ភ្នំពេញ ៖ ដើម្បីសម្រួលនិងកាត់បន្ថយការស្តីបន្ទោសដល់កូនៗដែលរៀនមិនពូកែឬមិនអាចប្រឡងជាប់ដោយសារកត្តាសុខភាពផ្លូវកាយនិងផ្លូវចិត្ត សាលារៀនខូលីងវូដភ្នំពេញ (CSPP) បានសហការជាមួយក្រុមវេជ្ជបណ្ឌិតដែលមានឯកទេសខាងកុមារនិងយុវជនក្រោមអាយុ១៨ឆ្នាំ ឱ្យជួយពិនិត្យនិងតាមដានសុខភាពសិស្សានុសិស្សនៅ CSPP ដោយពុំគិតថ្លៃ។
តាមការបញ្ជាក់ពីក្រុមវេជ្ជបណ្ឌិតឯកទេសមកពីមន្ទីរសម្រាកព្យាបាលកុមារផ្កាឈូកបានឱ្យដឹងថា កុមារខ្លះមានបញ្ហាភ្នែក ឬរលាកច្រមុះឬមានអាចម៍ត្រចៀកច្រើន តែឳពុកម្តាយឬអាណាព្យាបាលពុំបានចាប់អារម្មណ៍ ធ្វើឱ្យកុមារទាំងនោះជួបប្រទះការលំបាកក្នុងការសិក្សា ហើយជាលទ្ធផលពុំអាចធ្វើឱ្យពួកគាត់ទទួលបាននិទ្ទេសល្អឡើយ រីឯឳពុកម្តាយឬអាណាព្យាបាលវិញចេះតែគិតបារម្ភថាកូនៗរបស់ខ្លួនរៀនខ្សោយ។
ដូចនេះ ដើម្បីជួយសិស្សានុសិស្សទាំងអស់ឱ្យទទួលបានចំណេះដឹងអប់រំពិតប្រាកដតាមរយៈគ្រូបង្រៀនឆ្នើមៗគ្រប់កម្រិត និងវិន័យតឹងរឹង CSPPចាប់ផ្តើមបន្ថែមនូវកម្មវិធីថ្មីមួយទៀតគឺផ្តល់ការអប់រំការពារសុខភាពទាំងផ្លូវកាយនិងផ្លូវចិត្តជាពិសេសអប់រំដល់ការបរិភោគចំណីអាហារឱ្យបានត្រឹមត្រូវដើម្បីឱ្យពួកគាត់មានកាយសម្បទារមាំមួននិងរៀនពូកែ ចាប់ពីឆ្នាំសិក្សាថ្មីនេះតទៅ (២០១៨-២០១៩) ដោយមិនគិតថ្លៃ៕ ដោយ ៖ បញ្ញាស័ក្តិ
