ប្រទេសចិន ៖ ប្រតិភូរាជរដ្ឋាភិបាល បន្ទុកជាអគ្គនាយក នៃអគ្គនាយកដ្ឋានពន្ធដារ បានថ្លែងថា សម្រាប់ក្របខ័ណ្ឌប្រជាជាតិតំបន់មេគង្គ កិច្ចប្រជុំកិច្ចសហប្រតិបត្តិការពន្ធដារ បណ្តាប្រទេស Langcang Mekong នឹងជំរុញការធ្វើការរួមគ្នា ក្នុងន័យធ្វើឲ្យប្រព័ន្ធពន្ធដារមួយ ដែលស្របតាមការវិវត្ត នៃសេដ្ឋកិច្ចក្នុងតំបន់ និងសាកលលោក ហើយប្រព័ន្ធពន្ធដារមួយ ដែលធ្វើឲ្យប្រសើរឡើង នូវការអភិវឌ្ឍសេដ្ឋកិច្ច ប្រកបដោយចីរភាព។
បើតាមសេចក្តីប្រកាសព័ត៌មានអគ្គនាយកដ្ឋានពន្ធដារ ៖ លោក គង់ វិបុល ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកដ្ឋានពន្ធដារ នៅថ្ងៃពុធ ទី២៦ ខែកញ្ញា ឆ្នាំ២០១៨ បានដឹកនាំប្រតិភូកម្ពុជា ចូលរួមក្នុងសិក្ខាសាលាពន្ធដារ ប្រទេសក្នុងតំបន់មេគង្គ ក្រោមប្រធានបទ 2018 Langcang Mekong River Cooperation Mechanism Member Countries Taxation នៅទីក្រុងណានីង តំបន់ស្វយ័តគង់ស៊ីជាំង សាធារណរដ្ឋប្រជាមានិតចិន។
វេទិការដ៏មានសារសំខាន់នេះ ស្របពេលដែលគំនិតផ្តួចផ្តើមនៃគម្រោងខ្សែក្រវ៉ាត់ ឬខ្សែក្រវាត់សេដ្ឋកិច្ចផ្លូវជំនួញសូត្រ និងផ្លូវជំនួញសូត្រសមុទ្រសតវត្សរ៍ទី២១ (Belt and Road Initiative – BRI or Silk Road Economic Belt) គឺជាយុទ្ធសាស្ត្រអភិវឌ្ឍន៍ ដែលត្រូវបានអនុម័ត ដោយរដ្ឋាភិបាលចិន ហើយនឹងផ្តោតលើការតភ្ជាប់ និងកិច្ចសហប្រតិបត្តិការរវាងបណ្តាប្រទេស Eurasia ជាពិសេសសាធារណរដ្ឋប្រជាមានិតចិន (PRC)។
នៅក្នុងកំឡុងពេលនៃកិច្ចប្រជុំ លោក គង់ វិបុល ត្រូវបានភាគីម្ចាស់ផ្ទះសាធារណរដ្ឋប្រជាមានិតចិន អញ្ជើញលោកក្នុងការ ចែករំលែកបទពិសោធន៍ជាក់ស្តែងពាក់ព័ន្ធ នឹងជោគជ័យនៃការធ្វើកំណែទម្រង់ និងទំនើបកម្មថ្មីៗ របស់អគ្គនាយកដ្ឋានពន្ធដារកម្ពុជា នារយៈពេល៦ឆ្នាំចុងក្រោយ ។ ជាមួយគ្នានេះ លោកក៏បានលើកឡើងនូវបញ្ហាប្រឈមនានា សម្រាប់ស្ថាប័នពន្ឋទាំងអស់ទាំងក្នុងតំបន់ និងក្នុងសាកលលោក មានជាអាទិវប្បធម៌នៃការបង់ពន្ធមានកម្រិតទាប សម្រាប់ប្រទេសកំពុងអភិវឌ្ឍន៍ ភាពលំបាកក្នុងការយកពន្ធសម្រាប់អាជីវកម្មអនឡាញ បញ្ហាប្រឈមនៃការផ្ទេរថ្លៃជាដើម ក្នុងន័យពង្រឹងកិច្ចសហប្រតិបត្តិការ ក៏ដូចជារួមគ្នាដោះស្រាយក្នុងក្របខ័ណ្ឌតំបន់មេគង្គ៕ ដោយ ៖ បញ្ញាស័ក្តិ
