប់ម្ដាយបង្កើត ។
ជនសង្ស័យដៃដល់មាន ឈ្មោះ នឿន ណែត ហៅខ្នែត ភេទប្រុស អាយុ 22ឆ្នាំ រស់នៅជាមួយឪពុក-ម្តាយក្នុងភូមិ-ឃុំខាងលើ បានយកកាំបិតប៉័ងតោ កាប់ទៅលើម្ដាយបង្កើត ឈ្មោះយួន ផាន អាយុ 47ឆ្នាំ រស់នៅផ្ទះជាមួយគ្នា ចំសៀតផ្កាលើត្រចៀកខាងស្ដាំ ចំនួន 1កាំបិត បណ្ដាលឲ្យស្លាប់ភ្លាមៗ យ៉ាងអាណោចអាធ័ម។
ប្រភពព័ត៌មានពីសមត្ថកិច្ចស្រុកភ្នំស្រួចបានឲ្យដឹងទៀតថា មុនពេលកើតហេតុ ជនសង្ស័យដៃដល់នៅផ្ទះតែ 2នាក់ម្ដាយ ពេលដែលជនសង្ស័យកំពុងដេកអង្រឹង ហើយបានសុំលុយម្ដាយ 1.000 រៀល យកទៅទិញបារីជក់ ប៉ុន្តែម្ដាយមិនឲ្យ ហើយថែមទាំងស្ដីបន្ទោសមិនដែលជួយធ្វើការងារ ។ ពេលនោះ ជនសង្ស័យដៃដល់បានស្ទុះទៅយកកាំបិតប៉័ងតោនៅលើតុ កាប់ទៅលើម្ដាយហូរឈាមជោកខ្លួន ។ ពេលធ្វើសកម្មភាពកាប់រួចបានបោះកាំបិតប៉័ងតោចោល និងបានដើរទៅដេកនៅក្នុងអង្រឹងនៅមុខផ្ទះ ចំណែកម្ដាយជាជនរងគ្រោះបានដើរចូលទៅក្នុងផ្ទះ ។ លុះដល់ម៉ោង 2:20 នាទី ថ្ងៃ18 ខែកុម្ភៈ ឆ្នាំ2026 ឪពុកត្រឡប់មកពីកាប់អុសវិញ ! បានដើរចូលក្នុងផ្ទះទើបឃើញប្រពន្ធ(ស្ត្រីរងគ្រោះ) របស់ខ្លួនដេកស្លាប់នៅក្នុងផ្ទះបាត់ទៅហើយ។
ក្រោយពេលកើតហេតុ កម្លាំងសមត្ថកិច្ចទទួលព័ត៌មានចុះដល់កន្លែងកើតហេតុ និងបានហៅជនសង្ស័យ ឈ្មោះ នឿន ណែត ហៅ ខ្នែត មកសាកសួរ ។ជនសង្ស័យនេះបានឆ្លើយសារភាពថា : រូបខ្លួនពិតជាបានធ្វើសកម្មភាពយកកាំបិតប៉័ងតោកាប់សម្លាប់ម្ដាយប្រាកដមែន ។ ជនសង្ស័យដៃដល់រូបនេះជាកូនបានបញ្ជាក់អំពីមូលហេតុថា : សុំលុយម្ដាយចំនួន 1.000រៀល យកទៅទិញបារី តែម្ដាយមិនឱ្យ ថែមទាំងស្ដីបន្ទោសថែមទៀត ទើបខ្លួនកាប់តែម្តងទៅ។
បច្ចុប្បន្ន ជនសង្ស័យដៃដល់ត្រូវឃាត់ខ្លួនសួរនាំ និងកសាងសំណុំរឿងបញ្ជូនទៅស្នងការដ្ឋាននគរបាលខេត្តកំពង់ស្ពឺ ដើម្បីចាត់ការបន្តតាមនិតិវិធីច្បាប់៕ រក្សាសិទ្ធដោយ៖សុទ្ធលី
