ភ្នំពេញ ៖ បវរកញ្ញាឯកសាកលវិទ្យាល័យពិភពលោកមកពី ៨២ប្រទេស រួមមាន៨៦នាក់ ក្នុងនោះកម្ពុជាមានចំនួន៣នាក់ផងដែរ បានដើរតួនាទីសំខាន់ជាអ្នកផ្សព្វផ្សាយវិស័យទេសចរណ៍កម្ពុជា បន្តទៅកាន់ពិភពលោក ឲ្យបានស្គាល់ច្បាស់ និងទាក់ទាញកំណើនទេសចរបន្ថែមទៀត មកទស្សនាកម្ពុជា។ ថោង ខុន រដ្ឋមន្ត្រីក្រសួងទេសចរណ៍ បានថ្លែងក្នុងកម្មវិធីប្រកួតប្រជែងបវរកញ្ញាឯកសាកលវិទ្យាល័យពិភពលោក ឆ្នាំ២០១៧ ក្រោមពាក្យស្លោក ដើម្បីការស្រឡាញ់សន្ដិភាព និងមនុស្សធម៌នៅសាលមហោស្រពកោះពេជ្រ នាថ្ងៃទី២០ ខែធ្នូ ឆ្នាំ២០១៧ ។
ក្នុងឱកាសនោះដែរ លោករដ្ឋមន្ត្រីបានឲ្យដឹងថា កម្ពុជាបច្ចុប្បន្ន មានសុខសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់ពេញលេញ និងមានការអភិវឌ្ឍរីកចម្រើនលើគ្រប់វិស័យ រួមទាំងវិស័យទេសចរណ៍។ ទេសចរណ៍វប្បធម៌ ពិតជាអាទិភាពចម្បង ផ្អែកលើសម្បត្តិបេតិកភណ្ឌវប្បធម៌ប្រវត្តិសាស្ត្រ នៅតំបន់សៀមរាប-អង្គរ ប្រាសាទព្រះវិហារ និងប្រាសាទសំបូរព្រៃគុក ខណៈដែលទេសចរណ៍ធម្មជាតិរបស់កម្ពុជា ក៏មានសក្តានុពលដ៏ធំធេង អាចប្រកួតប្រជែងក្នុងតំបន់បានយ៉ាងល្អប្រសើរផងដែរ។
លោកបានបន្ថែមថា ឆ្នាំ២០១៦ វិស័យទេសចរណ៍កម្ពុជាសម្រេចបានកំណើនក្នុងអត្រា ៥% ជាមួយនឹងការមកដល់នៃទេសចរអន្តរជាតិចំនួនជាង ៥លាននាក់ និងនាំប្រាក់ចំណូលប្រមាណ ៣.៤០០លានដុល្លារអាមេរិក ចាក់បញ្ចូលក្នុងសេដ្ឋកិច្ចជាតិ រួមចំណែកប្រមាណ១២% នៃផលិតផលក្នុងស្រុកសរុប (GDP) និងបង្កើតការងារដោយផ្ទាល់ប្រមាណជាង ៦២ម៉ឺននាក់ និងដោយប្រយោលរាប់សិបម៉ឺននាក់ទៀត។ ហើយក្នុងរយៈពេល១០ខែ ដើមឆ្នាំ២០១៧ កម្ពុជាទទួលបានភ្ញៀវទេសចរអន្តរជាតិមានចំនួនជាង ៤,៣លាននាក់ កើនឡើង ១០,៤% ធៀបនឹងរយៈពេលដូចគ្នាក្នុងឆ្នាំ២០១៦។
តាមការព្យាករណ៍ កម្ពុជានឹងទទួលបានទេសចរអន្តរជាតិប្រមាណ ៥,៦លាននាក់ នៅឆ្នាំ២០១៧នេះ និងប្រមាណ ៧លាននាក់ នៅឆ្នាំ២០២០ ដោយនាំមកនូវចំណូលសរុបប្រមាណ ៥.០០០លានដុល្លារអាមេរិក បង្កើតនូវឱកាសការងារដោយផ្ទាល់បានប្រមាណ ១លាននាក់ ហើយចំនួនទេសចរអន្តរជាតិនេះ អាចកើនដល់ប្រមាណ ១០លាននាក់ នៅឆ្នាំ២០២៥ និងប្រមាណ ១៥លាននាក់ នៅឆ្នាំ២០៣០ ជាមួយចំណូលសរុបប្រមាណ ១០ ពាន់លានដុល្លារអាមេរិក បង្កើតឱកាសការងារដោយផ្ទាល់ប្រមាណ ២លាននាក់។ ព្រមជាមួយនេះ នៅឆ្នាំ២០១៧ ចំនួនភ្ញៀវទេសចរក្នុងស្រុករំពឹងថានឹងមានចំនួន ១១លាននាក់ និងកើនដល់ប្រមាណ ១៣លាននាក់ នៅឆ្នាំ២០២០ និង ២០លាននាក់ នៅឆ្នាំ២០៣០៕ ដោយ ៖ កូឡាប
