ក្រោយពីសារព័ត៌មានក្នុងស្រុកជាច្រើនបានចុះផ្សាយតៗគ្នាថា បុរសជាម្ចាស់ហាង «ម៉ែក្មេកហេងហេង BBQ សាច់អាំង និងស៊ុប» បានស្លាប់ក្នុងគ្រោះថ្នាក់ចរាចរណ៍ត្រូវរថយន្តម៉ាកហ៊ីយ៉ាន់ដាយ១គ្រឿង បុកបណ្តាលឲ្យស្លាប់ភ្លាមៗ នៅលើដងយ៉ាងអាណោចអាធម ដោយសារតែគាត់តូចចិត្តព្រោះតែប្រពន្ធជាទីស្រលាញ់របស់គាត់ចុះចោលនោះ ឥឡូវនេះ ប្រពន្ធរបស់ជនរងគ្រោះបានចេញមុខបដិសេធ និងបញ្ចេញការពិតបន្ថែមទៀត ទាំងខ្លួននាងកំពុងសម្រាកព្យាបាលជំងឺនៅក្នុងមន្ទីរពេទ្យនាឯប្រទេសថៃ ។
ប្រពន្ធរបស់ជនរងគ្រោះបានសរសេររៀបរាប់ការពិតនៅលើគណនីហ្វេសប៊ុករបស់នាងឈ្មោះ Oun Tey យ៉ាងដូច្នេះថា៖ «សូមមេតាបងៗអ្នកកាសែតទាំងអស់មេត្តាជួយផុសព័ត៌មានដែលពិត ជៀសវាងការប៉ះពាល់ដល់កិត្តិយសបុគ្គលដូចជាក្រុមគ្រួសាររបស់ខ្ញុំ ដែលទើបតែមានបញ្ហាកើតឡើង ដោយបានសរសេរខុសពីការពិតសម្រាប់ខ្ញុំជាភរិយារបស់ជនរងគ្រោះផ្ទាល់កំពុងគេងសម្រាកព្យាបាលនៅប្រទេសថៃដែលទាំងសុខភាពមិនទាន់ជាផង ស្រាប់តែមានទុក្ខជាទម្ងន់ បែរជាអស់លោកបងៗអ្នកកាសែតសរសេរថានាងខ្ញុំរត់ចោលប្ដីទៅវិញ», «ចង្គៀងផ្ទះអ្នកណាភ្លឺផ្ទះអ្នកនឹងហើយបងប្អូន ចឹងអ្នកសសេរនឹងដូចគ្នាបើគ្រាន់តែលឺតពីគេទេកុំធ្វើចេះរឿងគេខ្ញុំផ្ទាល់ទុក្ខជាន់ទុកហើយភ្នែកព្យាបាលអស់លុយខ្ទង់មុឺនក៍មិនដឹងថាជារឺអត់បានត្រឹមទប់ស្តាត់មេរោគ ខ្លួនឯងចេញពីពេទ្យមិនទាន់បានប៉ុន្មានផងកូនស្រីជាទីស្រលាញ់ឈឺ បន្ទាប់ពីនឹងមកប្តីចឹងទៀត សួរថាអ្នកណាយល់អារម្មណ៍នឹង ???ធ្វេីមិចនិស្ស័យយេីងបានជួបគ្នាត្រឹមនឹង??លាហេីយលារហូតហេីយ ??♀️??♀️រឿងព្រោះនាងតូចសូមកុំភ័យខ្ងុំនឹងមេីលថែនាងអោយបានល្អ ខ្ងុំសន្យា សូមទៅអោយបានសុខចុះណា??» ។
ជាមួយគ្នានេះផងដែរ គណនីហ្វេសប៊ុកឈ្មោះ Hea Kun Thu ដែលត្រូវជាបងបង្កើតរបស់ជនរងគ្រោះ ក៏បានចេញមុខសរសេរថា៖ «ប្អូនញុំមានទុក្ខហេីយទាំងភ្នែកខ្លួនមេីលមិនទាន់ឃេីញឥឡូវត្រូវប្ដីស្លាប់ចោលទៀតសូមសង្គមហ្វេសប៊ុកកុំសរសេរផ្ដេសផ្ដាស់អីទុក្ខជាន់លេីទុក្ខហេីយ» ។
ទាក់ទងករណីចុះផ្សាយពុំដឹងច្បាស់ផងដែរនេះ គណនីហ្វេសប៊ុកឈ្មោះ «កូន ខ្លាតូច» ក៏បានសរសេរបញ្ជាក់ថា៖ «អាណិតណាស់ ការពិតគាត់ដើរឆ្លងថ្នល់ទៅទិញអីញ៉ាំ គាប់ជួនឡាននុះវាបើកឡើនមកដល់ចំនុចហ្នឹងក៏បុកគាត់តែម្តងទៅ គ្មានរឿងប្រពន្វរត់ចោលអីទេ សុំកុំយល់ច្រឡំអី ព្រោះប្រពន្វសពកំពុងសំរាកព្យាបាលភ្នែកនៅឯប្រទេសថៃ ទុក្ខជាន់លើទុក្ខអាណិតណាស់ សុំអោយឆាប់ជាសះស្បើយផង??» ។
គួររម្លឹកផងដែរថា ជនរងគ្រោះខាងដែលមានឈ្មោះ ឆាយ ផានិត អាយុ ៣០ ឆ្នាំ រស់នៅភូមិកណ្តាច់ ឃុំចុងអំពិល ស្រុកកញ្ច្រៀច ត្រូវរថយន្តម៉ាកហ៊ីយ៉ាន់ដាយ ពណ៌ស ពាក់ស្លាក លេខកំពង់ធំ 3A-0988 បើកបុកបណ្ដាលឲ្យស្លាប់ភ្លាមៗ កាលពីវេលាម៉ោង ៦ៈ១០នាទីព្រឹកថ្ងៃទី១៦ ខែតុលា ឆ្នាំ២០១៨ ត្រង់ចំណុចមុខហាង ម៉ែក្មេក ហេងហេង ភូមិស្វាយអន្ទរទី១ ឃុំស្វាយអន្ទរ ស្រុកស្វាយអន្ទរ និងត្រូវបានប្រភពប្រាប់សារព័ត៌មានថា ជនរងគ្រោះមានវិបត្តិខ្លាំងជាមួយប្រពន្ធ រឿងប្រពន្វរត់ចោល ទើបសម្រេចចិត្តបែបបនេះ ៕ ដោយ៖ ឧត្តម
