ភ្នំពេញ ៖ ក្រសួងពាណិជ្ជកម្ម បានលើកឡើងថា អ្វីដែលទណ្ឌិតសម រង្ស៊ី លើកឡើងគ្រាន់តែជាការកេងចំណេញផ្នែកនយោបាយ បំពានការពិតទាំងងងិតងងុល គ្មានដឹកពីស្ថានភាពការពិត និងអ្វីដែលរាជរដ្ឋាភិបាល និងប្រជាពលរដ្ឋកម្ពុជា បាននិងកំពុងធ្វើ និងទទួលផលពីការខិតខំចូលរួមគ្រប់ភាគីពាក់ព័ន្ធ ពិសេសលើបញ្ហាសុវត្ថិភាពម្ហូបអាហារ។ នេះបើតាមសេចក្តីស្រាយបំភ្លឺរបស់អគ្គ នាយកដ្ឋានកម្ពុជាត្រួតពិនិត្យទំនិញ នីហរ័ណ អាហរ័ណ និងបង្ក្រាបការកែ្លងបន្លំ (កាំកុងត្រូល) ចំពោះការលើកឡើងរបស់ ទណ្ឌិត សម រង្ស៊ី ទាក់ទិនបញ្ហាសុវត្ថិភាពម្ហូបអាហារនៅក្នុងប្រទេសកម្ពុជា។
កាំកុងត្រូល បានបញ្ជាក់ថា ចំពោះបញ្ហាពាក់ព័ន្ធនឹងសុវត្ថិភាពម្ហូបអាហារ រាជរដ្ឋាភិបាល បានរៀបចំគ្រប់គ្រាន់ និងច្បាស់លាស់ប្រកបដោយលក្ខណៈបច្ចេកទេស និងវិទ្យាសាស្ត្រ ដើម្បីធានាសុវត្ថិភាព សុខភាព ព្រមទាំងការផ្តល់ឲ្យបានពេញលេញ នូវអាហារមានគុណភាពជូនប្រជាពលរដ្ឋ។
ចំពោះមតិលើកឡើង របស់សម្តេចតេជោ នាយករដ្ឋមន្ត្រី ឲ្យបងប្អូនប្រជាពលរដ្ឋធ្វើពហិការចំពោះម្ហូបអាហារដែលមាន លួចលាយសារធាតុគីមីហាមឃាត់នោះ គឺ សម្តេចតេជោ មានបំណងឲ្យបងប្អូនប្រជាពលរដ្ឋ ទាំងអស់មានការប្រុងប្រយ័ត្ន ចេះមើលទាំងអស់គ្នា ដែលនោះ គឺជាអ្វីដែលប្រទេសជឿនលឿន គេក៏ធ្វើដូចគ្នា នឹងកម្ពុជាអ៊ីចឹងដែរ។
ចំពោះការលើកបង្ហាញពីការធ្វើការរបស់មន្ត្រីមន្ទីរពិសោធន៍នៅស្រុកគេ គឺគ្រាន់តែចង់សម្ងែង អួតអាង បំភ្លៃការពិតថាមានតែស្រុកអាមេរិក ឬប្រទេសនេះ ប្រទេសនោះ ហើយមកបង្អាប់បង្អោនជាតិសាសន៍កម្ពុជា យើងប៉ុណ្ណោះ ហើយដែលជាក់ស្តែង កម្ពុជាមានមន្ទីរពិសោធន៍ម្ហូបអាហារដែលមានសមត្ថភាពវិភាគឃើញសារធាតុគីមី មេរោគចម្លង កត្តាគ្រោះថ្នាក់ជារូបវន្តផ្សេងៗ មិនចាញ់ប្រទេសជឿនលឿន ទាំងលើឧបករណ៍សម្ភារយកមកបំពាក់ប្រើប្រាស់នៅមន្ទីរពិសោធន៍ និងមន្ត្រីជំនាញ សុទ្ធតែបានឆ្លងកាត់ការរៀនសូត្រ មានបទពិសោធន៍ពីក្នុង និងក្រៅប្រទេស។
កន្លងទៅ ជនអមិត្ត ដែលមាននិន្នាការប្រឆាំងរាជរដ្ឋាភិបាលកម្ពុជា បានបង្កើតនូវព័ត៌មាន រូបភាព ឬការអធិប្បាយអគតិតាមបណ្តាញព័ត៌មាន ពិសេសបណ្តាញសង្គមហ្វេសប៊ុក មកបំពុលសង្គម ធ្វើឲ្យស្ថានភាពច្របូកច្របល់ តាមរយៈការលើកយកបញ្ហាសុវត្ថិភាពម្ហូបអាហារមកបង្កើតជាបញ្ហា ក្នុងនោះគេបានប្រឌិតឡើងបង្ហាអង្ករប្លាស្ទីក បញ្ហាយាហ៊ឺកៅស៊ូ ទឹកស៊ុបគីមី ប្រេងឆាគីមី ជាដើម ហើយសមត្ថកិច្ចកាំកុងត្រូវ ដាក់វិធានការស្រាវជ្រាវ បង្ក្រាប និងវែកមុខ បានជនខិលខូចមកទទួលខុសត្រូវចំពោះមុខច្បាប់ និងមិនមានការរកឃើញ ឬទទួលបានទំនិញមិនប្រក្រតីទាំងនោះ ពីភាគីណាមួយឡើយ។
សូមបញ្ជាក់ថា លោក សម រង្ស៊ី បាននិយាយក្នុងផេក Sam Rainsy កាលពីថ្ងៃទី២៧ កញ្ញា ២០១៨ ពីសុវត្ថិភាពចំណីអាហារ នៅប្រទេសកម្ពុជា។ លោកសម រង្ស៊ី បានបញ្ជាក់ថា “សូមការពារប្រជាពលរដ្ឋខ្មែរ កុំឲ្យគេសម្លាប់បន្តិចម្តងៗ ដោយគេបញ្ចូលជាតិគីមី ដែលជាជាតិពុល ក្នុងចំណីអាហារ ដែលប្រជាពលរដ្ឋទិញមកហូបចុករាល់ថ្ងៃពីទីផ្សារ”៕ ដោយ ៖ រចនា
