មនុស្សម្នាក់ៗតែងមានវាសនា ទោះរស់នៅកន្លែងដែលមានហុងស៊ុយមិនល្អ ក៏សុទ្ធសឹងក្លាយជាល្អបាន។ផ្ទុយទៅវិញ ទោះបីនៅកន្លែងល្អ តែអ្នកពុំបានសាងបុណ្យ នោះវានឹងរលាយដោយខ្លួនឯង។ នេះជាប្រការដែលគ្រូទស្សន៍ទាយជោគជតារាសីដាច់ខាតមិននិយាយប្រាប់អ្នកឡើយ ព្រោះវាជា«របររកស៊ី»របស់ពួកគេ។
គ្រូខុងជឺ ធ្លាប់និយាយថា ចិត្តមិនស្អាត ហុងស៊ុយគ្មានប្រយោជន៍ ។ អកតញ្ញូចំពោះឳពុកម្តាយ ការសែនព្រេនគ្មានតម្លៃឡើយ។
ហុងស៊ុយក៏ដូចជាច្បាប់នៃហេតុនិងផលអ៊ីចឹង។ ប្រសិនបើចិត្តអ្នកមិនបរិសុទ្ធ ទោះរស់នៅកន្លែងមានហុងស៊ុយល្អប៉ុនណាក៏វានឹងប្រែក្លាយទៅជាមិនល្អ។ផ្ទុយទៅវិញ បើចិត្តអ្នកបរិសុទ្ធ ទោះអ្នកនៅកន្លែងហុងស៊ុយមិនល្អ យូរទៅវានឹងក្លាយទៅជាល្អដោយខ្លួនឯង។
មានន័យថា រឿងសំខាន់គឺអ្នកត្រូវសាងចិត្តឱ្យបរិសុទ្ធ នោះហុងស៊ុយវានឹងសម្របតាម។ ប្រការដែលធ្វើឱយចិត្តបរិសុទ្ធគឺ៖
ទី១ ៖ មិនសម្លាប់សត្វ
ដែលហៅថាទីតាំងមានហុងស៊ុយល្អ គឺជាកន្លែងដែលសម្បូរភាពរស់រវើក។ ការសម្លាប់សត្វ នឹងធ្វើឱ្យសភាវៈមានជីវិតទាំងនោះភ័យខ្លាច រត់ទៅជ្រកកោណកន្លែងផ្សេង។ ដូច្នេះធាតុផ្សំល្អនៃហុងស៊ុយក៏ត្រូវបាត់បង់។
ទី២ ៖ មិននិយាយអាក្រក់ពីអ្នកដទៃ
មិនត្រូវនិយាយអាក្រក់ពីអ្នកដទៃ រួមទាំងសាច់ញាតិនៅក្នុងផ្ទះផង។ពាក្យសម្តីតែងនាំមកជាមួយនូវថាមពល។ពេលអ្នកនិយាយអាក្រក់ពីគេ នោះថាមពលអាក្រក់នឹងស្ថិតនៅជុំវិញអ្នក វាតោងជាប់លើរបស់របរ រុក្ខជាតិ រួមទាំងជញ្ជាំងផ្ទះអ្នក។នៅពេលដែលគំនរថាមពលអាក្រក់នេះកាន់តែច្រើនឡើង ដល់កម្រិតមួយធ្វើឱ្យជះឥទ្ធិពលអាក្រក់ចំពោះអ្នក ធ្វើឱ្យផ្លូវចិត្តមិនស្ងប់ សុខភាពធ្លាក់ចុះ លែងមានប្រាជ្ញាឆ្លាតវៃទៀត។
ហេតុនេះ គ្រូហុងស៊ុយដែលពូកែនោះគ្រាន់តែសម្លឹងមើលរបស់របរមនុស្សម្នាក់ធ្លាប់ប្រើ ក៏អាចទាយដឹងថាអ្នកនោះជាមនុស្សបែបណា។
