ភ្នំពេញ៖ សារលិខិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសទិវាទេសចរណ៍ពិភពលោក នៅថ្ងៃទី២៧ ខែកញ្ញា ឆ្នាំ២០១៨ ក្រោមប្រធានបទ “វិស័យទេសចរណ៍ និងនិន្នាការផ្លាស់ប្តូរទៅរកប្រព័ន្ធឌីជីថល” (Tourism and the Digital Transformation)។
សម្តេចតេជោ បានថ្លែងថា រាជរដ្ឋាភិបាល និងប្រជាជនកម្ពុជា បានចូលរួមប្រារព្ធទិវាទេសចរណ៍ពិភពលោកឆ្នាំ២០១៨ ជាមួយពិភពលោកទាំងមូល ហើយយកឱកាសនេះ ដើម្បីអបអរសាទរចំពោះសមិទ្ធផលទេសចរណ៍កម្ពុជា និងលើកទឹកចិត្តគ្រប់ភាគីពាក់ព័ន្ធ បន្តគាំទ្រការអភិវឌ្ឍទេសចរណ៍កម្ពុជា សំដៅសម្រេចគោលដៅអភិវឌ្ឍប្រកបដោយចីរភាព របស់អង្គការសហប្រជាជាតិ នៅឆ្នាំ២០៣០ ប្រកបដោយស្មារតីទទួលខុសត្រូវខ្ពស់។
សម្តេចតេជោ បានស្នើស្ថាប័នពាក់ព័ន្ធ វិស័យឯកជន ប្រជាពលរដ្ឋ និងដៃគូអភិវឌ្ឍចូលរួមអភិវឌ្ឍទេសចរណ៍ឲ្យបានសកម្ម និងកាន់តែខ្លាំងក្លាថែមទៀត និងត្រៀមខ្លួនចាប់យកកាលានុវត្តភាព នៃឧស្សាហកម្មជំនាញទី៤ ក្នុងធុរកិច្ចវិស័យទេសចរណ៍។
សម្តេចនាយករដ្ឋមន្ត្រី បានថ្លែងថា ទិវាទេសចរណ៍ពិភពលោកឆ្នាំ២០១៨ ក្រោមប្រធានបទ “វិស័យទេសចរណ៍ និងនិន្នាការផ្លាស់ប្តូរទៅរកប្រព័ន្ធឌីជីថល” (Tourism and the Digital Transformation) ជាឱកាសដ៏វិសេសវិសាល មួយសម្រាប់លើកស្ទួយវិស័យទេសចរណ៍ ដែលរួមចំណែកអភិវឌ្ឍសេដ្ឋកិច្ចសង្គម អភិរក្សបរិស្ថាន កាត់បន្ថយភាពក្រីក្រ បង្កើនមិត្តភាព រក្សាសន្តិភាព និងពង្រឹងនូវតួនាទី និងសារសំខាន់នៃការប្រើប្រាស់បច្ចេកវិទ្យាទំនើប និងប្រព័ន្ធឌីជីថលក្នុងការអភិវឌ្ឍទេសចរណ៍កម្ពុជា ប្រកបដោយនិរន្តរភាព បរិយាប័ន្ន៕ ដោយ៖កូឡាប
