កម្ពុជា ប្តេជ្ញាលុបបំបាត់បទល្មើសឆបោកអនឡាញ និងជំរុញសេដ្ឋកិច្ចស្អាត ប្រកបដោយបរិយាបន្ន

ភ្នំពេញ​ ៖ ក្នុងជំនួបពិភាក្សាការងារជាមួយលោកសាស្ត្រាចារ្យ Lee, Hyun-Hoon មកពីសាកលវិទ្យាល័យជាតិ Kangwon នៃសាធារណរដ្ឋកូរ៉េ កាលពីថ្ងៃទី១៦ ខែមីនា ឆ្នាំ២០២៦ ឯកឧត្តមបណ្ឌិត ធន់ វឌ្ឍនា អនុប្រធានទី២ នៃព្រឹទ្ធសភា បានបញ្ជាក់យ៉ាងច្បាស់ពីគោលជំហររបស់កម្ពុជា ក្នុងការសហការប្រកបដោយតម្លាភាពជាមួយសហគមន៍អន្តរជាតិ ដើម្បីលុបបំបាត់ការឆបោក ពិសេសការឆបោកអនឡាញ (Online Scams) ឱ្យបានត្រឹមខែមេសា ខាងមុខនេះ។ ការប្តេជ្ញាចិត្តនេះ មិនត្រឹមតែធ្វើឡើងដើម្បីការពារសន្តិសុខសណ្តាប់ធ្នាប់ប៉ុណ្ណោះទេ ប៉ុន្តែថែមទាំងដើម្បីការពារកេរ្តិ៍ឈ្មោះប្រទេសជាតិ និងបង្កើនទំនុកចិត្តដល់ភ្ញៀវទេសចរអន្តរជាតិមកកាន់កម្ពុជាផងដែរ។

ទន្ទឹមនឹងការដោះស្រាយបញ្ហាការឆបោកអនឡាញ ឯកឧត្តមបណ្ឌិត បានលើកឡើងពីយុទ្ធសាស្ត្រពង្រឹង “សេដ្ឋកិច្ចពិត” ដែលផ្អែកលើការផលិតទំនិញ និងសេវាកម្ម សម្រាប់ទីផ្សារ។ បន្ថែមពីលើនេះ ឯកឧត្តមបណ្ឌិត ក៏បានលើកថា កម្ពុជាចាំបាច់ត្រូវមាន “សេដ្ឋកិច្ចស្អាត ប្រកបដោយបរិយាបន្ន” ដែលរាល់សកម្មភាពសេដ្ឋកិច្ចត្រូវគិតគូរដល់បរិស្ថាន និងប្រជាជនដែលមានចំណូលទាប ពិសេសជនងាយរងគ្រោះ។

ឆ្លើយតបនឹងសំនួររបស់ លោកសាស្ត្រចារ្យ អំពីការឡើងថ្លៃប្រេងលើពិភពលោក ដោយសារសង្គ្រាមអ៊ីរ៉ង់ ឯកឧត្តមបណ្ឌិត បានឆ្លើយតបថា កម្ពុជា ពិតជារងផលប៉ះពាល់ ដូចប្រទេសផ្សេងៗទៀតដែរ ប៉ុន្តែការជំរុញថាមពលកកើតឡើងវិញដូចជា វារីអគ្គីសនី និងថាមពលពន្លឺព្រះអាទិត្យ ព្រមទាំងកំពុងអភិវឌ្ឍថាមពលខ្យល់ បានជួយកម្ពុជា ជៀសផុតផលប៉ះពាល់អវិជ្ជមានបានមួយកម្រិត។ ឯកឧត្តមបណ្ឌិត បានលើកឡើងថា ដោយសារសោហ៊ុយដឹកជញ្ជូនខ្ពស់ យុទ្ធសាស្ត្រកសិកម្មកម្ពុជា គឺងាកទៅរកដំណាំមានតម្លៃខ្ពស់ ដូចជាកាហ្វេ និងកាកាវ និងជំរុញការកែច្នៃក្នុងស្រុក។

លោកសាស្ត្រាចារ្យ បានលើកអំពីសៀវភៅ ដែលលោកគឺជាអ្នកនិពន្ធផ្ទាល់ ដែលក្នុងសៀវភៅនោះ និយាយអំពីទស្សនទាននៃការអភិវឌ្ឍ ដោយផ្តោតលើសេដ្ឋកិច្ចបៃតង និងបរិយាបន្ន៕ រក្សាសិទ្ធដោយ៖សុទ្ធលី