ទី៣ ៖ កតញ្ញូចំពោះឳពុក ម្តាយ
ភាពកតញ្ញូចំពោះឳពុកម្តាយ គឺជាប្រពៃណីល្អបំផុតរបស់មនុស្ស។ លើសពីនេះទៀត ការកតញ្ញូចំពោះឳពុកម្តាយ ក៏ជាឱសថជួយប្រែជោគវាសនាមនុស្សបាន។ ពាក្យពេចន៍ល្អៗមានច្រើនណាស់ ប៉ុន្តែពាក្យថាកតញ្ញូគឺឈរនៅលំដាប់ដំបូង វាជាឫសគល់នៃភាពបរិសុទ្ធត្រជាក់ត្រជុំ។ ប្រសិនបើអនុវត្តន៍ពាក្យ«កតញ្ញូ» បានល្អហើយនោះ រឿងអ្វីផ្សេងៗទៀតក៏នឹងប្រែប្រួលបន្តិចម្តងៗពីអាក្រក់ទៅជាល្អ។
ទី៤ ៖ ត្រូវឱនលំទោនបន្ទាបខ្លួន
មហាសមុទ្រស្ថិតនៅកន្លែងទាបបំផុត ទើបក្លាយជាស្តេចនៃទន្លេរាប់ម៉ឺនសែន។ ប្រសិនបើយើងបន្ទាបខ្លួនឱ្យទាប នោះបញ្ញា ផលបុណ្យនៃវត្ថុទាំងឡាយនឹងមកប្រមូលផ្តុំ។ ប្រសិនបើអ្នកចង់លើករបស់អ្វីមួយ ប្រាកដណាស់អ្នកត្រូវបន្ទាបខ្លួនឱ្យនៅទាបជាងរបស់នោះ។
មិនខុសអ្វីនឹងធូលីដែលវាធ្លាក់ចុះលើផ្ទៃដី ក្លាយទៅជាដី ទ្របានវត្ថុគ្រប់យ៉ាង។ដូច្នេះចំពោះកំហុស ការខ្វះខាតរបស់អ្នកដទៃ ចូរគប្បីអធ្យាស្រ័យ លើកលែង ហើយធ្វើបែបនេះបាន នោះខ្លួនឯង អ្នកនឹងមានកម្លាំងខ្លាំងក្លាជាងមុន។
ទី៥ ៖ មារយាទ សីលធម៌ ខ្វះ នឹងប្រទះនូវគ្រោះ
ប្រសិនបើអ្នកគោរពអ្នកណាម្នាក់ នោះគេនឹងការពារអ្នក ជួយអ្នក ។
ទ្រព្យសម្បត្តិអាចគង់វង្សបានដោយសារចរិយាធម៌ ផ្ទុយទៅវិញវានឹងក្លាយជាគ្រោះថ្នាក់។ ជាអាទិ៍ មនុស្សមានលុយវាល់លានគ្មានភាពបារម្ភខ្លាច ក្នុងពេលដែលអ្នកខ្លះមានខ្ទង់ម៉ឺនសែនប៉ុណ្ណោះ បែរជារស់ក្នុងសភាពភ័យព្រួយជានិច្ច។
ឫសគល់របស់មនុស្សគឺការស្មោះត្រង់ ទង្វើសុចរិត ការអំណត់ មិនព្យាបាទ ប្រការ៣នេះជួយឱ្យមនុស្សមានថាមពលខ្លាំង ហើយកម្ចាត់ចោលនូវថាមពលអាក្រក់។ការសាងបំប៉ុនគុណភាពជីវិតនិងសីលធម៌សម្រាប់ខ្លួន គឺជាវិធីនាំមកនូវហុងស៊ុយល្អបំផុត ជួយការពារដល់អ្នកបានគ្រប់ពេល។
ដូច្នេះរឿងនេះគ្រូហុងស៊ុយប្រាកដជាមិនប្រាប់អ្នកឡើយ៕សូយន