តាកែវ៖ ស្នងការនគរបាលខេត្តតាកែវ លោកឧត្តមសេនីយ៍ទោ សុខ សំណាង បានធ្វើការណែនាំដល់អធិការស្រុកត្រាំកក់ និងអធិការស្រុកទ្រាំង ត្រូវតែបង្កើននៅចំណេះដឹងរបស់ខ្លួនបន្ថែមទៀត ជាពិសេសត្រូវតែយល់អំពីពាក្យថា នគរបាល និងសហគមន៍ គឺត្រូវតែបង្កើនទំនាក់ទំនងល្អ ជាមួយនឹងបងប្អូនប្រជាពលរដ្ឋ យល់ដឹងអំពីសុខទុក្ខរបស់ពួកគាត់ ដើម្បីឲ្យប្រជាពលរដ្ឋកាន់តែមានភាពជឿជាក់ លើសមត្ថកិច្ចនគរបាលជាតិរបស់យើង មិនមែនធ្វើជានគរបាល ធ្វើជាអធិការ ធ្វើឲ្យប្រជាពលរដ្ឋខ្លាចរអាយើងនោះទេ ដូច្នេះសូមឲ្យលោកអធិការទាំងពីរស្រុកត្រូវតែពិនិត្យមើលការងារនោះឡើងវិញ និងត្រូវតែយកចិត្តទុកដាក់ខ្ពស់ លើកិច្ចការងារនេះ ។
ថ្លែងបែបនេះគឺក្នុងពេលដែលលោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ អញ្ជើញចូលរួមក្នុងកិច្ចប្រជុំផ្សព្វផ្សាយសេចក្តីណែនាំលេខ ០១៩ ស.ណ.ន របស់ក្រសួងមហាផ្ទៃ និងបូកសរុបលទ្ធផលអនុវត្តន៍ការងារនគរបាល និងសហគមន៍ ប្រចាំខែមិថុនា នៅសាលប្រជុំរបស់ស្នងការដ្ឋាន នារសៀលថ្ងៃទី ១៥ ខែកក្កដា ឆ្នាំ ២០១៩នេះ ។
ទន្ទឹមនឹងមានការណែនាំដល់អធិការទាំងពីរស្រុកខាងលើនេះដែរ លោកស្នងការក៏បានលើកទឹកចិត្ត និងបង្ហាញអំពីស្នាដៃចំពោះការងារគំរូ របស់អធិការពីរស្រុកដូចគ្នា គឺអធិការនគរបាលស្រុកបាទី និងអធិការនគរបាលស្រុកព្រៃកប្បាស និងជំរុញឲ្យអធិការនៅតាមបណ្តាស្រុកផ្សេងៗទៀត ត្រូវតែយកចិត្តទុកដាក់ និងបង្កើននូវសមត្ថភាពរបស់ខ្លួនបន្ថែមទៀត ជាមួយនឹងការទំនាក់ទំនងល្អជាមួយនិងប្រជាពលរដ្ឋ ។
លោកស្នងការបានបន្តថា ចំពោះការប្រជុំលើវេទិកាសាធារណៈ នគរបាលគ្រប់រូប ត្រូវលើកឡើងយកបង្ហាញ ដល់ប្រជាពលរដ្ឋអំពីផលប៉ះពាល់ ចំពោះបញ្ហាគ្រឿងញៀន និងការគោរពច្បាប់ចរាចរណ៍ផ្លូវគោក ដើម្បីឲ្យពួកគាត់បានយល់ដឹងកាន់តែច្បាស់ នៅសុវត្ថិភាពរបស់ខ្លួន ៕ដោយ៖ តាកែវ