ខេត្តស្វាយរៀងៈ លោកម៉ែន វិបុល អភិបាលខេត្តស្វាយរៀង នៅព្រឹកថ្ងៃទី១៩ខែសីហាឆ្នាំ២០១៩នេះ បានថ្លែងនូវការផ្តាំផ្ញើដល់បេក្ខជនប្រឡងយកសញ្ញាបត្រមធ្យមសិក្សាទុតិយភូមិ ត្រូវខិតខំបញ្ចេញឲ្យអស់ពីសមត្ថភាព អ្នកចេះគឺជាប់ និងត្រូវគោរបទបញ្ជាផ្ទៃក្នុង នៃការប្រឡងឲ្យបានត្រឹមត្រូវចៀសវាងនាំឲ្យមានកំហុស នាពេលប្រឡងដែលធ្វើឲ្យខាតពេលវេលា។
លោកអភិបាលខេត្តបានមានប្រសាសន៍ដូច្នេះ ក្នុងឱកាសដែលលោកបានអញ្ជើញចូលរួមក្នុងការកាត់វិញ្ញាសាប្រឡងសញ្ញាបត្រមធ្យមទុតិយភូមិ នៅមណ្ឌលសាលាគរុកោសល្យ និងវិក្រឹតការខេត្តស្វាយរៀង ដែលមានការចូលរួមពីមន្ត្រីពាក់ព័ន្ធជាច្រើនរូបផងដែរ។
សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០១៨.២០១៩ នៅខេត្តស្វាយរៀង មានបេក្ខជនប្រឡង៤០០៦នាក់ ក្នុងនោះស្រីចំនួន ១៩០៥នាក់ ស្មើនឹង១៦២បន្ទប់ និងមាន៧មណ្ឌល នេះបើយោងតាមការបញ្ជាក់ពីមន្ត្រីនៃមន្ទីរអប់រំ យុវជននិងកីឡាខេត្តស្វាយរៀង ប្រាប់ឲ្យដឹងនៅព្រឹកថ្ងៃទី១៩ខែសីហាឆ្នាំ២០១៩នេះ។
មន្ត្រីដដែលបានបន្តទៀតថា មណ្ឌលថ្នាក់វិទ្យាសាស្ត្រមាន២មណ្ឌលស្មើនឹង៤១បន្ទប់ បេក្ខជនប្រឡងសរុប១០០២នាក់ ស្រី៥៣៧នាក់។
មណ្ឌលប្រឡងទាំង៧ ក្នុងខេត្តស្វាយរៀងមានៈ ១.មណ្ឌលវិទ្យាល័យហ៊ុន សែនស្វាយជ្រំ មាន២៦បន្ទប់ បេក្ខជន៦៥០នាក់។ ២.មណ្ឌលវិទ្យាល័យហ៊ុន សែនចេក មាន១៥បន្ទប់ បេក្ខជនប្រឡង៣៥២នាក់។ ចំណែកឯមណ្ឌលថ្នាក់វិទ្យាសាស្ត្រសង្គមមាន៥មណ្ឌល ស្មើនឹង១២១បន្ទប់ បេក្ខជនសរុប៣០០៤នាក់ ស្រី១៣៦៨នាក់ ក្នុងនោះ ១.មណ្ឌលបឋមសិក្សាព្រះសីហនុមាន២៥បន្ទប់ បេក្ខជនប្រឡង៦២៥នាក់ ២.មណ្ឌលវិទ្យាល័យស្វាយរៀង (ខាងត្បូង) មាន២០បន្ទប់ បេក្ខជន៥០០នាក់ ៣.មណ្ឌលវិទ្យាល័យស្វាយរៀង (ខាងជើង) មាន៣៧បន្ទប់, បេក្ខជន៩២៥នាក់ ៤.មណ្ឌលសាលាគរុកោសល្យនិងវិក្រឹតការខេត្ត មាន១៩បន្ទប់ បេក្ខជន៤៧៩នាក់ ៥.មណ្ឌលបឋម២ធ្នូ មាន២០បន្ទប់ បេក្ខជន៤៧៩នាក់ ៕ ដោយ៖ វ៉ៃកូ
