ភ្នំពេញ ៖ នៅព្រឹកថ្ងៃទី១២ ខែមីនា ឆ្នាំ២០២៦ នៅទីបញ្ជាការCMACភ្នំពេញ ឯកឧត្តមហេង រតនា អគ្គនាយកស៊ីម៉ាក់បានទទួលជួបគណៈប្រតិភូសហរដ្ឋអាមេរិកដឹកនាំដោយលោក Mr. Ethan Rinksប្រធានគម្រោងកម្មវិធីកាត់បន្ថយអាវុធនៃក្រសួងការបរទេសសហរដ្ឋអាមេរិក លោកស្រី Ms. Jill Larson មន្ត្រីទទួលន្ទុកត្រួតពិនិត្យជំនួយនៃក្រសួងការបរទេស និងលោកស្រី Ms. Homa Hassan មន្ត្រីពិនិត្យវាយតម្លៃគម្រោងជំនួយកាត់បន្ថយសព្វាវុធនៃវិមានប្រធានាធិបតី ព្រមទាំងអបដំណេីរដោយលោកស្រី Kelly Saltzman មន្ត្រីស្ថានទូតអាមេរិកប្រចាំកម្ពុជា។
ជំនួបពិភាក្សានេះសំដៅពង្រឹងកិច្ចសហប្រតិបត្តិការនិងត្រួតពិនិត្យជាក់ស្តែងនូវវឌ្ឍនភាពកិច្ចប្រតិបត្តិការក្នុងការអនុវត្តគម្រោងជំនួយហិរញ្ញប្បទានឥតសំណងរបស់រដ្ឋាភិបាលសហរដ្ឋអាមេរិកផ្តល់ជូនរាជរដ្ឋាភិបាលចំនួន៤លានដុល្លារសហរដ្ឋអាមេរិកកាលពីកន្លងទៅថ្មីៗនេះ ដេីម្បីគាំទ្រសកម្មភាពបោសសម្អាតគ្រាប់មីននិងសំណល់យុទ្ធភណ្ឌសង្គ្រាមនៅកម្ពុជា។
គម្រោងនេះគាំទ្រសកម្មភាពសំខាន់ៗ រួមមាន៖ ១. កម្លាំងបោសសម្អាតគ្រាប់សំណល់សង្គ្រាមនៅបណ្តាខេត្តខាងកេីតប្រទេសរួមមានខេត្តត្បូងឃ្មុំ កំពង់ចាម ព្រៃវែង ស្វាយរៀង និងក្រចេះ ២. កម្លាំងចល័តឆ្លេីយតបបន្ទាន់ៗ និង៣. កម្លាំងបោសសម្អាតគ្រាប់មីននិងសំណល់យុទ្ធភណ្ឌសង្គ្រាមក្នុងខេត្តឧត្តរមានជ័យ។ ជំនួយសហរដ្ឋអាមេរិកគម្រោងនេះ បានគាំទ្រកម្លាំងជំនាញអង្គភាពCMAC ចំនួនប្រមាណជិត៤០០នាក់ ឱ្យបំពេញភារកិច្ចមនុស្សធម៌យ៉ាងសកម្ម។
សូមបញ្ជាកបន្ថែមថា ក្នុងពេលជាមួយគ្នានេះដែរ រដ្ឋាភិបាលសហរដ្ឋអាមេរិកតាមរយ:ក្រសួងការពារជាតិសហរដ្ឋអាមេរិក ក៏បានផ្តល់ការគាំទ្រលេីការហ្វឹកហ្វឺនពង្រឹងសមត្ថភាពធនធានមនុស្ស និងបំពាក់សម្ភារបច្ចេកទេសមួយចំនួនជូនអង្គភាពCMACដែរ៕ រក្សាសិទ្ធដោយ៖សុទ្ធលី
