ភ្នំពេញ៖ បុរសវ័យចំណាស់ម្នាក់ ដែលត្រូវបានប្រភពនៅកន្លែងកើតហេតុអះអាងថា មានសតិមិនសូវប្រក្រតី បានដុតផ្ទះរបស់ខ្លួន រហូតបង្កជាអគ្គិភ័យយ៉ាងសន្ធោសន្ធៅ មុននឹងលោតពីលើផ្ទះចុះមកខាងក្រោម បណ្តាលឱ្យបែកក្បាល និងបាក់ក ស្លាប់ភ្លាមៗនៅកន្លែងកើតហេតុ។
ហេតុការណ៍នេះ បានកើតឡើងនៅវេលាម៉ោងប្រមាណ ៩:៤០នាទីព្រឹក ថ្ងៃទី១៧ ខែកញ្ញា ឆ្នាំ២០២៦ នៅតំបន់ខាងក្រោមស្ពានអាកាសមរតកតេជោ ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុ បុរសរងគ្រោះបានយកចង្ក្រានហ្គាសទៅដុតផ្ទះរបស់ខ្លួននៅជាន់ខាងលើ។
ភ្លើងបានឆាបឆេះយ៉ាងខ្លាំង និងបង្កផ្សែងយ៉ាងក្រាស់នៅក្នុងផ្ទះ។
នៅពេលភ្លើងកំពុងឆាបឆេះខ្លាំង បុរសរូបនេះត្រូវបានគេរាយការណ៍ថា ទ្រាំនឹងផ្សែង និងកម្តៅមិនបាន ក៏ប្រថុយលោតពីលើផ្ទះចុះមកខាងក្រោម។
ការធ្លាក់ពីទីខ្ពស់បានបណ្តាលឱ្យគាត់បែកក្បាល និងបាក់ក ស្លាប់ភ្លាមៗនៅនឹងកន្លែង។
ក្រោយទទួលបានព័ត៌មានអំពីអគ្គិភ័យ កម្លាំងសមត្ថកិច្ចមូលដ្ឋាននៃគណៈបញ្ជាការឯកភាពខណ្ឌចំការមន បានសហការជាមួយកម្លាំងការិយាល័យពន្លត់អគ្គិភ័យ នៃស្នងការដ្ឋាននគរបាលរាជធានីភ្នំពេញ ចុះអន្តរាគមន៍ភ្លាមៗ។
រថយន្តពន្លត់អគ្គិភ័យជាច្រើនគ្រឿងត្រូវបានបញ្ជូនទៅកាន់ទីតាំង ដើម្បីបាញ់ទឹកពន្លត់ភ្លើង និងទប់ស្កាត់ការឆាបឆេះកុំឱ្យរាលដាលទៅកាន់ផ្ទះប្រជាពលរដ្ឋដែលនៅក្បែរនោះ។
បន្ទាប់ពីអគ្គិភ័យត្រូវបានគ្រប់គ្រង សមត្ថកិច្ចជំនាញពីការិយាល័យកោសល្យវិច័យ និងបច្ចេកទេសវិទ្យាសាស្ត្រ នៃស្នងការដ្ឋាននគរបាលរាជធានីភ្នំពេញ បានចុះពិនិត្យសព និងធ្វើកំណត់ហេតុតាមនីតិវិធី។
ក្រោយការពិនិត្យរួច សមត្ថកិច្ចបានប្រគល់សាកសពទៅក្រុមគ្រួសារ ដើម្បីយកទៅចាត់ចែងធ្វើបុណ្យតាមប្រពៃណី៕រក្សាសិទ្ធិគ្រប់យ៉ាងដោយ CEN
