ជាទូទៅ បុគ្គលិកបំរើការទាំងអស់ តែងតែចង់បានពេលវេលាឈប់សម្រាកច្រើន ហើយនាយកប្រតិបត្តិរបស់ក្រុមហ៊ុនមួយនៅក្នុងប្រទេសជប៉ុន សម្រេចឲ្យបុគ្គលិករបស់ខ្លួនឈប់សម្រាក ៦ថ្ងៃបន្ថែម ប្រសិនជាពួកគេឈប់ធ្វើរឿងមួយនេះនៅកន្លែងការងារ។
លោក Takao Asuka នាយកប្រតិបត្តិក្រុមហ៊ុន Piala Inc. ត្រូវបានគេចុះផ្សាយថា បានសម្រេច ឲ្យបុគ្គលិកដែលមិនជក់បារី បានឈប់សម្រាក ៦ថ្ងៃបន្ថែម ហើយការអនុវត្តនេះ បានដាក់ចូលក្នុងគោលនយោបាយរបស់ក្រុមហ៊ុន។
នាយកប្រតិបត្តិក្រុមហ៊ុន បានអនុវត្តគោលការណ៍នេះ បន្ទាប់ពីបុគ្គលិកដែលមិនជក់បារី បានធ្វើការត្អូញត្អែរថា ការសម្រាកដើម្បីជក់បារី (Smoking break) បានប៉ះពាល់ដល់ប្រសិទ្ធភាពការងារនៅក្នុងក្រុមហ៊ុន ដោយសារតែបុគ្គលិកជក់បារី ត្រូវចំណាយពេល ១៥នាទី ដើម្បីធ្វើដំណើរទៅមកៗ រកកន្លែងជក់បារី។
បន្ទាប់ពីមានបុគ្គលិធ្វើការបញ្ចេញមតិដាក់ក្នុងប្រអប់បញ្ចេញមតិ លោក Hirotaka អ្នកនាំពាក្យរបស់ក្រុមហ៊ុនបញ្ជាក់ថា “ចៅហ្វាយរបស់យើងបានឃើញការបញ្ចេញមតិនោះ និងបានយល់ស្រប ដូច្នេះពួកយើងបានសម្រេចផ្តល់ថ្ងៃឈប់សម្រាកបន្ថែមដល់អ្នកដែលមិនជក់បារី ដើម្បីប៉ះប៉ូវដល់ពួកគេ”។
ការអនុវត្តគោលការណ៍នោះទទួលបានជោគជ័យ ចាប់តាំងពីថ្ងៃទី ១មកម្លេះ ហើយរហូតមកដល់ពេលនេះ បុគ្គលិកចំនួន ៣០នាក់នៃបុគ្គលិកទាំងអស់ បានឈប់ជក់បារីនៅកន្លែងធ្វើការ ហើយយ៉ាងតិច ៤នាក់បានផ្តាច់បារីបានសម្រេច៕ សុភ័ក្ត្រ
ប្រភព៖ Good Times