ខេត្តព្រះសីហនុ ៖ កាលពីថ្ងៃទី១ ខែតុលា ឆ្នាំ២០១៨ ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងឯកឧត្តម យន្ត មីន អភិបាលនៃគណៈអភិបាលខេត្តព្រះសីហនុ បានអញ្ជើញចូលរួមក្នុងកិច្ចប្រជុំពិនិត្យការអភិវឌ្ឍ និងផលប៉ះពាល់បរិស្ថាន ផ្លូវ ថ្នល់ និងប្រពន្ធ័លូ ក្នុងក្រុងព្រះសីហនុ ដោយមានការចូលរួមពីអភិបាលក្រុង ស្រុក មន្ទីរ អង្គភាពពាក់ព័ន្ធក្នុងខេត្តជាច្រើនទៀត។
នាឱកាសនោះ មន្ត្រីជំនាញ នៃរដ្ឋបាលខេត្តព្រះសីហនុ បានឲ្យដឹងថា មូលដ្ឋាននេះមានបញ្ហាប្រឈមមួយចំនួន ខណៈពេលខេត្តព្រះសីហនុ កំពុងត្រូវបានអភិវឌ្ឍយ៉ាងគំហុក ដោយមានអាគារពាណិជ្ជកម្ម ខុនដូរ សណ្ឋាគារ ផ្ទះសំណាក់ និងសំណង់ផ្សេងៗជាច្រើន គឺបច្ចុប្បន្នមានការកើនឡើងយ៉ាងឆាប់រហ័សរយៈពេល ២ឆ្នាំចុងក្រោយនេះ។
ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ មានប្រសាសន៍ថា ការគ្រប់គ្រងអភិវឌ្ឍន៍តំបន់ ឆ្នេរសមុទ្រឱ្យមានលក្ខណៈធម្មជាតិ បញ្ហាសំរាម គឺយើងត្រូវរួមគ្នាដោះស្រាយ ធ្វើយ៉ាងណាប្រមូលសំរាមចេញពីទីប្រជុំជន ពិសេសត្រូវបំផុសចលនាឲ្យប្រជាពលរដ្ឋចូលរួមសំអាតនៅតាមលំនៅដ្ឋាន និងត្រូវមានធុងសំរាមដាក់នៅតាមផ្ទះ ដើម្បីងាយស្រួលក្នុងការប្រមូលដឹកចេញបានទាន់ពេលវេលា។ ឯកឧត្តមបន្តថា ដោយឡែកចំពោះ បញ្ហាទឹក ភ្លើងក៍ជាក៏ចំណុចប្រឈម និងត្រូវដោះស្រាយឱ្យទាន់ពេលវេលា ដើម្បីឆ្លើយតបទៅនឹងតម្រូវការទីផ្សារនាពេលបច្ចុប្បន្ន។
ជាពិសេសជាងនេះ បញ្ហាផ្លូវថ្នល់ និងប្រព័ន្ធលូ ក៏ជាចំណុចអាទិភាពសម្រាប់ការអភិវឌ្ឍទីក្រុងទេសចរណ៍ នាទិសនិរតីផងដែរ។
ឯកឧត្តម ថោង ខុន ក៏បានរំលឹកចំពោះផ្លាកសញ្ញា គឺត្រូវឲ្យមានអក្សរខ្មែរផ្នែកខាងលើ ហើយផ្នែកខាងក្រោមជាអក្សរអង់គ្លេស បន្ទាប់ មកអក្សរឈ្មោះហាង ប្រសិនបើម្ចាស់ហាងមិនអនុវត្តតាមការណែនាំរបស់រដ្ឋបាលក្រុង-ខេត្តទេ ត្រូវផ្អាក ឬទម្លាក់ផ្លាកចុះ ដើម្បីជាការព្រមាន។
ឯកឧត្តមបណ្ឌិត បញ្ជាក់បន្ថែមថា ដើម្បីអភិវឌ្ឍន៍ក្រុង-ខេត្តព្រះសីហនុ ប្រកបដោយចីរភាព ត្រូវមានដូចជា – គោលការណ៍ច្បាប់- ធនធានមនុស្ស និងថវិកា។ ដូច្នេះយើងត្រូវរៀបចំគម្រោងស្នើសុំកញ្ចប់ថវិកា ជាពិសេសទៅប្រមុខរាជរដ្ឋាភិបាល ដើម្បីយកមកកែលម្អ ស្ដារហេដ្ឋារចនាសម្ព័ន្ធផ្លូវថ្នល់ លូ និងបរិស្ថាន ឱ្យក្លាយជាទីក្រុងបៃតង និងលើកកម្ពស់វិស័យទេសចរណ៍ក្នុងការអភិវឌ្ឍសេដ្ឋកិច្ចបៃតង និងកសាងសង្គមប្រកបដោយបរិស្ថានល្អ កាត់បន្ថយផលប៉ះពាល់ ដល់ប្រជាពលរដ្ឋ ភ្ញៀវទេសចរជាតិ -អន្តរជាតិនៅពេលខាងមុខ៕ ដោយ ៖ ដែនសីមា