ពោធិ៍សាត់ ៖ ករណីឃាតកម្មមួយ បានកើតឡើង នៅខេត្តពោធិ៍សាត់ នៅក្នុងផ្ទះជនរងគ្រោះ ដែលប្តី ត្រូវបានជនសង្ស័យមានគ្នាជាក្រុម វាយបែកមុខបែកមាត់ រហូតស្លាប់នៅនឹងកន្លែង ចំណែក ប្រពន្ធ ត្រូវបានក្រុមជនសង្ស័យ បាញ់នឹងកាំភ្លើងស្នប់រងបួសធ្ងន់ ។ បន្ទាប់ពីកើតហេតុ នៅថ្ងៃទី២៥ ខែវិច្ឆិកា ឆ្នាំ២០១៨ កម្លាំងនគរបាលព្រហ្មទណ្ឌកម្រិតធ្ងន់ ការិយាល័យបច្ចេកទេស អធិការនគរបាលស្រុកកម្លាំងប៉េអឹមស្រុក ខេត្ត និងគ្រូពេទ្យកោសល្យវិច័យ បានចុះដល់ទីកន្លែងកើតហេតុជាក់ស្តែង ដែលបានកើតឡើងកាលពីយប់ថ្ងៃទី២៤ ខែវិច្ឆិកា ឆ្នាំ២០១៨ វេលាម៉ោង១៨និង២០នាទី ជនរងគ្រោះចំនួន៣នាក់។
មន្ត្រីនគរបាលខេត្តបានឲ្យដឹងថា ជនរងគ្រោះទាំង៣នាក់រួមមានទី១-ឈ្មោះ ធូ ធន ភេទប្រុស អាយុ៨៣ឆ្នាំ ជនជាតិខ្មែរ នៅភូមិបត់កណ្តោល ឃុំបឹងបត់កណ្តោល ស្រុកបាកាន ខេត្តពោធិ៍សាត់ (ស្លាប់នៅកន្លែងកើតហេតុជនរងគ្រោះ មានស្នាមរបួសប៉ែកខាងមុខជាច្រើនកន្លែង ស្នាមរបួសនេះ អាចប៉ះទង្គិចនឹងឧបករណ៍ដែលមានមុខមុត ទាល នឹងមានទម្ងន់), ទី២-ឈ្មោះ ឃុន ណែម ភេទស្រី អាយុ៧៣ឆ្នាំ ជនជាតិខ្មែរ នៅភូមិឃុំស្រុកខាងលើ ប្រពន្ធដើម (ជនរងគ្រោះរបួសជើងខាងឆ្វេង ជនសង្ស័យអាចប្រើប្រាស់កាំភ្លើង បាញ់គ្រាប់សំណ) និងទី៣-ឈ្មោះស៊ុន សៀវលាន ភេទប្រុស អាយុ៧ឆ្នាំ ត្រូវជាចៅ។
សម្ភារៈបាត់បង់ក្រវិលមាស១ជី, បាត់ព្រះ២អង្គដាក់ក្នុងក្រឡាប់។ យោងតាមការសន្និដ្ឋានរបស់កម្លាំងជំនាញ ជនសង្ស័យមួយក្រុមមានគ្នាប្រហែល៦នាក់។ តាមការសន្និដ្ឋានបឋមជាករណីឃាតកម្ម រឿងគំនុំ។
បច្ចុប្បន្នសមត្ថកិច្ចចម្រុះ កំពុងសហការគ្នាស្រាវជ្រាវ ស្វែងរកចាបប់ខ្លួន ក្រុមជនសង្ស័យ យកមកផ្តន្ទាទោសតាមផ្លូវច្បាប់។
ក្នុងករណីឃាតកម្មនេះ យោងតាមរបាយការណ៍ របស់អធិការដ្ឋាន នគរបាលស្រុកបាកាន បានឲ្យដឹងថា ជនរងគ្រោះជាប្រពន្ធ ត្រូវបានជនសង្ស័យ ជាឃាតករមួយក្រុម មានគ្នា៤នាក់ទៅ៥នាក់ បានលបចូលទៅក្នុងផ្ទះជនរងគ្រោះ រួចបាញ់ស្រី្តជាប្រពន្ធ នឹងកាំភ្លើងស្នប់ បណ្តាលឲ្យរងរបួសធ្នន់ រួចចាប់ជនរងគ្រោះជាប្តី វាយនៅលើគ្រែ បណ្តាលឲ្យស្លាប់ នៅនឹងកន្លែងកើតហេតុតែម្តង ហើយក្រុមជនសង្ស័យ បានគេចខ្លួន។
ប្រភពដដែល ក៏បានឲ្យដឹងទៀតថា ក្រោយសមត្ថកិច្ច នគរបាលជំនាញ ចុះពិនិត្យនិងស្រាវជ្រាវ ដល់កន្លែងកើតហេតុ ទើបឈានដល់ការកំណត់មុខសញ្ញា សង្ស័យនិងធ្វើការការឃាត់ខ្លួនបានម្នាក់ យកមកសាសកសួរ នៅអធិការដ្ឋាន នគរបាលស្រុកបាកាន ៕ ដោយ ៖ បញ្ញាស័ក្តិ
